1 Usenga wa Mndewa Mulungu wosonhela isi ya Isilaili. Mndewa Mulungu yanzanze ulanga na yekile vandusilo va zisi zose na yaumbile mihe ya wanhu kolonga, 2 "Nizaitenda Yelusalemu kuwa fana nhungo ya divai, zisi zili habehi yake zizakung'wa na kuzazalika fana viya wanhu wakoligwe. Bululu da Yelusalemu na mabululu yose ya Yuda yezatowigwa. 3 Siku izo nizaitenda Yelusalemu kuwa fana dibwe dizamile kwa wanhu wose. Wanhu wondawadinule wezailumiza wenyewo. Wanhu wa zisi zose wezaditowa bululu ijo. 4 Niye Mndewa Mulungu nolonga ivo. Muna isiku iyo nizamguma ludumbo chila falasi na mkwelafalasi wake nizamtenda kuwa mtachichala. Nizawatula yameso falasi wa zisi zimwenga, mbali kabila da Yuda nizadikaliza. 5 Maabaho watawala wa Yuda wezalonga muna imizoyo yawo, ‘Wanhu wa Yelusalemu wana nguvu kwaviya Mndewa Mulungu Yeli na Udahi niiyo Mulungu wawo.’

6 "Muna isiku iyo nizawatenda watawala wa Yuda wawe fana moto ukwaka muna dibugulu da ngodi, fana viwenge vikwaka muna yamakinza ya ngano. Wezawananga wanhu wa banzi zose. Mbali bululu da Yelusalemu dizasigala na tindiwalo.

7 "Niye Mndewa Mulungu nizawalopola welesi wa Yuda teng'hu, muladi hishima ya welesi wa Daudi na hishima ya wakaya wa Yelusalemu sekeiwe ng'hulu kufosa Yuda. 8 Siku iyo niye Mndewa Mulungu nizawakaliza wakaya wa Yelusalemu, muladi weli nyondenyonde wawe na nguvu fana mfalume Daudi. Na welesi wa Daudi wezakuwa fana Mulungu. Wezakuwa fana msenga wa Mndewa Mulungu yowalongolela. 9 Siku iyo nizananga zisi zose ziditowa bululu da Yelusalemu."

10 Maabaho nizawamemeza wanhu wa kaye ya Daudi na wakaya wa bululu da Yelusalemu muhe wa ubazi na kupula. Nawo wezamulola iyo yowamuhomile na iviya wezamulilila fana viya munhu viyomulilila mwanage nyachende. Iviya wezawona usungu kwa ichimu chake fana viya munhu viyowona usungu kwa ichimu cha mwanage wa udele. 11 Siku iyo kwizakuwa na ndilo ng'hulu uko Yelusalemu. Fana ndilo ya uko Hadadi Limoni muna dibawe da Megido. 12 Wanhu wa isi wezalila, chila lukolo wezalila waidumwe. Lukolo lwa kaye ya Daudi wezalila waidumwe na wake zawo wezalila waidumwe. Iviya lukolo lwa kaye ya Nasani wezalila waidumwe na wake zawo wezalila waidumwe. 13 Lukolo lwa Lawi wezalila waidumwe na wake zawo waidumwe. Iviya lukolo lwa Shimei wezalila waidumwe na wake zawo waidumwe. 14 Ng'holo zose zisigale wezalila waidumwe na wake zawo wezalila waidumwe.