1 Niwona malaguso yamwenga. Niwona matololi mane ya kubululigwa na falasi yolawa hagati ya milima midi ya shaba. 2 Tololi da mwanduso dibululigwa na falasi wadung'hu, tololi dekaidi dibululigwa na falasi watitu. 3 Tololi deketatu dibululigwa na falasi wazelu, tololi dekane dibululigwa na falasi weli na mawolawola wa langi ya ivu. 4 Maabaho nimuuza msenga ija yalongile na niye, "Mwenevale, matololi yano ya kubululigwa na falasi yana fambulo jaki?" 5 Msenga ija kanidika, "Matololi yano ni beho kulawa banzi nne za isi. Yakala kuulongozi wa Mndewa yotawala zisi zose, lelo yosegela. 6 Tololi diya da kubululigwa na falasi watitu dohita ubanzi wa kasikazi, tololi diya dibululigwa na falasi wazelu dohohita ubanzi wa uswelo wa zuwa, tololi diya dibululigwa na falasi wa langi ya ivu dohita ubanzi wa kusi. 7 Falasi wawo viwalawilile wakala na hamu ya kulola zisi zose." Msenga iyo kawalongela, "Hiteni mukalole zisi zose." Ivo wahita kuna izisi zose. 8 Maabaho msenga iyo yalongile na niye kalandula dizi, kanilongela, "Falasi waja wahitile ubanzi wa kasikazi wahoza muhe wangu muna iisi ili ubanzi wa kasikazi."

9 Mbuli ya Mndewa Mulungu inizila, ilonga, 10 "Hokela vitumetume vilawa kwa Helidai na Tobia na Yedaya weli kuuhami uko Babeli. Siku iyo iyo uhite kuna ikaye ya Yosia mwana wa Sefania. 11 Sola hela na zahabu iyo, utende kombelo na umvaze mkulu wa nhambiko digogogo Yoshua mwana wa Yehosadaki, 12 na umulongele kuwa Mndewa Mulungu Yeli na Udahi kolonga, ‘Hano hana munhu kotangigwa Tambi, iyo kezasuka hanhu hake na kuizenga kaye ya Mndewa Mulungu. 13 Iyo niiyo yondayazenge kaye ya Mndewa Mulungu. Kezakwing'higwa hishima ya chifalume na kezakala kuna ichigoda chake cha chifalume. Iviya kwizakuwa na mkulu wa nhambiko yondayakale nayo muna ichigoda cha chifalume, nawo waidi wezatenda usang'hano hamwe kwa tindiwalo.’ 14 Kombelo ijo dizakalizwa muna ikaye ya Mndewa Mulungu muladi kuwakumbuka Helidai na Tobia na Yedaya na Heni mwana wa Sefania. 15 Wanhu wokala kuna izisi zili kutali wezakwiza kutaza kuizenga kaye ya Mndewa Mulungu. Baho mwizavimanya kuwa Mndewa Mulungu Yeli na Udahi niiyo yanitumile kumwenu. Mbuli izo zizalawilila one muhazindilila mbuli ya Mndewa Mulungu, Mulungu wenu."