1 Maabaho msenga wa Mndewa Mulungu kanilagusila mkulu wa nhambiko digogogo Yoshua kema haulongozi ha msenga wa Mndewa Mulungu. Nayo Shetani kema ubanzi wake wa kulume muladi yamulongeleze. 2 Maabaho Mndewa Mulungu kamulongela Shetani, "Niye nokuzuma weye Shetani. Niye niisagule Yelusalemu nokuzuma. Vino munhu iyo halingile fana lugodi lulavigwe muna umoto?"

3 Yoshua viyemile haulongozi wa msenga wa Mndewa Mulungu, kakala kaiyawala mawalo yafilile ng'hani.

4 Msenga iyo kawalongela waja wakalile wema haulongozi wake, "Mvuleni mawalo yake yafilile ng'hani." Maabaho kamulongela mkulu wa nhambiko digogogo Yoshua, "Niusegeza uhasanyi wako na nizakuyawaza mawalo ya bei ng'hulu." 5 Maabaho kawalongela, "Mvazeni chilemba chinogile mditwi jake." Baho wamvaza chilemba chinogile mditwi jake na wamuyawaza mawalo yamwenga kuno msenga iyo kema habehi. 6 Maabaho msenga wa Mndewa Mulungu kamzuma mkulu wa nhambiko digogogo Yoshua, kamulagiliza, 7 "Mndewa Mulungu Yeli na Udahi kolonga, ‘One uhatenda vonilonda na kuzindilila malagilizo yangu, kwizalola goya kaye yangu na luwa lwangu. Niye nizakulekelela wime haulongozi wangu fana wano wemile hano. 8 Tegeleza weye mkulu wa nhambiko digogogo Yoshua hamwe na wayago weli haulongozi wako. Wawo chilaguso cha mbuli zikwiza. Nohita kumgala msang'hani wangu yotangigwa Tawi. 9 Lola nika haulongozi wa Yoshua dibwe dili na vihanga saba. Nizachola maandiko muna idibwe na siku dimwe muhala nizausegeza uhasanyi wa isi ino. Kweli niye Mndewa Mulungu Nili na Udahi nilonga ivo. 10 Siku iyo chila munhu kezamgoneka mkaya miyage kudeng'helela tindiwalo na unhu goya muna ichizi chake cha mizabibu na hasi ya minhini yake. Niye Mndewa Mulungu Nili na Udahi nilonga ivo.’ "