1 Mbuli ya Mndewa Mulungu imwizila Malaki yawalongele Waisilaili.

2 Mndewa Mulungu kolonga, "Nimulondani ng'hani." Mbali mweye muniuza, "Kuchilonda vilihi? Vino Esau siyo ndugu yake Yakobo?" Mndewa Mulungu kolonga, "Nimsagula Yakobo, 3 mbali nimulema Esau na niitenda isi yake ya milima sekeiwe na chinhu, uhazi wake niweng'ha mbwizi wa kuichuwala." 4 Waedomu wodaha kulonga, "Ingawa mabululu yetu yanangigwa, chizazenga kaidi matongo yake." Mbali niye Mndewa Mulungu Nili na Udahi nolonga, "Wodaha kuizenga kaidi, mbali nizaibomola. Waedomu wezatangigwa, ‘Wanhu wa isi ihile, waja woyowawonela ludoko Mndewa Mulungu siku zose.’ " 5 Muhawona mbuli izo kwa meso yenu, mwizavimanya na iviya mwizalonga, "Ukulu wa Mndewa Mulungu womanyika mbaka kunze ya Isilaili."

6 Mndewa Mulungu Yeli na Udahi kolonga, "Mwana komuhishimu tati yake, msang'hani komuhishimu mwenevale wake. One niye niiyo tati yenu, habali hamunihishimu? One niye niiyo mwenevale wenu, habali molema kunidumba? Nomulongelani mweye wakulu wa nhambiko munizeha niye. Mbali mweye mouza, ‘Chikuzeha vilihi?’ 7 Munizeha kwa kunilavila ndiya haifaya muna ulupango lwangu. Mbali mweye mouza, ‘Chikuzeha vilihi?’ Kwa kulonga kuwa lupango lwa Mndewa Mulungu luzehigwa. 8 Muhanilavila nhambiko ya mnyama yatulike yameso hebu chilema hebu mtamu, vino uwo siyo wihi? Vino mtawala kezadeng'helelani hebu kezamtogolani?" Niye Mndewa Mulungu Nili na Udahi nolonga ivo. 9 Lelo mweye wakulu wa nhambiko mpuleni Mulungu muladi yachiwonele ubazi. One momulavila nhosa zilingile ivo, vino kweli kezamtemelani mate? 10 Mndewa Mulungu Yeli na Udahi kolonga, "Muhavu yahapatike munhu imwe vimwili, iyo yahahindile nyivi za kaye ya Mulungu muladi sekemukwache moto bila faida muna ulupango lwangu. Sinogeligwa na mweye na sizaitogola nhambiko yoyose yomunilavila. 11 Nizatogozigwa na wanhu wa zisi zose, kwandusila ubanzi wa ulawilo wa zuwa mbaka ubanzi wa uswelo wa zuwa. Chila hanhu wanifukizila ubani na wonilavila nhosa zozitogoligwa, kwaviya wonitogoza. 12 Mbali mweye moniliga kwa kulutenda lupango lwangu lwambule mwiko na moyehula ndiya ilavigwa umo. 13 Iviya molonga, ‘Mbuli zino zochilegeza ng'hani,’ na monizeha. Monigalila nhambiko za wanyama womubawile hebu weli vilema na watamu. Vino nihokele nhambiko zenu? Mndewa Mulungu Yeli na Udahi kolonga ivo. 14 Yaduwiligwe munhu yovwiza yeli na mnyama mulume muna dibumbila jake na yoilaha kumulava, mbali kamulavila Mndewa Mulungu Yeli na Udahi nhambiko ya mnyama yeli na chilema. Kwaviya niye mfalume mkulu, zina jangu dolondeka didumbigwe muna izisi zose."