1 Nilola kaidi kuulanga na niwona chitabu choguluka uko. 2 Msenga iyo kaniuza, "Kowona choni?" Nimwidika, "Nowona chitabu choguluka, utali wake mita kenda na ugalamu wake mita nne na nusu." 3 Maabaho kanilongela, "Mgati ya chitabu icho mwandikigwa kuduwiligwa kondakuwapate wanhu wa isi yose. Ubanzi umwe wandikigwa kuwa wabavi wose wezawingigwa muna iisi na ubanzi umwenga wandikigwa kuwa wanhu wose woilaha uvwizi wezatendigwa ivo. 4 Mndewa Mulungu Yeli na Udahi kolonga, ‘Nizagala kuduwiligwa, nako kwizakwingila muna ikaye ya mbavi na muna ikaye ya munhu yoilaha uvwizi kwa zina jangu. Kwizasigala muna ikaye yake na kwiinanga, mbaka mibiki yake na mabwe yake.’ "

5 Maabaho msenga iyo wa Mndewa Mulungu yakalile kanizila kanilongela, "Lola uchanyha uwone chinhu chilawilila." 6 Nimuuza, "Icho choni?" Nayo kanidika, "Icho chigelo cha kulingila chili na uhasanyi wa wanhu wa isi yose." 7 Chigelo chenyewo chikala na ngubiko ya chuma. Vichigubuligwe, niwona mwanamke kakala umo. 8 Kanilongela, "Ino Wihi," Maabaho msenga ija kamsung'hila mwanamke iyo muna ichigelo na kachigubika na chuma kaidi. 9 Maabaho niwawona wanaake waidi wolawilila, wakala wosung'higwa na vulavumbi, iviya wakala na mabawa yeli na nguvu fana ya hondohondo. Wanaake wawo wakala wokwinula chigelo chiya muna yamawingu. 10 Maabaho nimuuza ija msenga wa Mulungu yalongile na niye, "Chigelo icho wochigala kulihi?" 11 Nayo kanidika, "Wochigala kuna iisi ya Babeli. Uko wezazenga kaye ya kwikila chigelo. Vondaimale, wezachika umo."