1 Vizimalile mbuli izo, mwikagoya ving'waji na mokaji magate wa mfalume wa Misili wamuhasanya mfalume. 2 Mfalume kawawonela ludoko walangulizi wake waidi, mwikagoya ving'waji na mokaji magate. 3 Kawaguma muna ichifungo muna ikaye ya mkulu wa wakalizi, hanhu hoyafungigwe Yosefu. 4 Wanhu wawo wakala muna ichifungo kwa lusita, mkulu wa wakalizi kamwing'ha ukulu Yosefu yawalolese.

5 Ichilo chimwe, mwikagoya ving'waji na mokaji magate wa mfalume wa Misili wakalille muna ichifungo walota nzozi, chila imwe kalota nzozi mbasakanyo na miyage, nzozi zikala na fambulo mbasakanyo. 6 Yosefu viyezile imitondo, kawawona wana luholozi. 7 Yosefu kawauza wakulu wawo wa mfalume wakalile hamwe nayo muna ichifungo, muna ikaye ya mwenevale wake, "Habali diyelo muna vihanga va luholozi?"

8 Nawo wamwidika, "Chilota nzozi na habule yodaha kuchifambulila nzozi zetu."

Yosefu kalonga, "Vino siyo Mulungu muhala yodaha kufambula nzozi?" Nilongeleni nzozi zenu.

9 Mwikagoya ving'waji wa mfalume kamulongela Yosefu, "Muna inzozi yangu niwona mbiki wa mzabibu haulongozi wangu, 10 nawo ukala na matambi matatu. Lusita viusukile, maluwa yake yapumbuluka na vilobota vake viwa zabibu zivile. 11 Mmakono yangu nikala nokwamhilila nhungo ya mfalume. Baho nisola zabibu nizikamila muna inhungo iyo, maabaho nimwing'ha mfalume nhungo iyo." 12 Yosefu kamulongela, "Dino niijo fambulo jake, matambi matatu ni siku nhatu. 13 Zahafika siku nhatu, mfalume kezakulava muna ichifungo na kukubweleza kaidi muna ukulu wako. Kwizamwing'ha mfalume nhungo fana viukalile kotenda baho haichanduso. 14 Mbali ung'humbuke baho chila chinhu vondachihite goya kumwako, nolamba unitendele mbuli zinogile na unitambule haulongozi wa mfalume na unitaze nilawe muna ichifungo chino. 15 Kwaviya niye nitolosigwa kulawa isi ya Waebulaniya na hano sitendile mbuli yoyose ya kunitenda nigumigwe muna ichifungo."

16 Mokaji magate imkulu viyawone fambulo ijo da mwikagoya ving'waji dinoga, kamulongela Yosefu, "Niye iviya nilota nzozi, nikala niitwikile vigelo vitatu va magate mditwi jangu. 17 Muna ichigelo cha uchanyha kukala na ndiya mbasakanyo zibanikigwe kwa ichimu cha mfalume, mbali udege wazija muna ichigelo mditwi jangu."

18 Yosefu kamwidika, "Dino niijo fambulo jake, vigelo vitatu ni siku nhatu. 19 Zihafosa siku nhatu mfalume kezakulava na kukuchinja. Kezakutumbika muna umbiki na ndege wezakuja nyama yako."

20 Ikala siku yeketatu, siku ya kufikiza kwelekigwa mfalume. Mfalume kawatendela dugila wakulu wake wose, kamulava muna ichifungo mwikagoya ving'waji na mokaji magate imkulu na kaweka haulongozi wa wakulu wake. 21 Mfalume kambweleza mwikagoya ving'waji muna ukulu wake wa kumng'wiza, muladi yamwing'he nhungo mfalume muna yamakono. 22 Mbali mokaji magate imkulu katumbikigwa fana viyalongile Yosefu. 23 Mbali mwikagoya ving'waji hamkumbuke Yosefu, kamzimiza.