1 Yakobo kagendelela kukala muna iisi ya Kanaani, hanhu hoyakalile tati yake fana mgeni. 2 Zino mbuli za ugima wa Yakobo. Yosefu viyakalile mbwanga wa miyaka longo na saba, kakala kodima ng'hondolo na luti hamwe na ndugu zake wana wa Biliha na Zilipa, wake wa tati yake. Yosefu kamulongela tati yake mbuli zihile za ndugu zake.

3 Isilaili kamulonda ng'hani Yosefu kufosa wanage wose, kwaviya kamweleka kuulala. Ivo kamtendela Yosefu ng'hanzu ya chiiyeka ihambigwe goya. 4 Baho ndugu zake viwawonile kuwa tati yawo kamnogela Yosefu kufosa wawo, wamwihila na hawalongile nayo vinogile bule.

5 Ichilo chimwe Yosefu kalota nzozi, viyawasimulile ndugu zake, wawo waiyoha kumwihila ng'hani. 6 Yosefu kawalongela, "Tegelezeni nzozi yonilotile. 7 Nilota kuwa cheye chikala kumgunda chofunga mikinza, na kwa kusinhusa kinza jangu dinuka zugaga! Mikinza yenu iiduganya kudizunguluka na iidulikila kinza jangu."

8 Ndugu zake wamuuza, "Vino weye kochilongela kwizachitawala?" Hebu kwizakuwa na ukulu kumwetu? Ivo waiyoha kugendelela kumwihila kwa ichimu cha nzozi na mbuli zake.

9 Maabaho Yosefu kalota nzozi imwenga na kawalongela ndugu zake, "Nilota nzozi imwenga, niwona zuwa na mwezi na nhondo longo na imwe zinitumbalila mavindi."

10 Mbali viyawalongele tati yake na ndugu zake, tati yake kamkalikila, kalonga, "Vino nzozi yaki iyo yuulotile? Vino niye na mami yako na ndugu zako chizakutumbalila mavindi, mbaka vihanga vidalise hasi kwa hishima haulongozi wako?" 11 Ndugu zake wamuwonela migongo, mbali tati yake kagendelela kuigesa mbuli iyo.

12 Siku dimwe ndugu zake Yosefu wahita kudima mifugo ya tati yawo uko Shekemu. 13 Isilaili kamulongela Yosefu, "Nolonda weye uhite uko Shekemu, kowodimila mifugo ndugu zako."

Yosefu kamwidika, "Ona nitogola."

14 Tati yake kamulongela, "Hita ukawalole ndugu zako na mifugo yawo, one wahawa wagima ubwele unilongele." Ivo tati yake kamtuma kulawa muna dizanda da Hebuloni.

Yosefu kafika Shekemu. 15 Munhu imwe kamuwona kowegela muichuwala na kamuuza, "Kozahila choni?"

16 Yosefu kamwidika, "Nozahila ndugu zangu wodima mifugo yawo. Kodaha kunilongela haja haweli?"

17 Munhu ija kamwidika, "Wasegela wamala. Kwaviya niwahulika wolonga wohita Dosani." Ivo Yosefu kawasondelela ndugu zake na kawafika uko Dosani.

18 Viwamuwone kwa kutali na yang'hali kuwafikila, wailunga kumkoma. 19 Wailongela, "Lola ija nyamiloto kokwiza. 20 Leka chimkome na chimwase muna disima dimwe. Maabaho chizalonga kadigwa na ng'onyo kali da muna imbago. Maabaho chilole kuwa izo zinzozi zake zizakuwaze."

21 Mbali Lubeni viyahulike mbuli izo, kamkombola Yosefu kulawa kumwawo, kwa kulonga, "Sekechimkome." 22 Lubeni kawalongela, "Sekemwitile damu, mbali mwaseni muna disima dino hano haichuwala, iviya sekemumulumize." Kalonga ivo muladi yamkombole Yosefu muna yamakono yawo, maabaho yambweleze kwa tati yake. 23 Yosefu viyafikile kwa ndugu zake, wamvula ng'hanzu yake ya chiiyeka iyayawale. 24 Maabaho wamsola na kumwasa muna disima dilibule mazi.

25 Viwakalile woja, wawona bumbila da Waishumaili wokwiza kulawa Gileadi kuhita Misili. Ngamiya wawo wakala wapapile vilungo na ubani na mavumba. 26 Yuda kawalongela ndugu zake, "Chizapata choni chihamkoma ndugu yetu na kufisa ukomaji wake? 27 Chimchuuze kwa Waishumaili, mbali sekechimulumize kwaviya yeye ndugu yetu na damu imwe na cheye." Ndugu zake waitogolela. 28 Wachuuzi Wamidiani viwafikile hanhu baho, ndugu zake wamulava Yosefu muna disima, maabaho wamchuuza kwa Waishumaili kwa vihande malongo maidi va hela. Waishumaili wamsola Yosefu mbaka Misili.

29 Lubeni viyabwelile kuna disima dilibule mazi, hamuwone Yosefu bule, ivo Lubeni kadega walo jake kwa usungu. 30 Maabaho Lubeni kawabwelela ndugu zake na kalonga, "Mbwanga kahabule hano! Choni chondanitende?"

31 Maabaho wachinja mwanaluti na wachofeka ng'hanzu ya Yosefu muna idamu. 32 Waisola ing'hanzu mbaka kwa tati yawo na walonga, "Ino chiitola, lola niiyo ng'hanzu ya mwanago?"

33 Yakobo kaimanya ing'hanzu, kalonga, "Iyo yake! Mng'onyo wa kumbago kamgwila na kamuja. Yosefu kanyomholigwa vihande vihande!" 34 Baho Yakobo kayadega mawalo yake kwa usungu, kaiyawaza mawalo ya maguniya muna ichigudi. Kamulilila mwanage kwa siku nyingi. 35 Wanage wa chilume na wachike wamwizila muladi wamgume moyo, mbali Yakobo kalema kugumigwa moyo na kalonga, "Nilekeni, nizagendelela kumulilila mwanangu, mbaka vondanihite kuzimu kuyeli." Ivo tati yake kagendelela kumulilila Yosefu.

36 Chipindi icho uko Misili Wamidiani wamchuuza Yosefu kwa Potifa, imwe wa walangulizi wa mfalume, yakalile mkulu wa chibumbila cha wakalizi.