1 Msenga wa Mndewa wa Mulungu yalongile na niye kanizila kaidi kunilamusa fana munhu viyolamusigwa muna zinhongo. 2 Kaniuza, "Kowona choni?" Niye nimwidika, "Nowona chinala cha chitasa cha zahabu, uchanyha yake china hamha na vitasa vake saba uchanyha yake, iviya kuna milija saba ya kugala mavuta kuna ivitasa vose vili uchanyha yake. 3 Habehi ya chinala hakala na mizaituni midi, umwe ubanzi wa kulume na umwenga ubanzi wa kumoso."

4 Maabaho nimuuza msenga ija, "Mwenevale, vinhu vino fambulo jake choni?" 5 Nayo kanidika, "Weye huvimanyile bule fambulo da vinhu vino?" Nimwidika, "Kweli, sivimanyile bule, mwenevale wangu." 6 Msenga ija kanilongela, "Ino niiyo mbuli ya Mndewa Mulungu kwa Zelubabeli, yolonga, ‘Siyo kwa udahi hebu nguvu, mbali kwa Muhe wangu,’ Mndewa Mulungu Yeli na Udahi kolonga ivo."

7 Maabaho kagendelela kulonga, "Vino mulima wokukimilila? Bule! Weye Zelubabeli kwizausesa. Kwizaizenga kaidi kaye ya Mulungu, lusita vondawike dibwe da kukomelezela, wanhu wezadeng'helela kuno wolonga, ‘Mulungu itemele mate, Mulungu itemele mate.’ "

8 Maabaho mbuli ya Mndewa Mulungu inizila kaidi, ilonga, 9 "Zelubabeli kazenga chandusilo cha kaye ino ya Mulungu, iviya kezaikomeleza. Baho mwizavimanya kuwa Mndewa Mulungu Yeli na Udahi kanituma kumwenu. 10 Vino yelihi yoyehula siku ya mbuli ndodo? Wanhu wezadeng'helela vondawawone Zelubabeli kamha timazi. Vitasa vino saba ni meso ya Mndewa Mulungu, yolola zisi zose."

11 Maabaho nimuuza msenga iyo, "Mizaituni ino midi ili ubanzi wa kulume na kumoso wa chinala ina fambulo jaki?" 12 Iviya nimuuza, "Matambi yano maidi ya mizaituni yeli habehi na milija iyo midi ya zahabu yoigida mavuta ina fambulo jaki?"

13 Nayo kanidika, "Vino huvimanyile chino choni?" Nimwidika, "Sivimanyile, mwenevale wangu."

14 Maabaho kanilongela, "Wano niwawo waidi wahakigwe mavuta muladi kumsang'hanila Mndewa Mulungu wa zisi zose."