1 Siku ya Mndewa Mulungu ya kutagusa yokwiza, ivo vinhu vose visoligwe kumwenu vizagoligwa kuno molola. 2 Mndewa Mulungu kezawaduganya wanhu wa zisi zimwenga kuditowa bululu da Yelusalemu. Bululu dizasoligwa na vinhu vili muna ikaye vizahokigwa. Iviya wezawabandama wanaake kwa kuwawangiliza. Nusu ya wanhu wa bululu wezalawa kuhita kuuhami. Mbali wanhu wondawasigale hawezasegezigwa muna dibululu. 3 Maabaho Mndewa Mulungu kezalawa na kuzitowa zisi fana viya viyotenda lusita lwa kuitowa ng'hondo. 4 Siku iyo magulu yake yezakwima muna umulima wa mizaituni uli ubanzi wa ulawilo wa zuwa wa Yelusalemu. Mulima uwo wizatuligwa banzi mbili na kolongo galamu dizalawilila ubanzi wa ulawilo wa zuwa mbaka ubanzi wa uswilo wa zuwa. Ubanzi umwe wizakuwa kasikazi na ubanzi umwenga wizakuwa kusi. 5 Mweye mwizakimbila kufosela kolongo ijo da kuludonho lwa milima midi ya Mndewa Mulungu dodifika Aseli. Mwizakimbila fana viya wasaho zenu viwakimbile gudemeko da isi lusita lwa utawala wa mfalume Uzia wa Yuda. Maabaho Mndewa Mulungu, Mulungu wangu kezakwiza hamwe na welile wose.

6 Siku iyo hakwizakuwa na bung'hulo hebu mbeho hebu nhungwe iganda. 7 Imisi izagendelela na hakwizakuwa na ziza. Mbali Mndewa Mulungu kovimanya vondailawilile. Hakwizakuwa imisi hebu ichilo. Kwaviya mbaka zuwa dahahonga dogendelela kwaka.

8 Siku iyo mazi yanogile yezalawa uko Yelusalemu. Ubanzi umwe wizahita kwiibahali ya ulawilo wa zuwa na ubanzi umwenga wizahita ubanzi wa bahali ya uswelo wa zuwa. Mazi yake yezagendelela kulawa lusita lwa zuwa kali na lusita lwa mvula.

9 Siku iyo Mndewa Mulungu niiyo yondayawe mfalume muhala muna izisi zose. Kezakuwa Mndewa Mulungu yaidumwe na zina jake dizakuwa zina da chiidumwe. 10 Isi yose kwandusila Geba uko kasikazi ya Yuda mbaka Limoni, kusi ya Yelusalemu izakuwa fana isi ya Alaba. Mbali Yelusalemu izasigala uchanyha hanhu hake kwandusila lwivi lukulu lwa Benyamini mbaka hanhu ha lwivi lukulu lwa umwaka mbaka kuna ulwivi lukulu lwa mumgwazo na kulawa kuna dilingo da Hananeli mbaka hana ihanhu ha mfalume ha kuhondela zabibu. 11 Bululu da Yelusalemu dizakaligwa na wanhu, kwaviya umo hamwizakuwa na duwilo kaidi da kunanga na wanhu wake wezakala vinogile.

12 Mbali kwa wanhu waja wezile kwiitowa na Yelusalemu uno niuwo utamu wondaugaligwe na Mndewa Mulungu, ng'huli zawo zizawola wang'hali wagima. Meso yawo yezawola yang'hali kuna yamazonzo yake. Milimi yawo izawola ing'hali muna imilomo yawo. 13 Siku iyo Mndewa Mulungu kezawatenda wanhu wadumbe ng'hani. Chila munhu kezamtowa miyage. 14 Wanhu wa Yuda wezaitowa ng'hondo na Yelusalemu. Utajili wa zisi zimwenga zili banzi zose za Yuda wizaiduganya. Wezaduganya zahabu nyingi na hela na mawalo. 15 Utamu fana uwo wizawapata falasi na wanyama walingile fana vihongwe na ngamiya na mhunda na wanyama wose wondawawe muna yamalago ya wehi.

16 Maabaho chila munhu yahonyokwe muna izisi zose zizile kwiitowa na Yelusalemu, kezakwiza mwaka kwa mwaka muladi kumtambikila mfalume, Mndewa Mulungu Yeli na Udahi na kuitendela chelekocheleko dugila da vibanda. 17 One wanhu wowose muna iisi yose hawahita Yelusalemu kumtambikila mfalume, Mndewa Mulungu Yeli na Udahi, mvula haizatonya muna iisi yawo. 18 One wanhu wa Misili hawezahita, iviya mvula haizatonya kumwawo. Mndewa Mulungu kezawatowa kwa utamu wa tauni, utamu uwo wizazitowa zisi zose waja hawahita muladi kutenda chelekocheleko kwa dugila da vibanda. 19 Ino izakuwa nhaguso ya Misili na nhaguso ya zisi zose ziya hazihita kuditendela chelekocheleko dugila da vibanda.

20 Siku iyo kuna zimbugi za falasi kwizakwandikigwa mbuli zino, "Vikigwa hakwe kwa Mndewa Mulungu." Nongo zili muna ikaye ya Mndewa Mulungu zizakuwa fana mahamha yoyokuwa kuulongozi wa lupango. 21 Chila nongo umo Yelusalemu na isi ya Yuda izakwikigwa hakwe kwa Mndewa Mulungu Yeli na Udahi, muladi wose wolava nhambiko wadahe kuzisang'hanila kwa kwambikila nyama ya nhambiko. Siku iyo hakwizakuwa na mchuuzi yoyose muna ikaye ya Mndewa Mulungu Yeli na Udahi.