1 Yakobo kawatanga wanage na kalonga, "Iduganyeni hamwe, nizamulongelani mbuli zondazimulawilileni siku zikwiza."

2 "Mweye wana wa Yakobo, iduganyeni hamwe mutegeleze.

Munitegeleze tati yenu Isilaili."

3 "Lubeni, weye chaudele wangu, nguvu yangu

na mwana wa mwanduso wa ubwanga wangu,

Mwene udahi na nguvu."

4 Weye kulinga fana mazi yamemile,

mbali hwizakuwa wa mwanduso kaidi,

kwaviya kugona muna dikomwa jangu na kumbandama mtumwa wangu, yalingile fana muke wangu

hudihishimu komwa da tati yako.

5 "Simeoni na Lawi ndugu.

Wosang'hanila silaha zawo kutenda usede.

6 Mbali niye sizaihanganya muna uwihi wawo,

sizaihanganya na mting'hano wawo,

kwaviya muna uludoko lwawo wamkoma munhu,

kwa kulonda kwawo wakanha umuge wa ng'ombe.

7 Noduwila ludoko lwawo kwaviya luiyoha ng'hani,

na lukala lwabule ubazi.

Nizawagola muna iisi ya Yakobo.

Nizawapwililisa muna iisi ya Isilaili."

8 "Yuda, wana wa tati yako wezakutogola.

Wehi wako kwizawanyoda zisingo.

Wana wa tati yako wezatumbala mavindi haulongozi hako.

9 Yuda mwanangu kulinga fana simba yapatile ukala wake na kabwela ukaye,

fana simba koigolola na kugona hasi,

simba yeli na nguvu yelihi yodaha kumulamusa?

10 Yuda kezakwamha mhome ya chifalume,

welesi wake wizatawala siku zose.

Mbaka vondayeze yeli na udahi wa ufalume,

mbaka makabila wezamtegeleza.

11 Komfunga chihongwe wake kwa nzabi muna umbiki wa zabibu

na komfunga mwanachihongwe kwa nzabi muna umbiki wa zabibu unogile,

muladi yaje mayani ya mzabibu.

Kofuwa viwalo vake muna idivai,

viwalo vake muna idivai ndung'hu.

12 Meso yake yawe madung'hu fana divai

na meno yake yawe mazelu fana maziwa."

13 "Zabuloni kezakala habehi na bahali.

Kezasigamiza meli yake muna ingema

mhaka yake izahakana na Sidoni."

14 Isakali kalinga fana chihongwe mwene nguvu,

yotambala hagati ya zimbahasha zake.

15 Mbali kowona kuwa hanhu ha kuhumula hanoga,

na isi yonogeza.

Konamiza mgongo wake kupapa mbahasha,

iviya kowangilizigwa kusang'hana usang'hano fana mtumwa.

16 Dani kezakuwa msemi kwa wanhu wake,

fana imwe wa ng'holo za makabila ya Isilaili.

17 Dani kezakuwa fana nyoka muna inzila,

nyoka yeli na sumu mumgwazo wa nzila,

yoluma visiginho va vihongwe.

Munhu yokwela chihongwe kogwa chingalingali.

18 "Mndewa Mulungu niugozela ukombola wako."

19 "Gadi kezatowigwa na mabeduwi,

mbali yeye kezawasondelela kuchisogo na kuwatowa."

20 "Isi ya Asheli izalava ndiya inogile.

Nayo kezalava ndiya yoimfaya mfalume."

21 Nafutali kalinga fana mbuguma ya mhala,

yokweleka wana wanogile.

22 "Yosefu kalinga fana mbiki ukwima, mbiki ukwima mwiingema ya nzasa,

matambi yake yatanda muna inhumba.

23 Wopigisa misale wamtowa ng'hani

na wampigisila misale na wamgaza ng'hani.

24 Mbali upinde wake ung'hali ugangamala

makono yake yana udahi,

kwa udahi wa Mndewa Mulungu, Mulungu wa Yakobo,

Mdimi na luwe lwa Isilaili.

25 Mulungu wa tati yako yondayakutaze.

Kwa Mulungu Yeli na Udahi yondayakutemele mate.

Yakutemele mate kwa mvula kulawa kuchanyha

yateneligwe mate mazi yolawa hasi mwiisi,

Utemeligwe mate kwa kweleka wana wengi na fugo,

26 Kutemeligwa mate kwa tati yako kuhume kutemiligwa mate kwa milima ya umwaka,

Kutemiligwa mate uko kuwe uchanyha ya ditwi da Yosefu, uchanyha ya ditwi jake yeli mkulu kufosa ndugu zake."

27 "Benyamini kalinga fana mbwizi mkali.

Imitondo koja maingo yake na ichigulogulo kogola viyahokile."

28 Izo niizo ng'holo longo na mbili za Isilaili, iviya izo niizo zimbuli ziyawalongele tati yawo viyawatemele mate, fana viya chila munhu viyalondeke.

29 Maabaho Yakobo kawalagiliza wanage wa chilume, kalonga, "Lelo nohita kwiilumba na wanhu wangu muna iifa, muniwande hamwe na tati zangu muna dituka muna umgunda wa Efiloni Muhiti, 30 kuja Makipela ubanzi wa ulawilo wa zuwa wa Mamule mwiisi ya Kanaani. Bulahimu kagula tuka ijo na mgunda kwa Efiloni Muhiti diwe hanhu hake ha kuwandila. 31 Uko niuko kuwawandigwe Bulahimu na muke wake Sala, iviya uko niuko kuwawandigwe Isaka na muke wake Lebeka, iviya uko niuko nimuwandile Leya. 32 Mgunda na tuka dili umo viguligwa kulawa kwa Wahiti." 33 Yakobo viyakomeleze kuwalagiliza wanage, kayabweleza magulu yake mdikomwa kadanganika, kaihanganya na wasaho zake wowamulongolele.