1 Lelo tegelezeni, mweye walangulizi wa welesi wa Yakobo,

mweye watawala wa isi ya Isilaili,

molondeka kuvimanya kutenda voilondeka.

2 Mbali mweye mokwihila mbuli zinogile molonda mbuli zihile.

Motenda fana wanhu wochinja, mowachuna mbende wanhu wangu,

na mosegeza nyama muna yamavuha yawo.

3 Mweye moja nyama ya wanhu wangu na mowachuna mbende zawo,

moyabena mavuha yawo na mowakanhakanha fana ndiya ya kwambika,

fana nyama ya kwika muna inongo.

4 Lusita lokwiza mwizampula Mndewa Mulungu yamtazeni, mbali hezamwidikani.

Lusita ulwo kezamfisani chihanga chake kwa ichimu cha mbuli zihile zimutendile.

5 Mndewa Mulungu kolonga, "Walotezi wowagiza wanhu wangu,

waheng'higwa ndiya, wogong'onda tindiwalo,

mbali one haweng'higwe ndiya wowadumbiza wanhu kwa kulotela ng'hondo.

6 Kumwenu mweye walotezi kwizakuwa ichilo chilibule malaguso,

kwizakuwa ziza kumwenu kwilibule magubulo.

Zuwa dizakuswa kumwenu, imisi kwizakuwa fana ichilo.

7 Walotezi wezapata chinyala,

watowabao wezakugwa chinyala,

wose wezagubika vihanga vawo,

kwaviya Mulungu hezawedika mbuli yoyose."

8 Mbali niye nimemezigwa nguvu,

ning'higwa nguvu na Muhe wa Mndewa Mulungu,

ning'higwa udahi wa kuhumiza voilondeka,

niwagong'ondele welesi wa Yakobo uhasanyi wawo,

niwalongele Waisilaili ubananzi wawo.

9 Mweye walangulizi wa welesi wa Yakobo, tegelezeni mbuli ino,

tegelezeni mweye walangulizi wa wanhu wa Isilaili,

mokwihila kuhumiza voilondeka na mogalula mbuli inogile kuwa ihile.

10 Mozenga bululu da Sayuni kwa kukoma,

mozenga Yelusalemu kwa wihi.

11 Walangulizi wohumiza kwa lushwa,

na wakulu wa nhambiko wofundiza kwa kulihigwa,

na walotezi wolotela kwa hela.

Waja wogesa womuhuwila Mulungu kuno wolonga,

"Mndewa Mulungu kahamwe na cheye.

Habule mbuli ihile yondaichipate."

12 Lelo kwa ichimu chenu,

bululu da Sayuni dizalimigwa fana mgunda,

na bululu da Yelusalemu dizakuwa matongo,

na mulima wa kaye ya Mulungu wizakuwa mbago.