1 Weye Lebanoni, fungula nyivi zako,

muladi moto uinange mibiki yako ya mielezi.

2 Ugute nyangi weye mbiki wa msonobali,

kwaviya mibiki iyo inogile ya mielezi ilungula,

mibiki iyo inogile inangigwa.

Mweye miyaloni ya Bashani, mulile kwa giyogiyo,

kwaviya mbago ng'hulu isengigwa.

3 Tegeleza wadimi viwolila,

kwaviya ukulu wawo unangigwa.

Tegeleza mbumo wa wana simba,

kwaviya mbago ya lwanda lwa Yoludani inangigwa.

4 Mndewa Mulungu, Mulungu wangu, kolonga, "Didime bumbila dodiilungigwa kuchinjigwa. 5 Wagulaji wake wowachinja na wosegela bila kutagusigwa. Na waja wochuuza wolonga, ‘Mndewa Mulungu yatogolwe! Niye tajili.’ Wadimi wawo wenyewo hawawawonela ubazi." 6 Mndewa Mulungu kolonga, "Kwaviya sizawawonela ubazi kaidi wanhu wa isi ino, chila munhu nizamguma muna yamakono ya mkaya miyage na mfalume wake. Nawo wezaitenda vihile isi ino na niye sizamkombola munhu yoyose kulawa muna yamakono yawo." 7 Kwaviya nididima bumbila dilungiligwe kuchinjigwa na kuchuuzigwa. Maabaho nisola mabalati maidi, balati dimwe niditanga, "Unovu," na dimwenga niditanga "Kuilumba." Maabaho nihita kudima ng'hondolo. 8 Kwa lusita lwa mwezi umwe niwakoma wadimi watatu. Bumbila da ng'hondolo dinihila, niye nilegezwa najo. 9 Baho nilonga, "Sizakuwa mdimi wenu kaidi. Waleke waja wodanganika wadanganike na waja wonangigwa wanangigwe. Waja wasigale chila imwe yaje nyama ya miyage." 10 Nyamhisa balati jangu doniditangile, "Unovu," nidibena kulagusa kuwa lagano Mndewa Mulungu diyekile na wanhu wake dibenigwa. 11 Lagano ijo dibeneka siku iyo. Waja wogula ng'hondolo wakalile wonilola, wavimanya kuwa mbuli ya Mndewa Mulungu inifikila. 12 Niwalongela, "Muhawona vinoga, ning'heni yombe jangu, mbali muhawona havinogile, lekeni." Ivo wanilingila vihande malongo matatu va hela kuwa yombe jangu. 13 Maabaho Mndewa Mulungu kanilongela, "Dike yombe ijo dodo ng'hani muna ingama ya kaye yangu." Nisola vihande viya malongo matatu va hela, nimwasila munhu youmba nongo muna ikaye ya Mndewa Mulungu. 14 Maabaho nidibena balati jangu dekaidi ditangigwe, "Kuilumba," ivo niwagola Yuda na Isilaili.

15 Mndewa Mulungu kanilongela, "Sola kaidi vinhu va mdimi mbozi. 16 Kwaviya nizamgala mdimi yelibule ubazi kwa ng'hondolo yokwaga hebu halola goya wanang'hondolo hebu kuwahonya wolumwa hebu kuwadima wanenehe, mbali koja ng'hondolo wanenehe mbaka mapaga yawo.

17 "Kezagaya mdimi hafaya,

Yodileka bumbila,

zele dikanhe mkono wake,

na ziso jake da kulume ding'oligwe,

mkono wake uholole,

ziso jake da kulume sekedilole."