1 Mndewa Mulungu Yeli na Udahi kowalongela wakulu wa nhambiko, "Mweye wakulu wa nhambiko nomulagilizani vino. 2 One hamunitegeleze na kunihishimu, nizamduwilani na vinhu vonimwing'hileni nizaviduwila. Kweli nividuwila vimala, kwaviya hamuilungile kuzindilila malagilizo yangu. 3 Nizawatagusa wanenu kwa ichimu cha wihi wenu na nizamuhakani muna ivihanga venu mavi ya wanyama wenu wa nhambiko. Nizamwasani hamwe na nhambiko za madugila yenu. 4 Ivo mwizavimanya kuwa nimwing'hani lagilizo dino muladi lagano jangu na welesi wa Lawi digendelele. Niye Mndewa Mulungu Nili na Udahi nolonga ivo. 5 Muna dilagano ijo niwalaganila ugima na tindiwalo na niweng'ha. Wawo walondeka kunitegeleza na wanitegeleza, wanidumba. 6 Malagilizo ya kweli yakala muna imilomo yawo, hawakalile wavwizi. Niye na wawo chikala kwa tindiwalo na voilondeka, iviya wawafundiza wanhu wamwenga sekewatende uhasanyi. 7 Wakulu wa nhambiko wolondeka wawafundize wanhu kuvimanya kweli ya Mulungu. Wanhu wagendelele kuifunza vonilonda kumwawo, kwaviya wakulu wa nhambiko ni wasenga wa Mndewa Mulungu Yeli na Udahi. 8 Mbali mweye wakulu wa nhambiko muhinduka na muleka kutenda voilondeka. Mafundizo yenu yawatenda wanhu wengi watende uhasanyi. Mubena lagano donitendile na Lawi. Niye Mndewa Mulungu Nili na Udahi nolonga ivo. 9 Nizamtendani mwehuligwe na musekigwe haulongozi ha wanhu wose, kwaviya hamunisondelele niye, mbali muwabagula wanhu muna ukuhumiza."

10 Vino cheye chose siyo wana wa tata imwe? Vino hachilumbigwe na Mulungu imwe? Lelo habali choibiduka cheye kwa cheye na chodizeha lagano doyatendile Mndewa Mulungu na wasaho zetu? 11 Wanhu wa Yuda haweli waminika kwa Mulungu na watenda mbuli za kutibusa muna iisi ya Isilaili na muna dibululu da Yelusalemu. Waizeha kaye ya Mndewa Mulungu iyoilonda. Iviya wawasola wanaake wotambikila milungu ya chigeni. 12 Mndewa Mulungu yawasegeze kutali wanhu wotenda mbuli izo muna uwelesi wa Yakobo. Iviya sekewaihanganye na wayawo wolava nhambiko kwa Mndewa Mulungu Yeli na Udahi. 13 Iviya molugubika lupango lwa Mndewa Mulungu kwa masozi yenu kuno molila na kuwa na giyogiyo kwaviya yeye hazitogola nhosa zomumulavila. 14 Mweye mouza, "Habali hazitogoligwa?" Mndewa Mulungu hazitogola kwaviya kavimanya kuwa kubena chilagano choumwikile muke umsolile ung'hali mbwanga. Huwile mwaminika kumwake ingawa kwika chilagano haulongozi wa Mulungu kuwa uhawile mwaminika kumwake. 15 Vino Mulungu hamtendileni mweye waidi muwe lukuli lumwe na muhe umwe? Vino kailunga choni viyatendile ivo? Kailunga cheleke wana wondawamtambikile yeye. Ivo chila mulume yawe mwaminika kwa muke wake iyamsolile yang'hali mbwanga. 16 Mndewa Mulungu, Mulungu wa Isilaili kolonga, "Nokwihila nyasa na nokwihila mulume yomtendela mbuli za usede muke wake. Ivo muiteganye sekemuleke kuwa waminika kwa wake zenu. Niye Mndewa Mulungu Nili na Udahi nolonga ivo."

17 Mumulegeza Mndewa Mulungu kwa mbuli zenu hazifaya. Mbali molonga, "Chimulegeza vilihi?" Mumulegeza kwa kulonga, "Chila munhu yotenda mbuli zihile kanoga haulongozi wa Mndewa Mulungu na kowadeng'helela." Hebu kwa kuuza, "Mulungu yotenda voilondeka kakulihi?"