1 Maabaho nzala ikala ng'hulu muna iisi. 2 Viwakomeleze kuja ndiya yose yoigaligwe kulawa Misili, tati yawo kawalongela wanage, "Bweleni uko mukachigulile ndiya chidogo."

3 Mbali Yuda kamulongela, "Munhu ija kachikalikila, kalonga, ‘One hamwizile na ndugu yenu, sizamuhokelani.’ 4 One uhatogola chihite na mdodo wetu, chizahita kukugulila ndiya. 5 Mbali one uhalema sekeyahite na cheye, hachizahita bule, kwaviya munhu ija kachilongela funhufunhu ‘Sizamuhokelani mbaka mwize na mdodo wenu.’ "

6 Isilaili kalonga, "Habali moniguma muna diyangwayangwa kwa kumulongela imunhu iyo kuwa munayo mdodo wenu imwenga?"

7 Wawo wamwidika, "Imunhu iyo kachiuzagiza ugaluga ng'hani kusonhela mbuli zetu na welesi wetu, kalonga, ‘Tati yenu yang'hali mgima? Mumpata ndugu imwenga?’ Cheye chimwidika kwaviya viyauzile. Chihavimanyile vilihi fana kochilongela mwize na mdodo wenu?"

8 Yuda kamulongela Isilaili tati yake, "Mulekelele mwanago hamwe na niye, chizasegela mwanza umwe muladi cheye na weye na wanetu sekechidanganike. 9 Niye nokuwa mwingilizi, weye kwizanyamhilila niye. One simbweleze kumwako, nidaigwe niye siku zose. 10 Mbali one hachikalame bule, chahahitile uko na kubwela hano miyanza midi."

11 Tati yawo Isilaili kawalongela, "Haya kwaviya yolondeka iwe ivo, basi, tendeni ivo, soleni kulawa muna imifuko yenu mazao yanogile ya isi, mavuta chidogo ya mkwazu na uki chidogo na ubani na mavuta yonung'ha goya na mbeyu za kuja. 12 Soleni hela ya miyanza midi yoilondeka, kwaviya yolondeka mwiibweleze hela ija yoikigwe muna yamalobota yenu. Yodahika ibwelezigwa chiubananzi. 13 Msoleni ndugu yenu na muhite nayo kwa munhu iyo. 14 Mulungu Yeli na Udahi yawanogele kupata ubazi haulongozi wa munhu iyo na yawalekelele ndugu yenu imwenga, kezamwing'hani Benyamini na ndugu yenu imwenga mubwele wose, one nahalondeka niwagize wanangu, nizawagiza."

15 Iwandugu wasola vitumetume na hela miyanza midi kufosa ija ya ichanduso. Wahita Misili hamwe na ndugu yawo Benyamini. Viwafikile wahita kwima haulongozi wa Yosefu. 16 Baho Yosefu viyamuwonile Benyamini hamwe nawo, kamulongela ndolezi wa kaye yake, "Wasole wanhu wano mbaka ukaye yangu. Wezakuja ndiya ya imisi hamwe na niye. Chinja mnyama na usasale ndiya." 17 Ndolezi wa kaye katenda fana viya viyalagilizigwe, kawagala wanhu wawo muna ikaye ya Yosefu.

18 Viwawone wogaligwa muna ikaye ya Yosefu, wadumba na walonga, "Chogaligwa kuno kwa ichimu cha ihela ija ichibweleziligwe muna yamalobota yetu vichizile ichanduso, muladi yadahe kupata ulongelo wa kuchidusa kwa kuchihoka vihongwe wetu na kuchitenda chiwe watumwa wake."

19 Viwawile hana ulwivi lwa ikaye ya Yosefu, wamulongela msang'hani, 20 "Chilekelele mwenevale, chiza hano kugula ndiya ichanduso. 21 Vichifikile kaye ya nyambenyambe, chifungula malobota yetu, chila imwe wetu kafika hela muna yamalobota yake. Ivo chinayo, chikubwelezela. 22 Iviya chinazo hela zimwenga za kugulila ndiya kaidi. Hachivimanyile bule yelihi yekile hela yetu muna yamalobota yetu."

23 Ndolezi kawedika, "Muwe na tindiwalo na sekemdumbe. Mulungu wenu, Mulungu wa tati yenu, niiyo yekile hela zenu muna yamalobota. Nihokela maliho yenu." Maabaho kawagalila Simeoni.

24 Ndolezi kawasola mbaka mwiikaye ya Yosefu. Kaweng'ha mazi wanawe nhende na kawadima vihongwe wawo. 25 Nawo wasasala vitumetume vawo va kumwing'ha Yosefu, vondayabwele imisi, kwaviya walongiligwa kuwa wezakuja ndiya hamwe nayo. 26 Ivo Yosefu viyabwelile ukaye, wasola vitumetume muna ikaye na wamtumbalila mavindi mbaka chihanga chidalisa hasi. 27 Kawauza kusonhela ugima wawo na maabaho kalonga, "Munisimulila kusonhela tati yenu imulala, vino kachelwa? Vino yang'hali mgima?"

28 Wawo wamwidika, "Msang'hani wako tati yetu yang'hali mgima na kachelwa." Maabaho wamtumbalila mavindi mbaka chihanga chidalisa hasi.

29 Yosefu kachinula chihanga chake na kumuwona ndugu yake Benyamini, mwana wa mami yake na kalonga, "Vino ino niiyo ndugu yenu imdodo, yomnilongele mbuli zake? Mulungu yakunogele, mwanangu." 30 Yosefu kahalawa hima hima hanhu baho, kwaviya kaihulika giyogiyo kwa ichimu cha kumemwa na ubazi wa ndugu yake, kahita kuna ichiheleto chake na kalila umo. 31 Viyakomeleze kunawa chihanga chake, kalawa kunze na kaiyangambiza, kalagiliza yagaliligwe ndiya. 32 Yosefu kagaliligwa ndiya yake yaidumwe mwiimeza, na wandugu zake waidumwe. Wamisili wadile hamwe iviya waigola, kwaviya mwiko kuja ndiya hamwe na Waebulaniya. 33 Ndugu zake Yosefu wakala kwa kuipanga haulongozi wake kwa kusondelela lika jawo. Kwandusila wa mwanduso mbaka wa uhelelo, wakala woilola kwa mwazanyo. 34 Ndiya ikala isoligwe kulawa kwa Yosefu na kugaligwa kumwawo, mbali Benyamini kagoliligwa miyanza mitano kufosa ndugu zake. Ivo wang'wa na wadeng'helela hamwe nayo.