1 Yano mazina ya wana wa Yakobo yoyatangigwe Isilaili wowahitile Misili hamwe nayo. 2 Wakala Lubeni na Simeoni na Lawi na Yuda‚ 3 Isakali na Zabuloni na Benjamini na 4 Dani na Nafutali na Gadi na Asheli. 5 Welesi wose wa Yakobo wakala malongo saba‚ lusita ulwo Yosefu kakala yokala uko Misili. 6 Maabaho hamwande Yosefu kadanganika, iviya na ndugu zake na welesi wose wadanganika‚ 7 Mbali welesi wa Isilaili wakala wokweleka na kongezeka ng'hani‚ wakala wengi ng'hani na wagendelela kongezeka nguvu, ivo muna iisi ya Misili wakala wenela wawo. 8 Maabaho kalawilila mfalume imwenga yohammanyile wa kuitawala Misili Yosefu.

9 Kawalongela wanhu wake‚ "Loleni wanhu wa Isilaili wengi ng'hani na wana nguvu kufosa cheye. 10 Cholondeka chizahile nzila ya ubala sekewongezeke, one siivo, ihalawilila ng'hondo wezailumba na wehi wetu na kuitowa na cheye na kusegela mwiisi." 11 Ivo Wamisili waweka wemilizi wawemilize Waisilaili na kuwagaza kwa sang'hano ndala ya kumzengela mfalume wa Misili mabululu ya ngama uko Pisomo na Lamasesi. 12 Mbali kwaviya Wamisili viwawagazile Waisilaili, niivo viwongezeke na kwenela. Wamisili wawadumba Waisilaili, 13 na wawatendela usede wanhu wa Isilaili. 14 Wautenda ugima wawo wihe kwa sang'hano ndala, sang'hano ya kutenda chokaa na kutenda matafali na sang'hano zose za muna imigunda. Sang'hano izo zose, Waisilaili wasang'haniligwa kwa usede.

15 Maabaho mfalume wa Misili kawalongela walala wowataza wanaake wa Chiebulaniya kweleka, imwe zina jake katangigwa Shifila na wekaidi zina jake katangigwa Pua. 16 Kawalongela, "Muhawataza wanaake wa Chiebulaniya kuna ukuibasula‚ one yahavumbuka mwana wa chilume mkomeni, mbali one yahavumbuka mwana wa chike mulekeni." 17 Mbali walala wamdumba Mulungu na hawatendile fana viyawalagilize mfalume wa Misili‚ wawaleka wana wa chilume wakale. 18 Maabaho mfalume wa Misili kawatanga walala waja na kawauza‚ "Habali mutenda vino? Habali muwaleka wana wa chilume wakale?" 19 Walala wawo wamwidika mfalume wa Misili‚ "Wanaake wa Chiebulaniya hawalingile fana wanaake wa Chimisili bule, woibasula himahima na wana wawo wokwelekigwa yang'hali mulala hanafika." 20 Ivo Mulungu kawatendela mbuli zinogile walala wawo, na wanhu wongezeka ng'hani, wagendelela kuwa na nguvu ng'hani. 21 Na kwaviya walala wawo wamdumba Mulungu, Mulungu kaweng'ha welesi wawo wenyewo. 22 Maabaho mfalume wa Misili kawalagiliza wanhu wake wose, "Chila mwana wa chilume yondayelekwe kwa Waebulaniya yasigwe muna ulwanda lwa Naili, mbali chila mwana wa chike mulekeni."