1 Muna umwezi wenane, mwaka wekaidi wa utawala wa mfalume Dalio, mbuli ya Mndewa Mulungu imwizila mulotezi Zekalia mwana wa Belekia, mzukulu wa Ido. Ilonga, 2 "Mndewa Mulungu kawawonela ludoko ng'hani wasaho zenu. 3 Ivo uwalongele wanhu kuwa Mndewa Mulungu Yeli na Udahi kolonga, one muhanibwelela, nizambwelelani. 4 Sekemuwe fana wasaho zenu, waja walotezi walongole wawalongela Mndewa Mulungu Yeli na Udahi kolonga, ‘Hindukeni muzileke nzila zenu zihile na sang'hano zenu zihile.’ Mbali hawanitegeleze na hawazindilile chiya chinilongile. 5 Vino wasaho zenu wakulihi? Vino walotezi wezakuwa wagima siku zose? 6 Mbuli zangu na ndagilizi zangu zoniwalagilize wasang'hani wangu walotezi, zifikizigwa kwa wasaho zenu. Maabaho waleka uhasanyi wawo na walonga, ‘Mndewa Mulungu Yeli na Udahi kachitenda viya voilondeka kwa ichimu cha uhasanyi wetu na sang'hano zetu fana viyailungile kutenda.’ "

7 Muna isiku ya malongo maidi na nne ya mwezi wa longo na umwe, niuwo mwezi utangigwe Shebati, mwaka wekaidi wa utawala wa Dalio, mbuli ya Mndewa Mulungu imwizila mulotezi Zekalia mwana wa Belekia, mzukulu wa Ido. Ilonga ivo. 8 Ichilo niwona munhu kakwela falasi mdung'hu. Munhu iyo kakala kema hagati ya mibiki itangigwa mihadasi ikalile kuna dibawe. Kuchisogo chake kukala na falasi wamwenga wadung'hu na wa langi ya ivu na wazelu. 9 Maabaho nimuuza msenga iyo, "Mwenevale, falasi wano wana fambulo jaki?" Msenga iyo wa Mndewa Mulungu yalongile na niye kanilongela, "Nizakulagusila waja falasi wana fambulo jaki." 10 Maabaho munhu iyo yemile hagati ya mibiki itangigwa mihadasi kalonga, "Wawo watumigwa na Mndewa Mulungu wahite kuna izisi zose." 11 Wawo wamulongela msenga iyo wa Mndewa Mulungu yemile hagati ya mibiki itangigwa mihadasi, "Chilolesa zisi zose, kweli zikala na tindiwalo."

12 Maabaho msenga wa Mndewa Mulungu kalonga, "Weye Mndewa Mulungu Uli na Udahi, mbaka zuwaki kwizalema kuwawonela ubazi wanhu wa Yelusalemu na mabululu yano ya Yuda youyawonele ludoko kwa miyaka malongo saba?" 13 Ivo Mndewa Mulungu kamwidika msenga yalongile na niye kwa mbuli zinogile na kwa mbuli za kuguma moyo. 14 Maabaho msenga iyo yalongile na niye kanilongela, "Gong'onda kuwa Mndewa Mulungu Yeli na Udahi kolonga, ‘Nina wivu ng'hani kwa ichimu cha Yelusalemu na Sayuni. 15 Niye nizaziwonela ludoko ng'hani zisi zimwenga zili na tindiwalo. Niwawonela ludoko chidogo Waisilaili, mbali wanhu wa zisi zimwenga waiyoha kuwananga.’ " 16 Mndewa Mulungu Yeli na Udahi kolonga, "Nodibwelela bululu da Yelusalemu kwa ubazi na kaye yangu izazengigwa umo. Wezakwandusa kudizenga kaidi bululu da Yelusalemu."

17 Maabaho msenga iyo kanilongela, "Guta na ulonge, ‘Mndewa Mulungu Yeli na Udahi kolonga, "Mabululu yangu yezamema mbuli zinogile muhala. Niye Mndewa Mulungu nizawagangamiza kaidi wanhu wa Sayuni, iviya nizasagula bululu da Yelusalemu kuwa bululu jangu." ’ "

18 Maabaho nilola, niwona mhembe nne.

19 Nimuuza msenga ija yalongile na niye, "Chino choni?" Nayo kanidika, "Zino niizo mhembe zowazipwililise wanhu wa Yuda na Isilaili na Yelusalemu." 20 Maabaho Mndewa Mulungu kanilagusila wahunzi wane. 21 Niuza, "Wano wokwiza kutenda choni?" Iyo kanidika, "Zino niizo mhembe zowazipwililise muladi munhu yoyose sekeyenule ditwi jake. Mbali wahunzi weza kuwadumbiza wanhu na wazasa hasi zimhembe zino za zisi zimwenga zozinule mhembe zawo kwa ichimu cha kuwapwililisa wanhu wa Yuda."