1 Vizimalile mbuli izo Yosefu kalongeligwa kuwa tati yake kolumwa. Ivo kawasola wanage waidi wa chilume, Manase na Efulaimu, na kahita kumulola Yakobo. 2 Yakobo viyalongiligwe kuwa mwanage Yosefu keza kumulola, kaigangamiza na kadundumala muna dikomwa. 3 Yakobo kamulongela Yosefu, "Mulungu mwene Udahi kanilawilila uko Luzu kuna isi ya Kanaani na kanitemela mate. 4 Kanilongela, ‘Nizakongezela wana wengi, na welesi wako wizakuwa kabila kulu, nizaweng'ha welesi wako isi ino kuwa yawo siku zose.’ "

5 Yakobo kagendelela kulonga, "Wanago waidi wouwapatile hano Misili ning'hali sinafika, ni wanangu. Efulaimu na Manase wezakuwa wangu fana viya viweli Lubeni na Simeoni. 6 One uhawa na wana wamwenga wengi, hawezakuwa wangu bule, uhazi wondawapate wizalawa kwa Efulaimu na Manase. 7 Vinikalile nobwela kulawa Padani, Laheli kadanganika muna iisi ya Kanaani, siyo ugenzi mtali kufika Efulata. Nimuwanda baho hamgwazo wa dikulugumbi dihita Efulata, sambi yotangigwa Beselehemu."

8 Isilaili viyawawonile wana wa Yosefu, kauza, "Wabwanga wano welihi?"

9 Yosefu kamwidika, "Wano wanangu, woyaning'hile Mulungu hano Misili."

Yakobo kalonga, "Nikwenhusile habehi muladi nidahe kuwatemela mate." 10 Meso ya Yakobo yakala hayalola kwa ichimu cha ulala. Ivo Yosefu kawakwenhusa wanage habehi na tati yake, na Yakobo kawahagatila na kawanonela. 11 Isilaili kamulongela Yosefu, "Sigesile kuwona chihanga chako kaidi, mbali humbe Mulungu kanogela mbaka niwawona wanago." 12 Maabaho Yosefu kawasegeza wanage hana yamavindi ya tati yake na katumbala mavindi mbaka chihanga chake chidalisa hasi.

13 Yosefu kaweka wanage wose waidi, Efulaimu kuna umkono wake wa kulume kusonhela mkono wa kumoso wa Isilaili, na Manase kuna umkono wake wa kumoso kusonhela mkono wa kulume wa Isilaili. Kawakwenhusa habehi nayo. 14 Mbali Isilaili kafoseza makono yake, mkono wa kulume kawika mditwi da Efulaimu, ingawa kakala mdodo na mkono wake wa kumoso kawika mditwi da Manase yoyakalile chaudele. 15 Maabaho Isilaili kamtemela mate Yosefu kalonga, "Mulungu ija wasaho zetu Bulahimu na Isaka wakala fana viyolonda muna ugima wawo,

Mulungu yoyanidimile muna uugima wangu mbaka diyelo,

16 Msenga wa kuulanga ija yanilopole niye muna zimbuli zose, yawatemele mate wabwanga wano!

Wezatangigwa wanangu kwa ludongo lwa welesi wa Bulahimu na Isaka na wongezeke muna iisi."

17 Yosefu viyawone kuwa tati yake kawika mkono wake wa kulume kuna iditwi da Efulaimu, hanogelwe bule. Ivo kawamha mkono wa tati yake kalonda kuusegeza uchanyha ya ditwi da Efulaimu, yawike kuna iditwi da Manase. 18 Yosefu kamulongela tati yake, "Siyo ivo tata. Ino niiyo chaudele, mwikile mkono wako wa kulume muna iditwi jake."

19 Mbali tati yake kalema, kalonga, "Novimanya mwanangu, novimanya. Welesi wa Manase iviya wezakuwa wanhu wakulu. Mbali mdodo wake kezakuwa mkulu kufosa yeye, na welesi wake wezakuwa makabila makulu."

20 Ivo kawatemela mate siku ijo na kalonga, "Waisilaili wezasang'hanila mazina yenu kutemela mate, wezalonga, ‘Mulungu yakutende weye fana Efulaimu na Manase.’ " Niivo Yakobo viyamwikile Efulaimu haulongozi wa Manase.

21 Baho Isilaili kamulongela Yosefu, "Fana viya viuwona kuwa niye nahabehi kudanganika, mbali Mulungu kezakuwa na mweye na kuwasola kuwabweleza muna iisi ya wasaho zenu. 22 Niye nikwing'ha weye siyo ndugu zako hanhu hotangigwa Shekemu na vinhu vonisolile muna yamakono ya Waamoli kwa upanga wangu na upinde wangu."