1 Mbuli ya Mndewa Mulungu ilongigwe kusonhela isi ya Hadulaki na bululu da Damasiki.

Baho hezakuwa hanhu hake ha kukala goya.

Kwaviya Mndewa Mulungu kowalola wanhu wose na makabila yose ya Isilaili.

2 Iviya kowalola wanhu wa bululu da Hamasi dodihakana na Hadulaki

na mbaka mabululu ya Tilo na Sidoni,

ingawa wakala wabala ng'hani.

3 Wanhu wa Tilo waizengela mhongono

na waiduganyila hela fana msanga

na zahabu fana viya timbwisi muna dikulugumbi.

4 Mbali Mndewa kezawasegezela vinhu vawo,

nayo kezautowa udahi wawo uweli nawo muna ibahali,

nawo wezanangigwa kwa moto.

5 Wanhu wa Ashikeloni wezaziwona mbuli zino na wezadumba,

wanhu wa Gaza iviya wezakwingila luholozi ng'hani.

Wanhu wa Ekiloni wezadumba,

kwaviya huwilo jawo dizakwaga.

Mfalume wa Gaza kezanangigwa,

bululu da Ashikeloni hadizakuwa na wanhu.

6 Bululu da Ashidodi dizakaligwa na nyambenyambe,

na niye Mndewa Mulungu nizasegeza magoda ya Wafilisiti.

7 Nizawatenda waleke kuja nyama mbisi na ndiya ya kutibusa.

Wanhu wondawasigale wezakuwa wangu,

wezakuwa fana lukolo lumwe muna iisi ya Yuda.

Wanhu wa Ekiloni wezakuwa fana Wayebusi.

8 Niye mwenyewo nizaikaliza isi yangu,

na nizagomesa mabumbila ya wehi sekeyafose umo,

Habule munhu yondayawagaze kaidi wanhu wangu,

kwaviya nizawalola.

9 Mutowe ng'henze ng'hani mweye wanhu wa Sayuni,

Landuleni madizi, mweye wanhu wa Yelusalemu.

Loleni mfalume wenu kokwiza kumwenu.

Kohumiza voilondeka na kokombola.

Mnyendanyenda na kakwela mhunda.

Kakwela mwana mhunda.

10 Kezasegeza matololi ya kubululigwa na falasi muna iisi ya Efulaimu na falasi wa ng'hondo kulawa Yelusalemu,

mhinde za ng'hondo zizakwasigwa kutali.

Iyo kezagala tindiwalo muna izisi.

Kezatawala kulawa bahali mbaka bahali,

kezatawala kulawa lwanda lwa Efulate mbaka uhelelo wa zisi zose.

11 Mndewa Mulungu kolonga, "Kwa ichimu cha lagano jangu ditendigwe kwa damu,

nizawalopola wafungwa wenu wakalile wafungigwa muna dikombo dilibule mazi.

12 Mweye wafungwa muli na uhuwilo,

bweleni muna zimhongono za bululu jenu,

niye nomgong'ondelani,

nizambwelezelani mbuli zinogile miyanza midi.

13 Yuda nizamsang'hanila fana viya mhinde yangu,

Efulaimu nizamtenda msale wangu.

Weye Sayuni wanhu wako nizawasang'hanila fana viya zele da galu,

kwa kuwatowa wanhu wokala uko Uyunani."

14 Mndewa Mulungu kezawalawilila wanhu wake,

msale wake wizalawa fana lumwemwe.

Mndewa Mulungu kezatowa mhalati,

kezagenda muna divulavumbi da ubanzi wa kusi.

15 Mndewa Mulungu Yeli na Udahi kezawakaliza wanhu wake.

Iviya wezawananga wehi wawo wosang'hanila ng'humbwewe.

Wezaguta nyangi muna ing'hondo fana wanhu wakoligwe, wezaitila damu ya wehi wawo,

fana damu ihakigwe hana yamahembe ya lupango kulawa muna dihamha.

16 Lusita ulwo Mndewa Mulungu, Mulungu wawo kezawakombola,

kwaviya wawo ni bumbila jake,

ivo wezatelela muna iisi yake,

fana mabwe ya hela nyingi.

17 Lola unovu wawo viuli mwingi,

lola viwatelele ng'hani.

Wandele na wabwanga wotelela,

kwa ichimu cha ngano na divai ya sambi.