1 Maabaho Musa na Waisilaili wamwimbila Mndewa Mulungu wila uno, walonga,

"Nizamwimbila Mndewa Mulungu yeli uchanyha ng'hani.

Kawasa muna ibahali falasi na wakwela falasi.

2 Mndewa Mulungu niiyo mgombezi wangu na chimu cha wila wangu,

yeye iyo yonikombola.

Yeye Mulungu wangu, niye nizamtogoza,

Mulungu wa tati yangu, nizamtunhiza.

3 Mulungu galu wa ng'hondo,

Mndewa Mulungu niijo zina jake.

4 "Matololi ya mfalume wa Misili na wakalizi wake kawasa muna ibahali,

wakalizi wake wanogile kufosa wose, wadumbukila muna ibahali ya Shamu.

5 Mazi mengi ya bahali yawagubika,

wadumbukila muna ibahali fana dibwe.

6 Mndewa Mulungu, mkono wako wa kulume upata udahi mkulu,

Mndewa Mulungu, mkono wako wa kulume uwahonda wehi.

7 Kwa ukulu wako kowagwisa hasi wehi wako,

ludoko lwako lokwaka na kuwalunguza fana mabuwa yanyalile.

8 Kwa mhumuzi yako, mazi yaiduganya hamwe,

mawimbi yema zugaga fana ng'huta,

Mazi mengi ya hagati ya bahali yananahila.

9 Mwihi kalonga, ‘Nizawawinza na kuwagwila,

nizagola utajili wawo na kusola vose vinilonda. Nizasomola ngugulila yangu, mkono wangu wizawadanganiza.’

10 Mbali kubuma kwa beho jako,

Wamisili wagubikigwa,

wadumbukila muna yamazi mengi fana dibwe.

11 "Mndewa Mulungu,

yelihi muna imilungu yalingile fana weye?

Yelihi yalingile fana weye uli mkulu ng'hani,

weye udumbiza kwa sang'hano za utunhizo?

12 Kugolosa mkono wako wa kulume,

na isi iwamela wehi wetu.

13 "Kwa ulondo wako wa kufunya umoyo, kuwalongoza wanhu wouwakombole,

kwa udahi wako mkulu kuwalongoza mbaka hanhu helile houkala.

14 Wanhu wa isi wahulika yayo na kugudemeka,

wanhu wokala Filisiti wengilwa na chinhu cha kudumbiza chiwagalile usungu.

15 Walangulizi wa Edomu wadumba,

walangulizi wa Moabu wagudemeka kwa kudumba,

wanhu wose wokala Kanaani mizoyo yawo imong'honyoka.

16 Wapatigwa na lugano na ludumbo.

Kwa ichimu cha ukulu wa nguvu zako,

wanyamala hupi fana dibwe.

Mbaka wanhu wako weye Mndewa Mulungu wafose,

mbaka vondawafose wanhu wako wouwakombole.

17 Kwizawengiza mgati na kuwemiza hana umulima wako,

hanhu haja houhasagule weye Mndewa Mulungu hawe hanhu handaukale,

hanhu helile houhazengile weye Mndewa Mulungu kwa mkono wako,

18 Mndewa Mulungu niiyo mfalume siku zose."

19 Falasi wa mfalume wa Misili na mituka na wakwela falasi wake viwengile muna ibahali, Mndewa Mulungu kayabweleza mazi ya bahali na yawagubika. Mbali Waisilaili wagendelela kugenda hanhu hanyalile hagati ya bahali.

20 Mulotezi Miliamu, lumbu jake Haluni, kasola chigoma mumkono, na wanaake wose wamsondelela, watowa chigoma na wavina. 21 Miliamu kawembila,

"Mwimbileni Mndewa Mulungu yeli uchanyha ng'hani.

Kawasa muna ibahali falasi na wakwela falasi."

22 Maabaho Musa kawalongoza Waisilaili kulawa Bahali ya Shamu, wahita kuchuwala cha Shuli. Siku nhatu wagenda muna ichuwala bila kuyawona mazi. 23 Viwafikile hanhu hatangigwe Mala, hawadahile kung'wa mazi ya uko kwaviya yakala usungu. Lekamana hanhu baho hatangigwa Mala. 24 Wanhu walongelela kwa Musa, walonga, "Lelo chizakung'wa choni?" 25 Maabaho Musa kamulilila Mndewa Mulungu, Mndewa Mulungu kamulagusila tambi da biki, Musa kadivabika muna yamazi, mazi yose yahola.

Uko Mndewa Mulungu kaweng'ha Waisilaili malagilizo na ndagilizi muladi yawageze, 26 kawalongela, "One muhaditegeleza vinogile dizi jangu niye Mndewa Mulungu, Mulungu wenu, na kutenda mbuli zinogile haulongozi wangu na kutegeleza ndagilizi na malagilizo yangu, niye sizamgalileni matamu yaja yoniwagalile Wamisili. Kwaviya niye iyo Mndewa Mulungu yonimuhonyani."

27 Maabaho wafika Elimu, kokukalile na nzasa longo na mbili na mitende malongo saba. Uko weka mahema yawo habehi na mazi.