1 Maabaho Waisilaili wose wasegela kulawa Elimu na wahita kuna ichuwala cha Sini, chili hagati ya Elimu na Sinai, isiku ya longo na tano ya mwezi wekaidi, lusita viwasegele muna iisi ya Misili. 2 Kuja kuna ichuwala Waisilaili wose walongelela kwa Musa na Haluni, 3 wanhu wa Isilaili wawalongela, "Muhavu Mndewa Mulungu yahachikomile vichikalile muna iisi ya Misili kochikalile chija nyama na magate mbaka chiguta. Mbali mweye muchigala kuno kuna ichuwala muladi muchikome chose na nzala."

4 Mndewa Mulungu kamulongela Musa, "Nizamtonyelani mvula ya magate kulawa kuulanga. Chila siku wanhu wezalawa na kuduganya ndiya ya siku iyo. Kwa nzila ino nizawageza niwone fana wezasondelela ndagilizi zangu hebu hawezasondelela. 5 Siku ya sita vondawasasale ndiya yowaduganye, chiyasi icho chizakuwa miyanza midi ya ndiya ya chila siku."

6 Musa na Haluni wawalongela Waisilaili wose, "Ichigulogulo mwizavimanya kuwa Mndewa Mulungu iyo yamulavileni muna iisi ya Misili. 7 Imitondo mwizawona ukulu wa Mndewa Mulungu, kwaviya kahulika vimulongelela kumwake. Vino cheye china nani mbaka mudahe kulongelela kumwetu?" 8 Maabaho Musa kawalongela, "Ichigulogulo Mndewa Mulungu kezamwing'hani nyama muje, imitondo kezamwing'hani magate muje mwigute, kwaviya kahulika kulongelela kwenu. Vino cheye china nani mbaka mulongelele kumwetu? Hamulongelele kumwetu mbali mulongelela kwa Mndewa Mulungu."

9 Maabaho Musa kamulongela Haluni, "Walongele wanhu wose wa Isilaili wahite na kwima haulongozi ha Mndewa Mulungu, kwaviya kahulika kulongelela kwenu." 10 Haluni viyakalile kolonga na Waisilaili wose, walola kuichuwala, bung'hulo da Mndewa Mulungu dilawilila muna diwingu. 11 Mndewa Mulungu kamulongela Musa, 12 "Nihulika Waisilaili viwolongelela. Walongele, ‘Nguku zikwingila wezakuja nyama na imitondo wezakuja magate. Baho mwizavimanya kuwa niye iyo Mndewa Mulungu, Mulungu wenu.’ " 13 Ichigulogulo diza bumbila da ng'hwale na wadigubika dilago da Waisilaili, imitondo nhungwe izunguluka lago jose. 14 Nhungwe viimalile, kuna ichuwala kuwa na chinhu chilingile fana gate sisili. 15 Waisilaili viwawone chinhu icho waiuza, "Chino choni?" Kwaviya hawavimanyile chikala choni.

Musa kawalongela, "Dino ijo gate doyamwing'hileni Mndewa Mulungu muje. 16 Chino icho chiyalagilize Mndewa Mulungu, ‘Chila munhu yaduganye ndiya kwa kaye yake viyodaha kuja. Yamdondolele mhishi imwe yoimfaya chila munhu yeli muna ikaye yake.’ "

17 Waisilaili watenda fana viwalongeligwe, wamwenga waduganya nyingi na wamwenga chidogo. 18 Na viwapimile mhishi ziwaduganye, munhu yaduganye ndiya nyingi hapatile nyingi ng'hani, munhu yaduganye chidogo hapatile chidogo ng'hani. Chila munhu kaduganya ndiya yoimfaya. 19 Maabaho Musa kawalongela, "Munhu yoyose sekeyasigaze ndiya iyo mbaka imitondo." 20 Mbali wawo hawamtegeleze Musa, ivo wasigaza ndiya mbaka imitondo. Mbali imitondo ndiya iyo iwola, ilava mavunyo na inung'ha vundo. Ivo Musa kawawonela ludoko ng'hani. 21 Chila imitondo wanhu woduganya ndiya yoimfaya kuja. Zuwa vidikwelile na kukalika, ndiya isigale hamgwazo ya nzila ilumbuzuka.

22 Siku yesita Waisilaili waduganya ndiya iyo miyanza midi kufosa mwanduso, chila munhu mhishi mbili. Ivo walangulizi wose wa Waisilaili wamuhitila Musa na wamulongela mbuli izo. 23 Musa kawalongela, "Vino niivo viyalagilize Mndewa Mulungu, ‘Igolo ni siku ya kuhumula, Siku ya Mhumulo yelile ya Mndewa Mulungu. Ivo hiteni mukambike hebu mukakimuse ndiya yomulonda diyelo, ndiya yondaisigale ikeni mbaka igolo.’ "

24 Ivo weka goya indiya mbaka imitondo fana Musa viyawalongele, nayo haiwolile na hailavile mavunyo hebu hainung'hile vundo. 25 Musa kawalongela, "Diyeni ndiya ino diyelo, kwaviya diyelo Siku ya Mhumulo ya Mndewa Mulungu. Diyelo hamwizafika ndiya yoyose kunze ya lago. 26 Mwizaduganya ndiya kwa siku sita, mbali siku yesaba, Siku ya Mhumulo, hakwizakuwa na chinhu chochose."

27 Siku yesaba wanhu wamwenga wahita kudondola ndiya, mbali hawafikile chinhu. 28 Maabaho Mndewa Mulungu kamuuza Musa, "Mwizalema kwamha malagilizo yangu na ndagilizi zangu mbaka zuwaki? 29 Kumbukeni kuwa Mndewa Mulungu kamwing'hani Siku ya Mhumulo, lekamana siku yesita komwing'hani magate kwa siku mbili. Siku yesaba, chila munhu nayakale hanhu hayeli. Munhu yoyose sekeyalawe kunze siku yesaba." 30 Ivo siku yesaba wanhu wahumula.

31 Waisilaili waitanga ndiya iyo "Mana." Ikala fana uhemba mzelu na mumulomo ilinga fana gate sisili digumigwe uki. 32 Musa kawalongela, "Vino ivo viyalagilize Mndewa Mulungu, ‘Soleni lita mbili za mana na mwiike kwa ichimu cha nyelesi zikwiza, muladi wawone ndiya yonimulisileni kuna ichuwala chipindi chinimulavileni muna iisi ya Misili.’ "

33 Musa kamulongela Haluni, "Sola nongo ukagume lita mbili za mana, wiike haulongozi ha Mndewa Mulungu ikalizigwe kuwa ukalangama kwa nyelesi zikwiza." 34 Fana Mndewa Mulungu viyamulagilize Musa, Haluni keka mana* haulongozi ha vibawo va mabwe va ukalangama, muladi ikigwe goya. 35 Waisilaili waja mana kwa miyaka malongo mane, mbaka viwafikile muna iisi inogile, isi ili muna imhaka ya Kanaani. 36 Mhamba ya mana lita mbili ikala chinhu chimwe muna ichila vinhu longo, ningo iyo izoweleke yoitangigwa efa.