1 Nizakwima hanhu hangu ha kusungulila.

Nizakala kuna dilingo.

Nizakwima muladi nilole mbuli yondayanilongele Mndewa Mulungu,

na viya vondayedike kusonhela kulongelela kwangu.

2 Maabaho Mndewa Mulungu kanidika na kalonga,

"Yandika mbuli zino zonikulagusa.

Uzandike vinogile muna ivibawo,

muladi munhu yadahe kusoma vinogile.

3 Malaguso yano yogozela lusita lupangigwe,

malaguso ya kweli kusonhela uhelelo.

Yahakalama uyagozele,

kweli yezafika bila kukalama.

4 Niye Mndewa Mulungu, nowalema wanhu weli na magoda.

Mbali wanhu wotenda mbuli zinogile wezakala kwa kumuhuwila Mulungu.

5 Divai yokwagiza,

munhu yeli na magoda hahumula,

kana nzala ya kumela wanhu fana kuzimu,

fana viya ifa viili haiguta chinhu.

Koduganya zisi zose kuwa zake,

na wanhu wose kuwa wake.

6 Chila munhu kezamwehula munhu yalingile ivo,

na kezamtungila mbuli za kumwehula,

‘Kwizagaya weye uimemezela vinhu vili siyo vako,

na kusola lehani vinhu va wanhu, mbali hubweleza.

Vino kwizagendelela kutenda ivo mbaka zuwaki?’

7 Siku dimwe wanhu wakwazime wezakwizila kwa kusinhukila,

waja wokugudemeza wezalamka.

Maabaho kwizakuwa mateka wawo.

8 Weye kuziteka zisi nyingi,

mbali wanhu wondawasigale wezakuhoka weye,

kwaviya kumkoma munhu,

na kubananga mabululu na wanhu wose wokala umo.

9 Kwizagaya weye upata vinhu vingi kwa kubamanya.

Kuzenga kaye inogile ng'hani muladi wike goya vinhu vako.

10 Kwaviya kuilunga kuwananga wanhu wamwenga,

kuluguma chinyala lukolo lwako,

na weye mwenyewo kwizakomigwa.

11 Mabwe na mibiki vizalila,

na mapalo yezailumba nawo.

12 Kwizagaya weye uzenga bululu kwa kukoma,

kozenga mabululu kwa mbuli zihile.

13 Mndewa Mulungu Yeli na Udahi kotenda nguvu za wanhu zage muna umoto,

na wanhu wa zisi zimwenga wasang'hane bule.

14 Ukulu wa Mndewa Mulungu wokwenela muna izisi zose,

fana viya mazi viyenela muna ibahali.

15 Kwizagaya weye uwang'wiza upele wakaya wayago,

iviya kowatenda wakoligwe kwa divai,

muladi uwawone wahakala ukengele.

16 Kwizapata chinyala badala ya hishima,

kwizakung'wa upele mbaka kwizalagusa maungo yako yamateke.

Nhungo ya nhaguso ilawa muna umkono wa kulume wa Mndewa Mulungu yokwizila,

chinyala chizaigubika hishima yako.

17 Mbuli za usede ziutendile Lebanoni zizakubwelela weye.

Ubananzi uuwatendele wanyama wizakutenda udumbe.

Mbuli izo zose zizakupata weye kwa ichimu cha ukomaji na magayo youtendile muna iisi,

vouyatendele mabululu na wanhu wose wokala umo.

18 Vino nyang'hiti za kutambikila zoyazisongole zofaya choni?

Nyang'hiti ya mabwe ya kulumbuzuka,

chinhu cha kupwililisa uvwizi.

Munhu yosongola nyang'hiti kohuwila nyang'hiti yoyaisongole,

na nyang'hiti haidaha kulonga.

19 Kezagaya munhu yodilongela gogo, ‘Lamka!’

Hebu yodilongela dibwe hadilonga, ‘Segela!’

Vino vinhu ivo vodaha kumfundiza munhu?

Lola ihakigwa zahabu na hela,

na yabule ugima.

20 Mbali Mndewa Mulungu kamuna ikaye yake yelile,

zisi zose zikale hupi kuulongozi wake."