1 Mɛlkizɛdak shom u si pɛ kpati salemi u Ɗalapa shɔ nyanwaanɛ pẽnɛba. Naɗagbete Ibirayi so a ɗɔɔ sɨtanɛ gbete Ɗashariu a kpati nɛ̃ɛ̃tiyi yuu, Mɛlkizadak tasi Ibrayi Ɗalapa susãri abi aɗagbete kpɛsiuyɛ, 2 a Ibirayi ãu viãnɛ atette vigbete u a wuniyɛ. (Dɔɔtanɛ ruu Mɛkizɛdaki nii ukɔ ɔ̃rɛ << kpati shɔ tɔ̃vɨn pɛlinɛ>>; aru usi pɛ salemi, u nii ɔ̃ sɔ̃nnɛ <<kpati ɔ̃nɛbiinyatɔ̃nɛ.>> 3 Shɔwɔ ji zɛu Mɛlkizadak u ɓeye, ɓini ko u ɓeuruyi wɔ ɓa, u lee yeenɛ ko lee vɔnɛ ɓa. U ɓɛɛji naa Ɗajaa gbete ɔ̃ naa shɔ nyanwaanɛ dangdang.

4 Ɔ kpaa sisɨn pɛ nɔgbete shɔm u banɛ ɔ̃ yɛ pɛ, Ibirayi u ɓewuru wuruyi ãu vi atette vigbete kpa aɗɔ sɨtanɛyɛ. 5 Aka Musa nya ãsinɛ, shɔgbete ai si shɔ nyanwaanɛ lawiyi laduru i tee viãnɛ a mɔɔyi naa, a ɓɛzɔyi naa, aru i ɓɛɛ si a Ibirayi laduru. 6 Ama Mɛlkizadak u si ɓa shɔ lawi laduru ɓa, ama tee viãnɛ a Ibirayi naa a tasiu Ɗalapa susãri bi, shɔgbete au kpa Ɗalapa ruuma yɛ. 7 Nyamasinɛ wɔɔ ɓa atette shɔgbete au tasi shɔ Ɗalapa susãri abiini ɓa tɛɛ shɔgbete au tɛɛ Ɗalapa susãri tanɛ yɛtɛtɔ. 8 Aru shɔ nyanwaanɛ, viãnɛ pɛ shɔgbete i vɔtɛttɔ i tɛɛrɛ; Ama a Mɛlkizadak kabii viãnɛ ɓɛɛ shɔgbete i a suruniyɛ i tɛɛrɛ, nɔgbete laabeenɛ Ɗanyaruubii shayɛ. 9 Shɔwɔɔ yɛ shanɛ, aɗagbete Ibirayi shou viãnɛyɛ, lawi (shɔgbete a ɓɛwuruyi tɛɛ viãnɛu yɛ) sho sɔ̃njo. 10 Shɔ sha vim ɗɔkɔ aɗagbete Ibirayi i kpɛsi zɔ a Mɛlkizɛdak ni si shɔji yee lawi pɛ ɓa, ama u sipɛ ɓɛwuru ɓuzɨn bi.

11 A nɔgbete shɔ nyanwaanɛ lawi laduru i pɛli viyɛ ɔ̃tɛ gbete a Musa nya ãsinɛ vimatinɛni gbete shɔ ã shɔ Israilayiyɛ. Si kɛ pɛlinɛ nɛ shɔ nyanwaanɛ gbete ai Lawi laduru iyɛ zɛnɔɔ vitɔ̃vɨng n-tinɛtɔ, si ruu shɔ nyanwaanɛ tot wɔɔ anɛ tokɨn ɓa, nɔgbete Mɛlkizadak vipɛlinɛyɛ, ɓa naa nɔgbete Haruna vipɛlinɛ ɔ̃ yɛ ɓa. 12 Naa shɔ nyanwaanɛ vipɛlinɛ kɛ kosinɛ, vimatinɛ aru nya ãsinɛ ma yɛ kɔsijo. 13 Uɓeyelapa shɔgbete a shɔ shavim au yuuyɛ, shɛjo a laduruwɔ tot, u shɔ laduruwɔ ji pɛli vishonɛ shɔ nyanwaanɛ ɓa shãni ɓa. 14 Kopiya zɛtɛttɔ nɛ Uɓeyelapa shɔ yeu a shɔ Yahuda i laduru; Musa ji nwanya ɓa aru laduruni ɓa aɗagbete nwanya a shɔ nyanwaanɛ yuuni ɓa.

15 Ruwu yɛ ɗekɨn a satinɛni waanɛ, aɗagbete shɔ nyanwaanɛwɔ shɛrɛ tot naa Mɛlkizadak. 16 Shɔu ɔ̃ shɔ nyanwaanɛ ɓa ka jashɔzɛ nya ãsinɛ ɓa, ama a kaka ɔ̃nɛ a suru gbete sɔ̃nya ɓa dangdang. 17 Aru laabeenɛ Ɗanyaruubii shanɛ, <<a yɛ ɔ̃ shɔnyanwaanɛ dangdang, nɔgbete Mɛlkizadak vipɛlinɛ ɔ̃yɛ.>> 18 Kɛɗɔn nya ãsinɛ gbaali shɔ pɔ̃tɛ kagbete, aru u kaka ɓa u vishonɛ pɛ kɔ̃linɛ. 19 Aru Musa nya ãsinɛ vimatinɛ ji yɛ ɓa u pɔ̃ virɛ u ɔ̃ tɔ̃vɨn wasa-wasa ɓa. Ama dɔdɔrim shɔ pɛli nyaba sisɨn pɔ̃nɛ wɔɔtɛ tɔ̃vɨn gbete a kaukɔ u yɛ kpaa anɛrɛ maani a Ɗalapa ni. 20 Ɗalapa teenɛni aɗɔ, aru ruu siɓa ɗɔn ɓa aɗagbete shɔ nyanwaanɛ wɔɔyi itoti shonɛ nyanwanɛyɛ ɓa. 21 Ama Yesɔ ɔ̃ shɔnyanwanɛ aka teenɛ aɗagbete Ɗalapa geliunɛ,

<<Uɓeyelapa teetɛ au ruumanɛ nɛ

nyɛ kosi nyanwanɛ ɓa

a yɛ ɔ̃ shɔnyanwanɛ dangdang.>>>>>

22 Ji ruu teenɛnkɔ, Yesɔkɔ ɔ̃rɛ shɔgbete ruumanɛu tasinɛ ukɔ ɔ̃rɛ vitɔ̃vɨng pɛ̃niɓa.

23 Ruu tot-tot wɔɔ si ɗɔnː shɔnyanwaanɛm wɔɔyi isi ɗɔn waanɛ, ai ruu vɔnɛ bi jashɔzɛ iji zɛnɔɔ vishonɛ nyayisinɛ ɓa. 24 Ama Yesɔ yɛ ɗekɨn au vishonɛ shɔnyanwanɛni sãnɛni, aru u au yuu ɔ̃ a suru ni dangdang. 25 Arumkɔ u vishanɛ kaka aɗɔn, dɔdɔrim yɛnɛ ɗekɨn, u raa shɔgbete i ã sisɨntɛ a Ɗalapa bi au kabii, aru u a suruni dangdang u sã shɔ nɔgbete Ɗalapa si sã shɔyɛ.

26 Yɛsɔkɔ ɔ̃rɛ shɔnyanwaanɛ pɛ̃niɓa yɛ pɛliu vigbete u kasiyɛ. Upɛ wɔsɔ-wɔwɔ u ruukɔ̃linɛ ko ruuvini au yuuni ɓa; Ɗalapa pɔ̃u kagbete a shɔruuviniyi kabiini a basiurɛ kolapa lapa. 27 U ɓa naa shɔnyanwaanɛ pẽnɛba gãsiyi ɓa; ji ɔ̃ ɓa nɛsetɛ ã viyuu ãnɛtɛ a lee-lee ɓa au yuu ruuvini ko a shɔzɛyi ruuvini ɓa, ã viyuu ãnɛ ɓagbete sheeli kpai, aɗagbete ãu yuuyɛ. 28 Musa nyaãsinɛ lɔɔ shɔgbete i ji yɛɓa i ɔ̃ shɔnyanwaanɛ ɓa nɛi ɔ̃ shɔnyanwanɛyi; ama Ɗalapa ruumanɛ gbete ma a teenɛ, gbete a a knti nyaãsinɛ, lɔɔ ɓɛɛjaarɛ shɔgbete Ɗa pɔ̃u shɔnyanwaanɛ dangdang yɛ.