1 Chipindi icho Yuda kawaleka ndugu zake na kahita kukala na munhu zina jake Hila, Mwadulamu. 2 Uko Yuda kaiting'hana na mndele Mkanaani tati yake zina jake Shuwa. Yuda kamsola mndele iyo na kambandama. 3 Mndele wa Shuwa kapata wimo na keleka mwana wa chilume, Yuda kamtanga zina jake Eli. 4 Kapata wimo kaidi na keleka mwana imwenga na kamtanga zina jake Onani. 5 Kaidi kapata mwana imwenga wa chilume, kamtanga zina jake Shela. Shela viyelekwe, Yuda kakala uko Kezibu.

6 Yuda kamfungiza zengele Eli mwanage chaudele, kwa muke yatangigwe Tamali. 7 Mbali Eli chaudele wa Yuda kakala na mbuli za mdukula haulongozi wa Mndewa Mulungu, ivo Mndewa Mulungu kamkoma. 8 Ivo Yuda kamulongela Onani ndugu wa Eli, "Hita ukamwingilile muke wa sekulu wako imgane, kwaviya niivo viulondeka utende udahe kumwelekela sekulu wako wana." 9 Mbali Onani kavimanya kuwa sigambewawe wanage bule, ivo viyambandame muke wa sekulu wake, ketilila hasi zimbeyu, sekeyampatile wana sekulu wake. 10 Chiyatendile Onani iviya chiha kwa Mndewa Mulungu, iviya nayo Mndewa Mulungu kamkoma. 11 Yuda kamulongela Tamali imkoyi wake wa chike, "Bwela kwa tati yako ukale ugane mbaka mwanagu Shela vondayakule." Yuda kadumba Shela sekeyadanganike fana viya ndugu zake. Ivo Tamali kabwela ukaye kwa tati yake.

12 Zifosa siku nyingi, maabaho muke wa Yuda mwana wa Shuwa kadanganika. Yuda viyakomeleze ndilo, kasegela na mbwiyake Hila yolawa Mwadulamu, wahita Timina kuwakanha mazoya ng'hondolo wake. 13 Tamali kahulika kuwa mkoyi wake wa chilume kakala yohita Timina kuwakanha mazoya ng'hondolo wake. 14 Tamali kayavula mawalo ya ukefilwa, maabaho kaigubika mtandilo na kakala hanhu ha kwingilila Enaimu, chibululu chikalile mwiinzila ihita Timina. Katenda ivo kwaviya kawona kuwa Shela kawa munhu mkulu mgima mbali Tamali hasoligwe bule na Shela.

15 Yuda viyamuwone Tamali kagesa kuwa kakala yochuuza lukuli lwake, kwaviya chihanga chake kakala yachigubike. 16 Havimanyile kuwa iyo kakala muke wa mwanage, kamuhitila baho hamgwazo ya inzila na kamulongela, "Nolonda nikubandame."

Tamali kalonga, "Kwizaning'ha choni uhanibandama?"

17 Yuda kamwidika, "Nizakwing'ha mwanaluti kulawa muna dibumbila jangu."

Tamali kamulongela, "Vose vinoga, ika wingilizi kulagusa kwizanigalila mwanaluti iyo."

18 Yuda kamuuza, "Kolonda nikwing'he choni fana wingilizi?"

Tamali kamwidika, "Ning'he chinhu chili na luzabi chili na chilaguso chako na mhome." Yuda kamwing'ha vinhu ivo vose na kambandama, nayo kapata wimo.

19 Maabaho Tamali kasegela, kahambula mtandilo uyaigubike, kayawala mawalo yake ya ugane.

20 Yuda kamtuma ija imbwiya Mwadulamu yamgalile mwanaluti mwanamke ija, muladi yambwelezele wingilizi uyamulekele, mbali hamfikile bule. 21 Kawauza wanhu wa Enaimu, "Kakulihi muke ija malaya, yakalile hano hana dikulugumbi, yotenda umalaya fana nzila ya kutosela nyang'hiti za milungu?"

Wanhu wamwidika, "Hanhu hano hahakalile na muke malaya bule."

22 Hila kambwelela Yuda na kalonga, "Simuwonile bule. Wanhu wa hanhu baho walonga kuwa hano hahakalile na muke malaya."

23 Yuda kalonga, "Leka yavisole vinhu ivo. Sekeyachitendeze wanhu wachizehe. Weye mwenyewo kuwona nimgalila mwanaluti mbali humfikile bule."

24 Viifosile miyezi mitatu, Yuda kalongeligwa, "Mkoyi wako Tamali muke wa mwanago, kapata wimo kwa ugoni wake."

Yuda kalagiliza, "Msoleni yalavigwe kunze yasomigwe moto mbaka yadanganike."

25 Viwakalile womulava kunze, Tamali katuma usenga kwa mkoyi wake wa chilume, "Niye nina wimo kwa munhu mwene vinhu vino. Umulole na ummanye munhu mwene chinhu chili na luzabi, chili na chilaguso chako na mhome ino."

26 Yuda kavimanya vinhu ivo na kalonga, "Tamali kanoga kufosa niye, kwaviya simsolele mwanangu Shela." Kwandusila siku iyo Yuda hambandame kaidi Tamali.

27 Viifikile chipindi cha Tamali kwiibasula, kukala na mambasa mwiinda yake. 28 Usungu wa kwiibasula viumfikile, mbasa imwe kalava mkono kunze, nayo imulala kamfunga kwa lusingija ludung'u kuno kolonga, "Ino niiyo yanduse kwelekigwa." 29 Mbali imwana viyaubweleze mkono mgati, ndugu yake kandusa kwelekigwa. Imulala kalonga, "Hee weye kufosa kwa nguvu kulawa kunze!" Ivo katangigwa zina jake Pelesi, fambulo jake "Kulawa kwa nguvu." 30 Maabaho sekulu wake nayo kelekigwa kuno kana lusingija ludung'hu muna umkono wake, nayo katangigwa zina jake Zela.