1 Mbuli ya Mndewa Mulungu Yeli na Udahi inizila, ilonga, 2 "Mndewa Mulungu Yeli na Udahi kolonga, ‘Nina wivu ng'hani kwa ichimu cha Sayuni, ivo nowehila ng'hani wehi wake. 3 Nizaubweleza mulima wa Sayuni na kwika kaye yangu muna dibululu da Yelusalemu. Bululu da Yelusalemu dizatangigwa, "Bululu dikwaminika." Iviya mulima wa Mndewa Mulungu Yeli na Udahi wizatangigwa mulima welile.’ " 4 Mndewa Mulungu Yeli na Udahi kolonga, "Walala wa chilume na wa chike wezawoneka kaidi wokala hasi muna yamakulugumbi ya Yelusalemu kuno chila munhu kana mhome yake kwaviya walala ng'hani. 5 Makulugumbi ya Yelusalemu yezamema wandele na wabwanga wokwangala umo." 6 Mndewa Mulungu Yeli na Udahi kolonga, "Mbuli zino zodaha kuwoneka za mwazanyo kwa wanhu wasigale siku iyo. Mbali hazizadaha kuwoneka za mwazanyo kumwangu."

7 Mndewa Mulungu Yeli na Udahi kolonga, "Nizawakombola wanhu wangu kulawa isi ili ubanzi wa ulawilo wa zuwa na kulawa isi ili ubanzi wa uswelo wa zuwa. 8 Nizawagala Yelusalemu na wezakala umo. Wezakuwa wanhu wangu na niye nizakuwa Mulungu wawo. Nizakuwa mwaminika kumwawo na nizahumiza voilondeka."

9 Mndewa Mulungu Yeli na Udahi kolonga, "Mweye womuhulika sambi mbuli zino zozilongigwa na walotezi wowakalile siku izo za kwika vandusilo va kaye ya Mndewa Mulungu Yeli na Udahi, muigangamize muladi kaye ya Mndewa Mulungu izengigwe. 10 Kwaviya ing'hali siku izo hazinafika, hakukalile na fungu da munhu hebu da mnyama. Iviya hakuwile na tindiwalo kwa munhu yalawile hebu kwa munhu yengile kwaviya wehi wakala chila hanhu. Niye nimuleka chila munhu yagombe na miyage. 11 Mbali sambi sizawatagusa wanhu wosigala fana voniwataguse umwaka." Mndewa Mulungu Yeli na Udahi kolonga ivo. 12 "Nizagala tindiwalo muna iisi, muladi wahande mbeyu. Mzabibu wizakwima matunda yake na isi izalawa mazao yake na mvula izatonya voilondeka. Vinhu ivo vose nizaweng'ha wanhu wasigale muna iisi ino viwe vawo. 13 Mweye wanhu wa Yuda na wanhu wa Isilaili, lusita lufosile muwoneka fana viya wanhu womuduwiligwe muna iwanhu wa zisi zimwenga. Mbali sambi nizamkombolani na mwizawatemela mate wamwenga. Ivo sekemudumbe kaidi mbali muwe magalu."

14 Mndewa Mulungu Yeli na Udahi kolonga, "Niilunga kumtendelani mbuli zihile kwaviya wasaho zenu waniguma ludoko na siwawonele ubazi, 15 mbali sambi noilunga kuditendela mbuli zinogile bululu da Yelusalemu na wanhu wa kaye ya Yuda. Ivo sekemudumbe. 16 Molondeka mutende vino. Chila munhu yalonge ukweli na mkaya miyage. Siku zose vitala venu vihumize voilondeka na vigale tindiwalo. 17 Munhu yoyose sekeyailunge kumtendela miyage mbuli zihile na sekemuilahe kwa uvwizi, kwaviya nozihila ng'hani mbuli izo. Niye Mndewa Mulungu nolonga ivo."

18 Mbuli ya Mndewa Mulungu Yeli na Udahi inizila, ilonga, 19 "Mndewa Mulungu Yeli na Udahi kolonga, ‘Siku za kufunga kuja kwa mwezi wekane na mwezi wetano na mwezi wesaba na mwezi welongo, izo zizakuwa siku za ng'henze na kudeng'helela na madugila ya kusangalala kwa wanhu wa Yuda. Ivo mulonde kulonga ukweli na muwe na tindiwalo.’ "

20 Mndewa Mulungu Yeli na Udahi kolonga, "Wanhu wengi wa zisi zimwenga na wakaya wa mabululu mengi wezakwiza. 21 Wakaya wa bululu dimwe wezawahitila wakaya wa bululu dimwenga, wezalonga, ‘Chihite himahima chikamtambikile Mndewa Mulungu Yeli na Udahi na chikampule yachitemele mate.’ 22 Kweli, zisi zili na nguvu na wanhu wengi wezakwiza Yelusalemu kumtambikila Mndewa Mulungu Yeli na Udahi na kumpula yawatemele mate."

23 Mndewa Mulungu Yeli na Udahi kolonga, "Siku izo wanhu longo kulawa chila kabila na chila ulonzi wezakwamhisa mhindo za walo da Muyahudi, kweli wezamwamha na kulonga, ‘Chihite hamwe na weye, kwaviya chihulika kuwa Mulungu kahamwe na weye.’ "