1 Muna isiku ya malongo maidi na imwe ya mwezi wesaba, Mndewa Mulungu kamwing'ha mulotezi Hagai usenga umwenga, kalonga, 2 "Longa na Zelubabeli mwana wa Shealitieli yeli mtawala wa Yuda na mkulu wa nhambiko digogogo Yoshua mwana wa Yehosadaki na wanhu wose wabwelile kulawa kuuhami, uwalongele, 3 ‘Yelihi vimwili yokumbuka kaye ino viikalile yogesigwa baho umwaka? Sambi moiwona yavilihi? Kweli moiwona haifaya chochose. 4 Mbali sambi uigangamize, weye Zelubabeli. Uwe galu weye mkulu wa nhambiko digogogo Yoshua mwana wa Yehosadaki, igangamizeni mweye wanhu wose wa isi ino, sang'haneni sang'hano kwaviya niye Mndewa Mulungu Nili na Udahi nahamwe na mweye. 5 Vimulawile Misili nimulaganilani kuwa nizakuwa hamwe na mweye siku zose. Sambi ning'hali hamwe na mweye, ivo sekemudumbe chinhu chochose.’

6 "Mndewa Mulungu Yeli na Udahi kolonga, ‘Lusita ludodo lukwiza nizautingisa ulanga na zisi zose na bahali na isi inyalile.’ 7 Mndewa Mulungu Yeli na Udahi kolonga, ‘Nizatingisa zisi zose na vinhu vawo vose vizagaligwa muna ikaye yangu. Nizaitenda kaye ino ihishimigwe.’ 8 Mndewa Mulungu Yeli na Udahi kolonga, ‘Hela na zahabu vose vangu. 9 Kaye ino izahishimigwa kufosa kaye ija ya umwaka. Hano nizaweng'ha tindiwalo wanhu wangu.’ "

10 Muna isiku ya malongo maidi na nne ya mwezi wa kenda, muna umwaka wekaidi wa utawala wa Dalio, Mndewa Mulungu Yeli na Udahi kamulongela mulotezi Hagai, 11 "Mndewa Mulungu Yeli na Udahi kolonga, ‘Wauze wakulu wa nhambiko malagilizo viyolonga. 12 One munhu yahapapa nyama ikigwe hakwe muna imhindo ya walo jake, maabaho mhindo iyo idalisa gate hebu msuzi hebu divai hebu mavuta hebu ndiya imwenga, vino vinhu ivo vizakuwa vikigwa hakwe?’ " Wakulu wa nhambiko wedika, "Siyo ivo." 13 Maabaho Hagai kawauza kaidi, "Vino munhu yambule mwiko kwa kudalisa mtufi, yahadalisa chinhu chimwe muna ivinhu vino, chizakuwa chambula mwiko?" Wakulu wa nhambiko wamwidika, "Ona, chizakuwa chambula mwiko."

14 Maabaho mulotezi Hagai kalonga, "Wanhu wa isi ino wokuwa fana vinhu ivo haulongozi wa Mndewa Mulungu, chila chinhu chiwotenda na vinhu vowolava kuna ulupango vambula mwiko."

15 Mndewa Mulungu kolonga, "Lelo geseni ng'hani mbuli zondazilawilile. Vimukalile mung'hali hamunakwandusa kuzenga kaye ya Mndewa Mulungu, mukalaze? 16 Munhu yahafika muna dibugulu da ngano kuno kogesa kezapata vipimo malongo maidi, mbali kukala na vipimo longo muhala. Munhu yahafika kuna inongo ya divai kuno kogesa kumemeza nongo malongo matano, mbali kukala na nongo malongo maidi muhala. 17 Vinhu venu vose vomuhandile nivibananga kwa kuvinyaza na kuving'ha utamu na kwa kugala mvula ya mabwe, mbali hamunibwelele." Mndewa Mulungu kolonga ivo. 18 "Sambi geseni vinogile mbuli zondazilawilile. Diyelo siku ya malongo maidi na nne ya mwezi wa kenda, siku iyo chandusilo cha Kaye ya Mndewa Mulungu chikomelezeka kuzenga. Lelo geseni vinogile. 19 Vino muna didungu musigala mbeyu yoyose? Hamusigale ngano hebu mizabibu hebu nhini hebu makomamanga hebu mizaituni. Mbali kwandusila diyelo nizamtemelani mate."

20 Mbuli ya Mndewa Mulungu imwizila kaidi Hagai muna isiku ya malongo maidi na nne ya mwezi wa kenda. 21 Ilonga, "Mulongele Zelubabeli mtawala wa Yuda kuwa nizatingisa ulanga na isi. 22 Nizasegeza vigoda va chifalume va wafalume wa zisi zimwenga. Nizahindula matololi yawo ya kubululigwa na falasi na wakwelafalasi wawo. Falasi na wakwelafalasi wezakugwa na kuikoma wawo kwa wawo kwa zele. 23 Mndewa Mulungu Yeli na Udahi kolonga, ‘Siku iyo nizakusola weye Zelubabeli mwana wa Shealitieli, nizakutenda fana mhete yangu ya utawala, kwaviya nikusagula.’ "