1 Mndewa Mulungu Yeli na Udahi kolonga, "Lola nomtuma msenga wangu yanilongolele kunisasalila nzila kuulongozi wangu. Mndewa yomumzahila kezaizila kaye yake kwa kusinhukiza. Loleni ija imsenga wa lagano imumdeng'helela kokwiza."

2 Vino yelihi yondayafunye umoyo siku iyo vondayeze? Lelo yelihi yondayeme vondayalawlile yeye? Kwaviya yeye kalinga fana moto wa munhu yosunha hela, kalinga fana sabuni ya munhu yofuwa mawalo. 3 Kezakala fana munhu yosunha hela na kuitenda iwe nzelu chwee. Nayo kezawasafya wana wa Lawi na kuwatenda wele fana viya zahabu na hela. Nawo wezamulavila Mndewa Mulungu nhosa zozitogoligwa. 4 Ivo nhosa za wanhu wa Yuda na nhosa za Yelusalemu zizatogoleka na Mndewa Mulungu fana vizitogoleke umwaka. 5 Mndewa Mulungu Yeli na Udahi kolonga, "Nizamkwenhukilani na kumtagusani. Sizadumba kuwalavila usindila wahawi na wazinzi na waja woilaha kwa uvwizi na waja wowabamanya wasang'hani na wowawonela wakefilwa na wachiwa na waja wowema nyambenyambe haki zawo, mbali hawanidumba niye."

6 Niye Mndewa Mulungu sigaluka, lekamana mweye welesi wa Yakobo hamunangigwe.

7 Kwandusila siku za wasaho zenu muhinduka ubanzi, muyaleka malagilizo yangu na hamuyazindilile. Ivo niye Mndewa Mulungu, Nili na Udahi nolonga, "Nibweleleni na niye nizambwelelani."

Mbali mweye mouza, "Chizakubwelele vilihi?"

8 Vino munhu kodaha kumbawila Mulungu? Mbali mweye monibawila niye. Maabaho mouza, "Chokubawila vilihi?" Monibawila zaka na nhosa. 9 Mweye na isi ino yose muduwiligwa kwaviya monibawila. 10 "Galeni zaka zose muna didungu jangu, muladi muna ikaye yangu muwe na ndiya ya kufaya. Munigeze kwa mbuli ino muladi muwone one sizavugula ulanga kumgalilani mvula na kumtemelani mate ng'hani, mbaka mswele dungu da kwika. Niye Mndewa Mulungu Nili na Udahi nolonga ivo. 11 Nizawagomesa wang'onyo sekewabanange kaidi vinhu venu vimuhandile. Mizabibu yenu haizalagaza ng'hoga. Niye Mndewa Mulungu Nili na Udahi nolonga ivo. 12 Wanhu wa zisi zose wezamtangani mweye, ‘Wanhu watemeligwe mate,’ kwaviya isi yenu izakuwa isi ya deng'ho ng'hani. Niye Mndewa Mulungu Nili na Udahi nolonga ivo."

13 Mndewa Mulungu kolonga, "Munilonga vihile." Mbali muuza,

"Chikulonga vihile vilihi?" 14 Mweye mulonga, "Kumsang'hanila Mulungu hakufaya chinhu. Vino kuzindilila malagilizo ya Mndewa Mulungu kofaya choni? Hebu kugeza kumulagusa kuwa chihasanya haulongozi wake kwa kugenda fana wanhu wolila kwa giyogiyo? 15 Mbali sambi waja weli na magoda wotemeligwa mate. Kweli wanhu wotenda mbuli zihile wokala goya. Iviya womgeza Mndewa Mulungu na hawatagusigwa."

16 Mbali wanhu waja womdumba yeye walonganya, nayo Mndewa Mulungu kategeleza na kahulika. Chitabu cha lukumbuso chandikigwa haulongozi wake kusonhela waja womdumba Mndewa Mulungu na kudihishimu zina jake.

17 Mndewa Mulungu Yeli na Udahi kolonga, "Wawo wezakuwa wanhu wangu. Wezakuwa ngama yangu. Nizawawonela ubazi fana viya tata viyomuwonela ubazi mwanage yomsang'hanila. 18 Baho mwizavimanya kaidi mbasakanyo ya munhu yotenda mbuli zinogile na munhu yotenda mbuli zihile, iviya mwizavimanya mbasakanyo ya munhu yomsang'hanila Mulungu na munhu hamsang'hanila Mulungu."