1 Mɔkɔ lasi shɔpɛ̃ni nɛ, ama a gakiutɔ naa u pɛ mɛye. A tuu jaa vɔyi naa mɛzɔ̃yi, 2 a tuu su pɛ̃niyi naa miniyi, a tuu jasu nyarãyi naa mɛnayi, a sɔɔ sisɨntɔ wɔsɔ-wɔsɔ.

3 A bassi su vɔyitɔ shɔgbeteyi shɔ naapɔ̃sinɛ ɓayɛ. 4 Ama naa suvɔ u jaayi kɛ ɔ̃nɛ aɗɔn ko jawuruyi, vigbete i gaa matinɛ ai wɛrɛ pɛ i nyaba vishonɛ Ɗa gɨnnɛ, kɛ a nyabamkɔ i sɔɔri ɓeye a ɓini a ɓɛuru a ɓɛtarani naapɔ̃sinɛ gbeteyi kpaayɛtɛ, aruviya vimkɔ pɔ̃ Ɗalapa u nta tɔ̃vɨnrɛ. 5 Suvɔ shɔgbeteu a yɔbmyɛ, shɔgbeteu shɔ naapɔ̃sinɛ ɓa, pɔ̃ sisɨn a Ɗalapa bi, u yɛ ɗekɨn a Ɗa gakinɛ zɨmba a niti ni u gakiu rɛ u pɔ̃siunaa. 6 Ama suvɔ gbete ãyuu aru u nta tɔ̃vɨn a jazɛbii, ko u a suruni vɔ ɓɛɛ tɛttɔ gboti, 7 A kɔsiyinyantɔ, nɔgbete shɔ kpaayi ɓa a ruuvinini ɓa. 8 Ama shɔgbeteyi ji pɔ̃siu shɔbiiyi naa ɓa, badijo u shɔwɛrɛyi, i masinyatɛ ã sisɨn ãnɛni, i vipɛlinɛ tɛɛ shɔ gbeteyi ji ã sisɨn ɓatɛ.

9 Suvɔ gbete ji tɛɛ saa laa taati ɓa, mɔkaa gau niinɛ atette suvɔyini. nyakonɛ wɔsɔ̃n, ɔ̃tɛ kaka jazɨng akɔrɔ u ɔ̃ suvɔ au tɛ vɔshɔ ɓa gbete. 10 u ɔ̃ su gbete shɔ zɛu tɛttɔ pɛli vitɔ̃vɨng a shɔ naapɔ̃sinɛniː su gbete mati ɓɛɛ jaayi vitɛ tɔ̃vɨnyɛ, su gbete tɛ shɔ zatiyi naatɔ au wɛrɛniyɛ, au rooriyuu pɛli Kirisa wɔyi vishonɛtɔ, atette yuukɔnɛ pɔ̃si shɔ naatɔ, au ãyuu a tɔ̃vɨn shonɛyɛ.

11 Ama mɔkaa tosi nyarã suvɔyi niinɛ a suvɔyi nii ni; aruviya i bi kɛ kasinɛ naa i tɛ vɔshɔ, i risi Kirisi kɨntitɔ, 12 aru vɔshɔ gbeteyi tɛ sɔ̃nyɛ, arumkɔ Ɗalapa yɛ tasiyi raatɔ. 13 Ɓa ukɔ sheeli ɓa i wariyuu i ɔ̃li waati i ɗɔgbeteyi gɨn wɛrɛ-wɛrɛyɛ; ama ɓa ɔ̃nɛ wese gbeteyi ɔ̃yɛkɔ sheeli ɓa, i nwanya shɔ woonɛ a ɓiishanɛni i to vishonɛ gbete ɓayi ɓɛɛ ɓa, au ji tɔ̃ɓayɛ. 14 Aruukɔ ang kasinɛ suvɔ jasunyarãyi tɛ vɔshɔtɔ, i kpaa jaayi i kɔi wɛrɛtɔ, nɔgbete u nɔpɔ̃yi kpaa nyaba gbeteyi nwanwa kɔ̃linɛ ɓa au yuuni ɓa. 15 Aruviya suvɔ wɔyi i yaa nyabatɛ gboti i ɗɔ japɛ̃pɛ̃ɛ̃ gɨnnɛ. 16 Ama naa su Kirisa wɔyi suvɔ kɛ ɔ̃nɛ ai wɛrɛni ɔ̃riutɛ kaka jazɨng akɔrɔ u pɔ̃siunaatɔ, shɔkɔ pɔ̃nɛ nɛ shɔ wɛrɛ Ɗa i pɛlirɛ, nɔgbete shɔ wɛrɛ Ɗa i kpaa nyaba gbeteyi pɔ̃si suvɔyi naa kɛkn a shɔ gbeteyi shɔ naapɔ̃sinɛ ɓani.

17 Shɔpɛ̃ni gbeteyi pɛlivishonɛ yupɛ̃ni tɔ̃vɨn pɛ tɔ̃vɨn shɔu shoritɔ tɔ̃vɨn, badijo shɔgbeteyi nwa Ɗanyaruubii fɛ̃ɛm yɛ a shɔ vimatinɛni. 18 Aruviya laabeenɛ Ɗanyaruubii shanɛ, <<Shɔ ku gunapu nyaɓa naakɛ ɔ̃nɛ aɗɔ vishonɛ pɛlinɛ a jaa, shɔ vishonɛ pɛlinɛ tɔ̃ɔ̃tɔ u kpaa u viɗɔnwanɛtɔ.>> 19 Mɔkaa pɔ̃naanɛ a nyayeelinɛ gbete shɔ pɛli shɔpɛ̃ni yɛni, setɛ shɔzɛ ziti ko taati i shitɛ aa kɨntini. 20 A shari shɔ gbeteyi pɛli ruuvini gãgã a shɔnɔɔ, aru zɔ gãsiyi i yɛ ntasetitɔ.

21 A Ɗalapa ɗekɨn a Kirisi Yesɔ, a Ɗajashonɛlayi wɔsɔ-wɔsɔ, n ãsaanya a gɨn nyakɔsinɛmtɔ mɔkaa tasi yuu vɔsinɛ nɛ ko tasinɛ nɛn kasi ba shɔwɔ tɛɛ shɔ gãsiyitɔ aa vigbete a pɛliyɛni. 22 Mɔkaa nisinɛ a lɔɔ shɔwɔ a pɔ̃siunaa a yuu nɛu ɔ̃ yupɛ̃ni setaa zɛ tɛttɔ nɛ ãsisɨntɛ a Uɓeyelapa biini. A ɓasiyuu ɓa a shɔwɔyi ruuvinini ɓa ama a sã a yuu a ɔ̃ wɔsɔ-wɔsɔ.

23 Mɔkaa ɓoonɛ miikɔ sheeli ama ɓoo mii inabi fɛ̃ɛ aru yɛti kɔnɛ aa vɔrɔbii, u pɔ̃saanaa viu pũrɛ aa yɛti.

24 Shɔwɔyi ruuvini a shɔ nɔɔ a ɓili weze, shɔ ɓɛɛ ruuyeenɛ ai yuu shɔ yɛ zɛyi ruuvinitɔ; ama zɔ gãsiyi ruuvini shɔ zɛ a knti. 25 Ji nankɔ vishonɛ tɔ̃vɨn a ɓili weze shɔ zɛtɔ, ko shɔgbete ɓa ɓili ɓa shɔ ɓusi dɔɔɓa.