1 N kasirɛ ɔ mɛɛ sisɨntɔ ang yuuni, ko n pɛli vi naa rang! n gakɔɔtɔ ɔ pɛlitɔ. 2 N kaagɨntɔ awɔ yuuni nagbete Ɗalapa pɛliyɛ; ɔ pɛ naa nyara wɔsɔ-wɔsɔ gbete n ma au yuu aru u tɛ vɔshɔ gbete sheeli, kɛ Kirisi au yuu. 3 Ama n ntaseti vigbete kpaa Hawawu yɛ, yɛ kpaawɔɔrɛ tɔkɨn ɔ yaa yuu-ãnɛ a sisɨn gbete a Kirisi binirɛ. Sɔɔ shovi au ruu kpɛ̃nɛni a ɗakiurɛ a pɛli ruuvinirɛ. 4 Shɔwɔ kaanɛ awɔ ɗɔbii ɔ tɛunaa weze ɓɛɛli ko nwarɔɔ ruu Yesɔ wɔ toti, ɓa shɔ gbete u nwanya au yuuninkɔ ɓa; a tete suru wɔ toti, ɓa ruu tɔ̃vɨn shɔ gbete ɔ tɛ si au naayɛ ɓa!

5 N ji pɔ̃ɓa ang sisɨnni nɛ shɔ gbete ɔ ɓainɛ <<Jashonɛ>> pɛ̃niba nɛi tɛntɛ a viwɔni ɓa! 6 Wɔɓa shɔ ji matin ɓa nɛn ɔ̃ shɔ nyanwanɛ a shɔ ɗekɨn ɓa, ama n zɛ ruutɔ, u tasɔɔ tɛttɔ a nyaba tot-tot kopiɗaviya.

7 N nwarɔɔ Ɗalapa ruu tɔ̃vɨn n ji kã ɓa viwɔ ɓa awɔ naani ɓa; n roorin yuutɔ aru n pɔ̃rɛ ɔ ɔ̃ shɔ tɔ̃vɨn, ɔ̃kɛtɛ ruuvini ang biini ya? 8 A ɗagbete n si aɗɔ vishonɛ awɔ teteyɛ shɔ Ɗa gɨnnɛ wɔɔyi i shorintɔ. Ɔ̃kɛ naa n raavi a shɔ Ɗa gɨnnɛ wɔyi naa n pɛlɔɔ vishonɛ awuni ya? 9 A ɗagbete n ɔkɔɔni nyazɔɔ n vi pɛlinɛ siɗɔn a saani n ji yɔrɔɔnya ɓa; Shɔ sisɨn ãnɛ Ɗabii shɔ gbeteyi shɛ a Makidiniya i n ti vigbete n kasiyɛtɔ kpai. Ji nagbete si tɛ̃ɛtɛ̃ɛyɛ, yɛ ɔ̃ ji nankɔ yɛnɛ ɗekɨn n yɛn yɔrɔɔ nyaba! 10 Aru sisɨn ãnɛ Kirisi gbete ang sisɨnyɛ, n ma tɛttɔ shɔwɔ ɓa ko gbete auyɛ zãrin naa waanɛ a nɔsisɨn a tipi Akaya ni ɓa. 11 N sha nankɔ aru n ji ɔrɔɔ ɓaya? Ɗalapa zɛ tɛttɔ n ɔrɔɔtɛ!

12 N yɛn yɛ ɗekɨn a vishonɛ gbete n aɗɔ pɛlinɛ dɔddɔrimni, aruviya pɛlinɛ nankɔ yɛ pɔ̃rɛ jashonɛ wɔyi i yɛ kpaa nyaba baasinɛrɛ a shanɛni nɛi shovi na gbete u pɛliyɛ. 13 Jamiyi ɓa jashonɛ tɔ̃vɨn ɓa, i pɛ jashonɛ nyalinɛyi, ama pɛ shɔ vishonɛ nyayeelinɛyi. I tasiyi yuu naa Kirisi jashonɛyi. 14 Ɓa vinɔlusinɛ ɓa! Ko japɛ̃pɛ̃ɛ̃ au yuu ma yɛ kɔsiu yuutɔ, u tasi naa u pɛ Ɗajashonɛlapa ɗɔsẽsẽ! 15 Aru nankɔ ɓa vinɔlusinɛ ɓa naa japɛ̃pɛ̃ɛ̃ jawɛrɛyi ikɛ kɔsiyi yuunɛ naa jawɛrɛ shɔ vitɔ̃vɨng pɛlinɛ. A kɨnti ni i yɛ kpaa ji vishonɛ gbete i pɛliyɛ.

16 N pasipɛtɔt: shɔwɔkɔ tɔnɛ nɛn rang. Ama ɔkɛ shanɛ nankɔ, ɔ mabii ɔ tuun ɓɛɛ ji naa rang, n kɔma n kpaa vi nɔsisɨn waanɛ pɛjo ko fɛ̃ɛ. 17 Vi gbete n sha dɔdɔrinkɔ ɓa vigbete Uɓeyelapa shayɛ nɛn pɛli nankɔ ɓa; ama ruum tasitɛ nɛn nwanya ɓɛɛjo naa rãng. 18 Ama shɔwɔyi aɗɔn ai waanaa a nɔsisɨn na gbete shɔzɛ kotipiyi waayɛ, n kɔma n waa pɛ jo ɗɔkɔ. 19 Ɔ ruukpɛ̃nɛ ɗɔn fɛ̃ɛm, ama ɔ tɛ rãng-yi naa a sisɨn nakazitiǃ 20 Shɔ gbete pɔ̃rɛ nɛ ɔ ɔ̃ foo, ɔ mɛsisɨntɔ awuni, ko rawɔ-nyaba ko ɗasɔɔ tari, ko kasɔɔ kɨnti zɛnɛ, ko wawɔnaa a nɔkɨn. 21 N ntayusẽtɔ n tɔnɛ u kaka ji yɛ nɔgbete u pɛli viwayirɛ ɓa!

Ama naa shɔwɔ kɛ waanaa nɛ a nɔsisɨn aru viwɔ, n kɔma n yɛn waanaa ji a nɔsisɨn ni n pɛli nankɔ, aɗɔm n nyanwanɛ pɛ naa rãngkɔ! 22 I kɛ ɔ̃nɛ shɔ Ibiraniyawa, n kɔma n ji nankɔ. Ikɛ ɔ̃nɛ Shɔ Israilayi, n kɔma n ji nankɔ. Ikɛ ɔ̃nɛ Ibirayi shɔ laduruyi, n kɔma n ji nankɔ. 23 I kɛ Kirisi jawɛrɛyi ya? N nwanya naa rang, Ama in ɓɛɛ jawɛrɛ gbete tɛyi tɛttɔ fɛ̃ɛm! N pɛli vishonɛtɛ tɛyi ɓɛɛtɛ, n ɔ̃tɛ a jahmni fɛ̃ɛm, n ɓoo waanɛ tɛttɔ fɛ̃ɛm, n ranaa tɛttɔ a vɔrɔnyani waanɛ ko-piɗaviya. 24 Yahudawayi wang kpata bmati au jaa kopi a tu maanɛ ɓa maani; 25 Yupɛ̃ni Romayi wang kpata ɓa taati; shɔ long a tari ɓa gbete, ɓa taati latosiyi sãkirɛ sɨn a ɓuzɨn kɔ, ang roo a mii niti niti, zɨng-zɨng a ɓuzɨn wapo, shɔ arɛ shɔ zɔ̃nkɨn. 26 Ang nyaba rakinɛ n kpɛsitɔ a viyaani a mii a shɔ nyaba zɛnɛyini, n kpaan yuu a ɓuzɨn viyaa a mashɔzɛ ɗɔbii a shɔ gbeteyi ɓa Yahudawa ɓa i naa; n kpaan yuu a viyaa a komoo, n kpaan yuu a viyaa a jaalaa, n kpaan yuu a viyaa a wapo, n kpaan yuu a viyaa a bɔɔyi ɗɔbii wɔsɔ̃n n kpaa yuu a jashonɛ nyayeelinɛyi naa. 27 N pɛli vishonɛ sẽnɛnɛ fɛ̃ɛm, n mɛɛsisɨn n ji roonɔrɔ ɓa; n nta nwotɔ a sutu miini; n ji kpaa vishaanɛ ɓa, n ji kpaa ɗɔronɛ ɓa a fãrã tosinɛni. 28 Ɓanɛ setɛn ɓali vigãsiyitɛ ɓa, kopileepiya kpai n ɓɛɛ ji ɗɔ gbete n yɔriyuu aru shɔ sisɨn ãnɛ a Ɗabiiyi yuu, 29 Naa shɔwɔ kaka ji ɔ̃ ɓa, n kɔma n kaka ɔ̃ ɓa, naa shɔ kɛ pɔ̃ shɔwɔnɛ u pɛli ruuvini, n sisɨn lɛsitɔ fɛ̃ɛm.

30 Kɛ ɔ̃rinnɛ kaka jazɨng akɔrɔ n baasirɛ, n yɛn baasi pɛ ayuu vigbete tasinɛ n yɛn zɛnɔɔ pɛlinɛ dɔɔɓa. 31 Ɗalapa a Uɓeyelapa Yesɔ ɓeye ukɔ ɔ̃rɛ shɔ gbete shɔ bɛliu dangdang! Zɛ tɛttɔ n yeeɓa nyaɓa. 32 A ɗagbete n si a Damasku gomna gbete a tipi kpati Aretas zẽ nyaɓa komoo aru nɛ shɔu sãntɔ. 33 Ama masayi ma rii raki i tosin a ɓuti i nɔsinrɛ a tipi komoo kaɓili, n ranaarɛ au naani.