1 Salayi muke wake Abulamu kakala hanakweleka mwana. Kakala na mtumwa wa chike Mmisili yoyatangigwe Hajili. 2 Salayi kamulongela Abulamu, "Kuvimanya Mndewa Mulungu haninogele kupata wana. Lelo kambandame mtumwa wangu muladi niwapate wana kufosela yeye." Abulamu katogola chiya choyalongile Salayi. 3 Maabaho Salayi kamsola Hajili mtumwa wake kulawa Misili kamwing'ha Abulamu yawe fana muke wake. Mbuli zino zilawilila lusita Abulamu viyakalile kuna isi ya Kanaani miyaka longo. 4 Abulamu kambandama Hajili nayo kapata wimo. Hajili viyawonile kapata wimo, kandusa kumwehula Salayi.

5 Salayi kamulongela Abulamu, "Wihi uno unitendiligwa kwizahusika nawo. Niye nikugolela mtumwa wangu wa chike, mbali viyawile na wimo kanyehula. Mndewa Mulungu nayahumize hagati ya niye na weye."

6 Abulamu kamulongela Salayi, "Mtumwa wako kahasi yako weye, mtendele choulonda." Maabaho Salayi kamgaza Hajili mbaka kaibanga.

7 Msenga wa Mndewa Mulungu kamfika Hajili kudibwilingu kuna inzasa ya mazi, nzila ya kuhita Shuli. 8 Kalonga, "Hajili msang'hani wa Salayi, kulawa kulihi na kohita kulihi?"

Kamwidika, "Nomkimbila Salayi yonimsang'hanila."

9 Msenga ija wa Mndewa Mulungu kamulongela, "Bwela kwa youmsang'hanila ukamtegeleze." 10 Maabaho msenga wa Mndewa Mulungu kamulongela, "Nizakwing'ha welesi mwingi habule munhu yondayadahe kuwapeta."

11 Msenga wa Mndewa Mulungu kamulongela,

"Weye kuna wimo na kwizakweleka mwana wa chilume

na zina jake kwizamtanga Ishimaeli*,

kwaviya Mndewa Mulungu kohulika manhesa yako.

12 Ishimaeli kezakala fana Ishimaeli mbago,

kezakuwa mwihi wa chila munhu,

na chila munhu kezakuwa mwihi wake.

Kezaigola na ndugu zake."

13 Hajili kamwing'ha zina Mndewa Mulungu yoyalongile nayo, "Weye niiyo Mulungu yoniwona." Na kalonga, "Kweli niye nimuwona yeye yoniwona." 14 Lekamana nzasa ija yotangigwa Beeli Laha Iloi*. Nzasa iyo yahagati ya Kadeshi na Beledi.

15 Hajili kamwelekela Abulamu mwana wa chilume. Abulamu kamtanga zina jake Ishimaeli. 16 Hajili viyamweleke Ishimaeli, Abulamu kakala na miyaka malongo manane na sita.