1 Yakobo kayenula meso yake na kamuwona Esau kokwiza na walume magana mane, ivo kawagola wanage kwa Leya na Laheli na wasang'hani wake wa chike waidi. 2 Kaweka kuulongozi iwasang'hani wa chike na wanawo, maabaho Leya na wanage, kuchisogo Laheli na mwanage Yosefu. 3 Yakobo mwenyewo kawalongolela kwa kuhita yotumbala mavindi mbaka chihanga chake chidalisa hasi miyanza saba, mbaka viyafikile habehi na sekulu wake. 4 Mbali Esau kahita yomkimbilila Yakobo, maabaho kamnonela na kamgeleka makono yake muna isingo na wose waidi walila. 5 Esau viyalolile na kuwawona iwanaake na iwana, kauza, "Wanhu wano wouli nawo welihi?"

Yakobo kamwidika, "Wano wana Mulungu woyaning'hile niye msang'hani wake kwa ubazi wake." 6 Maabaho waja iwasang'hani na wana wawo wafika habehi na wainama kwa hishima, 7 iviya Leya na wanage weza na wainama kwa hishima, maabaho Yosefu na Laheli weza na wainama kwa hishima.

8 Esau kauza, "Vino habali kuyatuma mabumbila yano kumwangu?"

Yakobo kamwidika, "Nilonda nitogoleke na weye mwenevale wangu."

9 Mbali Esau kalonga, "Nina vinhu va kufaya sekulu wangu, vinhu viuli navo usigale navo."

10 Yakobo kamulongela Esau, "Haidahika bule, one kutogola kunihokela, nokulamba uhokele vitumetume vangu. Kweli nodeng'helela kukuwona weye fana viya niwona chihanga cha Mulungu, kwaviya viunihokele kwa unovu. 11 Nolamba utogole vitumetume vino vonikugalile, kwaviya Mulungu kaninogela na kanipatila chila chinhu chinili nacho." Ivo Yakobo kambembeleza Esau mbaka kahokela.

12 Esau kalonga, "Haya chigendelele na mwanza wetu. Niye nizakulongolela."

13 Yakobo kamwidika, "Mwenevale wangu kovimanya kuwa wana wano wadododo, iviya nogesa ng'hondolo na ng'ombe wokong'heza na niye nolondeka kuwalola goya. One chahawagendeza siku ngima, yodahika wezakufa. 14 Ivo nolonda mwenevale wangu ulongole, niye nizasondelela hachisogo ugaluga, fana viya ugenzi wa wanyama na wana, mbaka vondanifike kwa mwenevale wangu uko Seili."

15 Esau kalonga, "Leka nikulekele wanhu wangu wamwenga."

Mbali Yakobo kamwidika, "Sekeusang'hane ivo. Vinoga kumwangu kutogoligwa na weye mwenevale wangu." 16 Siku iyo Esau kandusa kwamha nzila yake kubwela Seili. 17 Mbali Yakobo kahita Sukoti, uko kaizengela kaye mwenyewo na vizewe kwa ichimu cha wanyama wake. Ivo hanhu baho hatangigwa Sukoti.

18 Lusita viyabwelile kulawa Padani Alamu, Yakobo kafika goya muna dibululu da Shekemu muna iisi ya Kanaani na keka lago jake habehi na dibululu. 19 Kagula hanhu baho ha kuzenga lago kulawa muna uwelesi wa Hamoli tati yake Shekemu kwa vihande gana va hela. 20 Kazenga lupango hanhu baho na kuhatanga Eli Elohe Isilaili, fambulo jake Mulungu niiyo Mulungu wa Isilaili.