1 Maabaho Yosefu kalila na kamuhagatila tati yake na kamnonela. 2 Maabaho Yosefu kawalagiliza waganga wake wamuhake dawa Isilaili muladi sekeyawole, nawo watenda ivo. 3 Isola siku malongo mane, lusita luzoweleke kwa kwika dawa. Wamisili wamulilila siku malongo saba.

4 Nhanga viikomelezeke, Yosefu kawalongela iwakulu wa mfalume, "One nihamnogezani, nolamba soleni usenga uno muugale kwa mfalume, 5 Tati yangu viyakalile habehi na kudanganika, kanilahiza, kalonga, ‘Sambi nodanganika, uniwande muna dituka donihimbile muna iisi ya Kanaani. Ivo lekeni nihite nikamuwande tati yangu, maabaho nizabwela.’ "

6 Mfalume kamwidika, "Hita ukamuwande tati yako, fana vimulagane."

7 Ivo Yosefu kahita kumuwanda tati yake. Wakulu wose wa kaye ya mfalume na walala wa kaye ya mfalume na walala wose wa isi ya Misili wahita hamwe na Yosefu. 8 Iviya Yosefu kaisondelela na wanhu wa muna ikaye yake na ndugu zake na wanhu wose weli muna ikaye ya Yakobo tati yake. Muna umkowa wa Gosheni wasigala wana wawo muhala hamwe na ng'hondolo na luti na ng'ombe wawo. 9 Iviya wanhu wokwendesha mituka na wanhu wokwela vihongwe iviya wahita hamwe nayo, dikala bumbila kulu. 10 Viwafikile hanhu ha kuhululila nafaka uko Atadi, ubanzi wa ulawilo wa zuwa wa ulwanda lwa Yoludani, walila kwa luholozi kwa lusita lukulu. Maabaho Yosefu kamtendela mwenekwaga tati yake matanga ya siku saba. 11 Wakaya wa mabululu ya Kanaani viwawonile wanhu wotenda matanga halubuga lwa Atadi, walonga, "Matanga yano ya Wamisili makulu." Kwa ivo hanhu baho hatangigwa Abeli Misili ili umwambu wa lwanda lwa Yoludani.

12 Wana wa Yakobo wamtendela tati yawo fana viyawalagilize, 13 walusola lukuli lwake walugala isi ya Kanaani na wamuwanda muna dituka dikalile muna umgunda uko Makipela, ubanzi wa ulawilo wa zuwa wa Mamule, muna umgunda uja Bulahimu uyaugulile kwa Efiloni Muhiti hawe hanhu ha kuwandila. 14 Yosefu viyakomeleze kumuwanda tati yake, kabwela Misili hamwe na ndugu zake na wanhu wose wakalile waisondelela nayo kuhita kumuwanda tati yake.

15 Viwawone tati yawo kadanganika, ndugu zake Yosefu walonga, "Vino yodahika Yosefu kezachihila na kezachiliha mbuli zihile zose zochimtendele?" 16 Ivo wamtumila usenga Yosefu na kumulongela, "Tati yako kachasila usenga yang'hali hanadanganika, kalonga, 17 ‘Mulongeleni Yosefu, "Nolamba uwalekelele ndugu zako wihi wawo na uhasanyi wawo." ’ Lelo chokulamba uchilekelele wihi wa wasang'hani wa Mulungu wa tati yako." Yosefu viyauhokele usenga uwo kalila.

18 Maabaho ndugu zake Yosefu wamwizila na wamtumbalila mavindi, walonga, "Cheye watumwa wako."

19 Mbali Yosefu kawalongela, "Sekemudumbe, vino niye Mulungu? 20 Mweye mwiilunga kunitendela mbuli zihile, mbali Mulungu kanilungila mbuli zinogile, muladi wanhu wengi wadahe kuwa wagima fana vimuwona diyelo. 21 Sekemudumbe. Nizamwikani goya mweye na wanenu." Ivo kawaguma moyo kwa kulonga nawo mbuli zinogile.

22 Yosefu kagendelela kukala muna iisi ya Misili hamwe na kaye ya tati yake. Yosefu viyadanganike kakala na miyaka gana na kumi. 23 Yosefu kanogelwa kuwawona wana na wazukulu wa Efulaimu na kuwahokela fana viya wanage wana wa Makili mwana wa Manase. 24 Yosefu kawalongela ndugu zake, "Niye nahabehi kudanganika, mbali Mulungu kezawezila na kwika goya na kezawalava muna iisi ino na kuwagala muna iisi yoyawalahile Bulahimu na Isaka na Yakobo." 25 Maabaho Yosefu katenda chilaho kwa wana wa Isilaili kalonga, "Nilaganileni kuwa Mulungu vondayawasegezeni muna iisi ino, mwizaipapa mivuha yangu kulawa hanhu hano." 26 Ivo Yosefu kadanganika uko Misili yahawa na miyaka gana na longo. Waluboboda dawa lukuli lwake na walwika muna disanduku muladi sekeluwole.