1 Waishumaili viwamsolile Yosefu wamgala Misili na wamchuuza kwa Potifa, imwe wa wakulu wa mfalume, niiyo mkulu wa chibumbila chake cha wakalizi. 2 Mndewa Mulungu kakala hamwe na Yosefu, nayo katenda vinogile ng'hani kwa chila chinhu. Yosefu kakala muna ikaye ya mwenevale wake Mmisili. 3 Mwenevale wake viyawonile kuwa Mndewa Mulungu kakala hamwe na Yosefu na chila chiyatendile katenda vinogile, 4 kamnogela ng'hani Yosefu na kamtenda yawe msang'hani wake. Kamwika kuwa ndolezi wa kaye yake na chila chinhu chiyakalile nacho. 5 Kwandusila lusita ulo, kwa ichimu cha Yosefu Mndewa Mulungu kaitemela mate kaye ya Mmisili iyo na chila chinhu choyakalile nacho na migunda yake. 6 Potifa kamuleka Yosefu yalolese na kukaliza chila chinhu, hagesile chochose ila kuja ndiya yake muhala.

Yosefu kakala mbwanga yanogile na chihanga chinogile, 7 na lusita vilufosile muke wa Potifa kandusa kummelela mate Yosefu na kamulamba yahite yakaibandame nayo. 8 Yosefu kalema na kamulongela, "Mwenevale wangu kabule lugano jojose muna ikaye kwaviya niye nabaha, kanitulila chila chinhu chiyeli nacho. 9 Hano hakaye kabule mamulaka kufosa niye, hanilemesa kwamha chochose ila weye muhala, kwaviya weye muke wake. Ivo nodahaze kutenda wihi fana uwo kwa kumuhasanya Mulungu?" 10 Muke wa Potifa kamulongela Yosefu mbuli iyo chila siku, mbali Yosefu kalema kumbandama na hata kuwa hamwe nayo.

11 Mbali siku dimwe Yosefu kengila muna ikaye kusang'hana sang'hano yake, wasang'hani wamwenga hawakalile umo. 12 Muke wa Potifa kajamha debwani da Yosefu na kalonga, "Unyangale." Mbali Yosefu kasulupuka na kakimbilila kunze, kadileka debwani jake muna yamakono yake. 13 Muke wa Potifa viyawonile kuwa Yosefu kadileka debwani jake na kakimbilila kunze ya ikaye, 14 kawatanga wasang'hani wa kaye yake na kawalongela, "Loleni! Muebulaniya ino, mulumangu iyamgalile muna ikaye kochiguma chinyala. Kengila muna ichiheleto changu muladi yanyangale, mbali niye niguta nyangi. 15 Viyahulike noguta nyangi, kakimbilila kunze, kadileka debwani jake hamwangu."

16 Mwanamke ija kadika debwani diya, mbaka mwenevale wa Yosefu viyabwelile ukaye. 17 Kamsimulila mbuli iyo, "Msang'hani Muebulaniya iumgalile hano, kengila muna ichiheleto kuniguma chinyala. 18 Mbali vinigutile nyangi, kadileka debwani jake na kakimbilila kunze."

19 Mwenevale wa Yosefu viyahulike mbuli izo ziyalongile muke wake, kawona ludoko. 20 Kamgwila Yosefu na kumwika muna ichifungo, hanhu hawakalile wafungigwa wa mfalume. Ivo Yosefu kalekigwa muna ichifungo. 21 Mbali hata umo muna ichifungo Mndewa Mulungu kakala nayo na kagendelela kumulagusa viyomulonda, mbaka mkulu wa chifungo kanogelwa nayo. 22 Mkulu wa chifungo kamwika Yosefu yawe mkulu wa wafungwa wose na chila chitendeke umo muna ichifungo chitendeka kwa ulangulizi wake. 23 Mkulu wa chifungo hagesile chinhu chochose, Yosefu katuliligwa chila chinhu, kwaviya Mndewa Mulungu kakala hamwe nayo na chila chinhu chiyatendile kachitenda vinogile.