1 Muna isiku yekane ya mwezi wa kenda utangigwa Kisileu na mwaka wa nne wa utawala wa mfalume Dalio, mbuli ya Mndewa Mulungu imwizila Zekalia.

2 Wanhu wa bululu da Beseli wakala wawatuma Shaleza na Legemu Meleki hamwe na wanhu wawo muladi wampule Mndewa Mulungu yawatemele mate, 3 na wawauze walotezi na wakulu wa nhambiko wa kaye ya Mndewa Mulungu Yeli na Udahi, "Vino chigendelele kulila kwa giyogiyo na kufunga kuja muna umwezi wetano fana vichitendile kwa miyaka mingi?"

4 Maabaho mbuli ya Mndewa Mulungu Yeli na Udahi inizila, ilonga, 5 "Uwalongele wanhu wose wokala muna iisi na wakulu wa nhambiko, ‘Miyaka malongo saba ifosile mukala mufunga kuja na mulila kwa giyogiyo muna umwezi wetano na mwezi wesaba. Vino mugesa mufunga kuja kwa ichimu changu? 6 Vimuja na kung'wa, vino hamuja na kung'wa kwa ichimu chenu wenyewo? 7 Mbuli zino niizo ziyalongile Mndewa Mulungu kwa milomo ya walotezi wa umwaka, lusita ulo bululu da Yelusalemu na vibululu vake vikala na wanhu wengi, iviya isi ya Negebu na isi ya mabawe zikala na wanhu wengi.’ "

8 Mbuli ya Mndewa Mulungu imwizila Zekalia, ilonga, 9 "Mndewa Mulungu Yeli na Udahi kolonga, ‘Muhumize voilondeka, chila munhu yamuwonele ubazi ndugu yake na yamtendele mbuli zinogile. 10 Sekemuwagaze wakefilwa hebu wachiwa hebu nyambenyambe hebu ngayengaye. Iviya sekemuilunge kuwatendela mbuli zihile wanhu wamwenga.’ "

11 Mbali wawo walema kutegeleza na wabena mayega yawo na wasita magutwi yawo muladi sekewahulike. 12 Waitenda imizoyo yawo kuwa midala fana dibwe muladi sekewahulike malagilizo ya Mndewa Mulungu Yeli na Udahi yoyagong'onde kwa muhe wake kufosela walotezi walongole. Ivo Mndewa Mulungu Yeli na Udahi kawawonela ludoko ng'hani. 13 Iviya nihulika mbuli ya Mndewa Mulungu Yeli na Udahi ilonga, "Kwaviya viniwatangile hawanihulike, ivo nawo viwanitangile siwahulike. 14 Mbali niwamwaga kwa beho kulu muna izisi zose hawazimanyile. Ivo isi iwailekile isigala matongo, habule munhu yakalile umo. Isi iyo inogile isigala matongo."