1 Siku iyo kwizalawilila nzasa ya kuwasafya uhasanyi na kuwasafya wanhu wambule mwiko wa welesi wa Daudi na wanhu wose wokala Yelusalemu. 2 Mndewa Mulungu Yeli na Udahi kolonga, "Siku iyo nizasegeza mazina ya nyang'hiti za milungu muna iisi na hayezakumbukigwa kaidi. Iviya wanhu woigoda kuwa walotezi, nizawasegeza hamwe na muhe wa kutenda mbuli zihile. 3 Munhu yoyose yahaigoda kuwa yeye mulotezi, tati yake na mami yake wamweleke wezamulongela, ‘Weye kolondeka kudanganika kwaviya kolonga uvwizi kwa zina da Mndewa Mulungu.’ Maabaho tati yake na mami yake wezamuhoma na mwele kuno kolotela. 4 Siku iyo chila mulotezi kezakugwa chinyala kwa ichimu cha malaguso yake viyolotela. Hawezavala mawalo ya mazoya muladi wawavwizile wanhu. 5 Chila imwe kezalonga, ‘Niye siyo mulotezi, mbali niye mulimaji. Nihazi migunda kwandusila vinikalile mbwanga.’ 6 Mbali munhu yahamuuza imwe wawo, ‘Milulumu ino youli nayo muna ulukuli lwako ilawa kulihi?’ Yeye kezakwidika, ‘Milulumu ino niipata muna ikaye ya mbwiya zangu.’ "

7 Mndewa Mulungu Yeli na Udahi kolonga, "Lamuka weye zele. Ima umtowe mdimi wangu,

mdimi yonisang'hanila.

Umkome mdimi na ng'hondolo wezaimwaga.

Nizagolosa mkono wangu kuwatowa wanang'hondolo.

8 Selusi mbili za wanhu zizadanganizigwa,

mbali selusi imwe izasigala.

9 Selusi imwe yondaisigale, nizaigeza na kuisafya,

fana viya munhu viyosunha hela,

fana viya viyolinga zahabu

Maabaho wawo wezanipula niye na nizawedika.

Nizalonga, ‘Wawo wanhu wangu,’

wawo wezalonga, ‘Mndewa Mulungu niiyo Mulungu wetu.’ "