1 Maabaho muna yamalaguso yangu, kuulongozi wangu k ukala na munhu yamhile luzabi lwa kulingila.

2 Nimuuza, "Weye kohita kulihi?" Kanidika, "Nohita kudilinga bululu da Yelusalemu utali na ugalamu."

3 Msenga ija yakalile yolonga na niye kasegela, maabaho msenga imwenga keza kuiting'hana nayo.

4 Lelo msenga iyo yakalile yolonga na niye kamulongela miyage, "Kimbila ukamulongele mbwanga ija kuwa Yelusalemu dizakuwa bululu dilibule ng'huta, kwaviya umo wanhu wezakuwa wengi na mifugo izakuwa mingi. 5 Mndewa Mulungu kolonga kuwa yeye mwenyewo kezakuwa ng'huta ya moto kudikaliza bululu ijo banzi zose. Kwaviya kezakala umo, bululu ijo dizakuwa na ukulu mgati yake."

6 Mndewa Mulungu kolonga, "Izoni! Izoni! Kimbileni mulawe muna iisi ya kasikazi. Kwaviya nimgolani chila ubanzi fana beho vodihita kuna zibanzi nne za isi. 7 Izoni mweye mukala isi ya Babeli, mukimbilile Sayuni." 8 Viyamalile kunituma kwa ukulu kuhita kuna izisi zimtekileni mweye, Mndewa Mulungu Yeli na Udahi kalonga, "Munhu yoyose yomdalisani mweye, kodalisa mwana wa ziso jangu. 9 Kweli nizawinula mkono wangu kuwatagusa na watumwa wawo wezawateka. Baho mwizavimanya kuwa Mndewa Mulungu Yeli na Udahi niiyo yanitumile."

10 Mndewa Mulungu kolonga, "Guteni nyangi na mudeng'helele mweye wanhu wa Sayuni, kwaviya nokwiza na nizakala hamwe na mweye. 11 Zisi nyingi zizailumba na Mndewa Mulungu siku iyo, nawo wezakuwa wanhu wangu. Niye nizakala hamwe na mweye." Baho mwizavimanya kuwa Mndewa Mulungu Yeli na Udahi kanituma kumwenu. 12 Mndewa Mulungu kezaihazi isi ya Yuda, muladi iwe hanhu hake muna iisi yelile. Nayo kezadisagula kaidi bululu da Yelusalemu kuwa jake. 13 Nyamaleni mweye wanhu wose mwili haulongozi wa Mndewa Mulungu, kwaviya kokwiza kulawa muna ikaye yake yelile.