1 Yakobo kawahulika wanage Labani wolonga, "Yakobo kasola chila chinhu cha tati yetu. Utajili wake wose ulawa kwa tati yetu." 2 Yakobo kavimanya kuwa Labani hamgesile fana baho haumwaka. 3 Maabaho Mndewa Mulungu kamulongela Yakobo, "Bwela kuna iisi ya wasaho zako na kwa ndugu zako. Niye nizakuwa hamwe na weye."

4 Yakobo katuma wanhu wakawatange Laheli na Leya kuna ichuwala koyakalile kowadima ng'hondolo wake. 5 Yakobo kawalongela, "Nowona kuwa tati yenu hanigesa fana umwaka, mbali Mulungu wa tati yangu kahamwe na niye. 6 Muvimanya nimsang'hanila tati yenu kwa nguvu zangu zose. 7 Hata ivo kanivwizila na kasakanya yombe jangu miyanza longo. Mbali Mulungu hamulekele yanilumize. 8 Haja tati yenu viyalongile, ‘Wanyama wose weli na mindilizi wezakuwa yombe jako,’ ivo bumbila jose dilela wanyama weli na mindilizi. Na haja viyalongile, ‘Wanyama wose weli na uzolizoli wezakuwa yombe jako,’ ivo bumbila jose dilela wanyama weli na uzolizoli. 9 Mulungu viyasolile wanyama wa tati yenu, kaning'ha niye.

10 "Lusita lwa wanyama kupata wimo vilufikile, nilota nzozi na niwona mabebelu yose yakwelile mazike, yakala na mindilizi na uzolizoli na mawolawola. 11 Msenga wa kuulanga kalonga na niye muna zinzozi na kanitanga, ‘Yakobo,’ nimwidika, ‘Aino.’ 12 Na kalonga, ‘Inula meso yako na ulole mabebelu yose yeli na mindilizi na uzolizoli na mawolawola. Mbuli iyo iwa ivo kwaviya niwona viyakutendile Labani. 13 Niye Mulungu yoyakulawilile kuja Beseli, hanhu haja houitilile mavuta mhanda ya ukumbuso na kunilahila. Lelo isasale na ubwele muna iisi yako yowelekigwe.’ "

14 Laheli na Leya wamwidika Yakobo, "Cheye chabule kaidi hanhu ha vinhu hebu uhazi wowose muna ikaye ya tati yetu. 15 Tati yetu kachitenda fana nyambenyambe. Kachichuuza, na lelo kasang'hanila hela zose zoyalihigwe kwa ichimu chetu. 16 Utajili uno wose Mulungu woyausolile kulawa kwa tati yetu, wetu cheye na wanetu. Tenda vovose viyakulongele Mulungu."

17 Yakobo kalamka na kaisasala kusegela kwa kuwakweza wanage na wake zake muna ingamiya, 18 Kasola wanyama wake wose na vinhu vake vose viyavipatile kuja Padani Alamu, kandusa mwanza kubwela kuna iisi ya Kanaani kwa Isaka tati yake. 19 Labani viyahitile kuwakanha mazoya ng'hondolo wake, Laheli kabawa nyang'hiti za milungu ya tati yake. 20 Yakobo kamvwizila Labani Mwalamu, hamulongele bule kuwa kosegela. 21 Kasola chila chinhu chake na kasegela himahima. Kaloka ulwanda lwa Efulate na kahita kuna umulima wa isi ya Gileadi.

22 Siku nhatu hamwande, Labani kalongiligwa kuwa Yakobo kakimbila. 23 Labani kawasola ndugu zake, kamsondelela Yakobo kwa siku saba. Kamfika kuna umulima wa isi ya Gileadi. 24 Muna zinzozi ichilo Mulungu kamwizila Labani Mwalamu na kamulongela, "Uiteganye, sekeumtemele mate Yakobo na sekeumduwile." 25 Labani kamfika Yakobo lusita ulo Yakobo viyekile lago jake kumulima, Labani na ndugu zake weka lago jawo muna iisi ya mulima wa Gileadi.

26 Labani kamulongela Yakobo, "Habali kutenda vino, habali kunivwizila na kuwasola wandele zangu fana mateka kuna ing'hondo? 27 Habali kunivwizila na kunikimbila? One uhanilongele, nahadahile kukulaga kwa deng'ho na nyila na ngoma na vilongelonge. 28 Habali huning'hile nyafasi ya kuwanonela wanangu na wazukulu zangu? Mbuli izo ziutendile za chibozi! 29 Ninawo udahi wa kukulumiza, mbali ichilo chifosile Mulungu wa tati yako kanizuma, kalonga, ‘Iteganye, sekeumtemele mate Yakobo na sekeumduwile.’ 30 Novimanya kukimbila kwaviya kukala na hamu ng'hulu ya kubwela ukaye kwa tati yako. Mbali habali kubawa nyang'hiti za milungu yangu?"

31 Yakobo kamwidika Labani, "Nidumba kwaviya nigesa uhanihokile wandele zako. 32 Mbali one munhu yoyose uhamfika na nyang'hiti za milungu yako, umkome. Zahila haulongozi ha wanhu wetu, one uhawona chinhu chako, uchisole." Yakobo havimanyile bule fana Laheli kabawa nyang'hiti za milungu ya Labani.

33 Ivo Labani kahita na kazahila nyang'hiti izo muna dihema da Yakobo, maabaho kengila hema da Leya na hema da wasang'hani waja waidi wa chike, mbali hawonile bule nyang'hiti za milungu yake. Maabaho kengila muna dihema da Laheli. 34 Laheli kakala yasolile nyang'hiti izo za milungu na kazifisa hasi ya chigoda cha kukalila uchanyha ya ngamiya, na kakala mchanyha yake. Labani kazahila muna dihema jose, mbali hazipatile bule. 35 Laheli kamulongela tati yake, "Tata, sekeuniwonele ludoko, mbali sizakwinuka bule haulongozi wako, kwaviya namzisiku zangu." Labani kazizahila nyang'hiti za milungu yake, mbali hazipatile bule.

36 Maabaho Yakobo kehilwa na kagomba na Labani, kalonga "Nihasanya choni mbaka unisondelele vino? 37 Vino kupekula vinhu vangu vose, chinhu chako chilihi chouchipatile kumwangu? Chike haulongozi wa ndugu zako na ndugu zangu wadahe kulola muladi wadahe kulamula fana imwe wetu kagolosa. 38 Nikala na weye miyaka malongo maidi, ng'hondolo wako hebu luti wako hawatengule wimo, na sidile mabebelu kulawa muna dibumbila jako. 39 Niye hata mwanza umwe sikugalile mnyama wako yoyakomigwe na mnyama wa kumbago, mbali niliha ubananzi uwo niye mwenyewo. Weye kunilonda nilihe bila kugesa, fana kabawigwa imisi hebu ichilo. 40 Imisi nifunyila umoyo zuwa na ichilo nifunyila umoyo mbeho, sidahile kupata nhongo hata chidogo. 41 Miyaka malongo maidi yose nikala hamwe na weye. Nikusang'hanila miyaka longo na mine kwa ichimu cha wandele zako waidi na miyaka sita kwa ichimu cha wanyama wako, mbali weye kwasakanya yombe jangu miyanza longo. 42 Mulungu wa tati yangu na Mulungu wa Bulahimu na Mulungu yoyamtendile Isaka yamdumbe, one sigambeyawe hamwe na niye, wahaniwingile mikono muhala. Mbali Mulungu kayawona manhesa yangu na sang'hano yoniitendile, na ichilo chifosile kakukalikila."

43 Labani kamwidika Yakobo, "Wanaake wano wandele zangu, na wana wawo wanangu, wanyama wano wangu. Chila chinhu chouwona hano changu. Mbali niye nodaha kutendaki diyelo kwa iwano iwandele zangu na wana waweleke? 44 Izo chitende lagano niye na weye, iwe ukalangama hagati ya weye na niye."

45 Yakobo kasola dibwe kulu na kadisimika fana mhanda ya ukumbuso. 46 Yakobo kawalongela ndugu zake waduganye mabwe, nawo waduganya mabwe na weka chibugulu. Maabaho waja ndiya habehi na chibugulu chiya cha mabwe. 47 Labani kachitanga chibugulu icho Yegasahadusa, mbali Yakobo kachitanga Galedi. 48 Labani kamulongela Yakobo, "Chibugulu chino cha mabwe chizakuwa ukalangama kwa cheye waidi." Kwa ivo lekamana chibugulu icho chotangigwa Galedi, 49 na iviya hatangigwa Misipa, kwaviya kalonga, "Mndewa Mulungu yachikalize weye na niye lusita vichiwa kutali bila kuiwona." 50 Labani kagendelela kulonga, "One uhawagaza wandele zangu, hebu uhasola wake wamwenga, one ihawa siimanyile mbuli ino, uvimanye kuwa Mulungu niiyo mkalangama wetu." 51 Labani kamulongela Yakobo, "Chibugulu cha mabwe yano ya luwe na mhanda ya ukumbuso yoniisimike hagati ya weye na niye ni ukalangama wa dibwe." 52 Chibugulu chino na mhanda, niuwo ukalangama kuwa niye sizafosa chibugulu chino kwiza kumwako na weye hwizafosa chibugulu chino na mhanda ino kwiza kumwangu kwa wihi. 53 Mulungu wa Bulahimu na Mulungu wa Naholi, kezachihumiza niye na weye. Maabaho Yakobo kailaha kwa zina da Mulungu yoyamtendile Isaka yamdumbe. 54 Maabaho Yakobo kalava nhambiko ya kutimbula kuna umulima na kawagoneka ndugu zake waje ndiya. Viwakomeleze wasigala uko ichilo chose. 55 Imitondo ng'hani Labani kawanonela wazukulu zake na wanage na kawatemela mate, maabaho kawalaga, kawaleka na kabwela ukaye.