1 Mpuleni Mndewa Mulungu yagale mvula za sika.

Mndewa Mulungu iyo yogala mawingu ya mvula.

Iviya koweng'ha wanhu mvula za nyiminyimi

na koweng'ha wanhu wose ndiya muna imigunda.

2 Nyang'hiti za milungu yawo zolonga uvwizi,

walaguzi wawo wolagula uvwizi.

Walotezi wawo wolotela nzozi za uvwizi

na wowaguma moyo wanhu, mbali haifaya.

Lekamana wanhu wowegela fana ng'hondolo,

wogaya kwaviya wabule mdimi.

3 Nizawawonela ludoko wadimi wawo,

na nizawatagusa walangulizi wawo.

Niye Mndewa Mulungu Nili na Udahi,

nizadilolesa bumbila jangu welesi wa Yuda.

Nizawatenda wawe falasi wangu wa ng'hondo.

4 Kuna dikabila da Yuda kwizalawilila mhanda ya mgomba,

uko vizalawilila vigingi va hema,

uko kwizalawilila mhinde ya ng'hondo.

Kumwake yeye kwizalawilila chila mtawala.

5 Wanhu wa Yuda wezakuwa fana magalu kuna ing'hondo,

wezawabojoga wehi wawo muna inhope mnzila.

Wezaitowa kwaviya niye Mndewa Mulungu nahamwe nawo.

Wezawaguma chinyala wakwela falasi wa wehi wawo.

6 Nizawagangamiza wanhu wa Yuda na nizawataza welesi wa Yosefu.

Nizawabweleza kumwawo kwaviya nowawonela ubazi,

nawo wezakuwa fana viya siwalemile.

Niye Mndewa Mulungu, Mulungu wawo nizawedika mbuli ziwopula.

7 Wanhu wa Isilaili wezakuwa fana magalu

na mizoyo yawo izadeng'helela kwa divai.

Wana wawo wezawona mbuli zino na kudeng'helela

iviya mizoyo yawo izamdeng'helela Mndewa Mulungu.

8 Nizawatanga wanhu wangu na kuwaduganya hamwe,

kwaviya nizawakombola.

Nawo wezakuwa wengi fana viwakalile umwaka.

9 Ingawa niwapwililisa muna izisi zimwenga,

wezanikumbuka wahawa umo.

Wawo hamwe na wanawo wezabwela.

10 Nizawabweleza kulawa isi ya Misili,

nizawaduganya kulawa isi ya Ashulu.

Nizawagala muna iisi ya Gileadi na Lebanoni,

wawo wezamema chila hanhu.

11 Wezafosa muna ibahali ya magayo,

bahali itibuke izakala zinziwa,

hanhu hagidimile ha lwanda lwa Naili hezanyala.

Magoda ya Ashulu yezahumulusigwa,

na nguvu za Misili zizahalawa.

12 Nizawagangamiza kwa nguvu yangu.

Wezanitegeleza na kutenda mbuli zonilonda.

Niye Mndewa Mulungu nilonga ivo.