1 Naa Yesɔ isi nyanwane tɛ aru yuu vigbete pɛli yɛ ni piti kpai, a geli u jaɗɔyi nɛ, 2 <<Naa ɔ zɛ ɓang kɔ, dii yumusinɛ pasika yɛ tɛ lee ziti shɔyɛ ã Yesɔ shɔzɛ jaa ne shɔ ɓau naa laa. >>

3 Kɛɗɔn shɔ yupɛ̃ni nyawanɛ jaa Ɗa a shɔ pɛ̃niyi i toli nyarɛ a kpati pɛ̃niɓa ɗekɨn gbete u nii nɛ kayifa, 4 A ɗɔukɔ i ma nya nɛ sã Yesɔ kaali a nyou vɔrɔ rɛ. 5 <<Ama yɛ ɔ̃ ɓa lee yumusinɛ pasika ɓa, vigbete shɔ yupɛ̃niyi i shayɛ a kpati ɗekɨn nɛ, aru gbete shɔyɛ yusi nya rɛ.>>

6 Aɗagbete Yesɔ u a Betani yɛ a shɔwɔ wɛrɛ shɔ ɓaune Sɛmon shɔ vibii, 7 Suu wɔ a Yesɔ ɗɔbii a noo wɔ gbete u saa ayuu ni, tɛriu ayuu aɗagbete usi ɗɔ vishaane.

8 Naa Yesɔ jaɗɔyi zɛ vigbete suu pɛliyɛtɛ, i sisɨn lɛsi rɛ. i shanɛ <<Ɔ lɛsi vim piruviya?>> 9 <<Shɔ si mɛli noom tɔ shɔ si kpaa saa awuni waa-ne a ã saa u shɔgbete i viɓa naa niɓa.>>

10 Yesɔ zɛ vigbete ai sisɨn yɛ tɛttɔ, a geli ne, <<ɔ yɔri suum pi ruviya? Pɛli pɛ vitɔ̃vɨng ang ɗɔ bi ni. 11 Ɔ ɓɛɛ ji lee -lee a shɔ rayini a ɗɔzɔ, ama n yɛ ɔ̃ɓa ɔkɔni lee -lee ɓa. 12 Noo gbete suu tɛ̃rim abi mi ntorim nɔgbete shɔ yɛ gbãng yɛ. 13 Vi n kɛ gelɔɔ nem nizɛ, ɗɔgbete shɔkɛ nwari shɔ Ɗalapa nya ruubii nɛ a koo piti kpai, vigbete suum pɛliyɛ shɔyɛ nwayatɔ au yuu ni, u ruu bi shɔyɛ suki ɓa. >>

14 Kɛɗɔn atette Yesɔ jaɗɔ kopi tu ziti shɔgbete shɔ ɓaune Yahuza Isikariyoti yɛ shɔ yuu pɛ̃niba nya nwane a jaa Ɗa i ɗɔ bi 15 A hɨrɛ ne, <<ɔ yɛ ãng iviya nang kɛ mɛlɔɔ Yesɔ ne viya? >> Kɛɗɔn i gaa saa gbete shɔ pɛli a azurfa mbati atu kop i ãu rɛ. 16 Yune leeu kɔ Yahuza Isikariyoti kã nyaba gbete yɛ ãi Yesɔ yɛ.

17 A dii gbete shɔ gaa biki pasika yɛ lee gbete shɔ shaa borodi gbete yisi ɓa ɗɔn ɓa yɛ, Yesɔ jaɗoyi i au ɗɔ bi i hɨu nɛ, << kasi neu tɔ̃raa ɗɔ vishaa pasika pi ɗɔpiya? >>

18 Yesɔ risi nyanɛ, ɔ yɛ ɓuzɨn koomoo shɔ wɔ ɗɔbii ɔ geliunɛ, <<shɔ mala shaneː n lee atɛ maani. Nɛn yɛ shaa biki pasika jo a wɛrɛ kɔ au jadɔyi ni.>> 19 Yesɔ jaɗɔyi pɛli jo nɔgbete yesɔ geliyɛ kɔ i tɔ̃ri ɗɔ vi pasika shaa neu rɛ.

20 Naa ɗarɛ pɛlitɛ, Yesɔ au jadɔ kop atu ziti i ɔ̃ ɗɔ vishaane shaanɛ. 21 Aɗɔgbete i a ɗɔ vishaane shaanɛ yɛ, Yesɔ shanɛ, <<n gelɔɔ tɛ nizɛ, shɔwɔ au tetem yɛ mɛlintɔ. >>

22 I sisɨn lɛsi rɛ i yuu gbete gbete i hɨ Yesɔ nɛ, <<Uɓeyelapa n kɔya?>>

23 Yeso risi nyanɛ, << shɔ gbete u shaa vishaane awuni waa gbete yɛ ukɔ yɛ mɛlin rɛ. 24 Jaa shɔzɛ yɛjo nɔgbete shɔ beeu ruubii yɛ. Shɔ gbeteu mɛli Yesɔ, jashɔzɛm yɛ kpaa yuu kɔne tɔǃ yɛ ɔ̃ruu a sisɨn naa shɔ si ji yeeu kɔɔ ɓa.>>

25 Kɛɗɔn Juda, shɔgbete mɛli Yesɔ yɛ, shaane, <<nizɛ ɓa n kɔɓa ya shɔ mala?>>

Yesɔ kasi nyanɛ, <<nn, mɔkɔ maa a shaa tɛ jo a nya. >>

26 I ɗɔ vishaane shaanɛ, Yesɔ tuu borodi lapa, a dɔ̃ri Ɗalapa a dali rɛ, a ã u jaɗɔyi rɛ, geliyinɛ, <<ɔ tɛne ɔ shaarɛ; shompɛ nbii.>>

27 Kɛɗɔn Yesɔ tuu jawaa mii lapa, a dɔ̃ri Ɗalapa a ãirɛ, geliyinɛ, << ɔ tɛne ɔ ɓoorɛ, ɔ piti kpai. 28 Shompɛ n kpaa gbete yɛ sɔ̃ri nya ruu gbete u ma a ɔkɔ ni, gbete shɔ yɛ tɛ̃ɛ a shɔzɛ bang i yuu aru shɔ sɔkii ruuvini. 29 N gelɔɔ tɛ, n yɛ boo mii inabin tɔɓa se lee gbete u kpɛsi zɔtɛ a ɔkɔni u yɛu boo kɛu sɔɔ a mayɛ ɗɔɔ kpati roone lapa.>>

30 Naayi nto soo Ɗa bɛline tɛ, i yɛkɛ kɔpɔ zeetung.

31 Kɛɗɔn Yesɔ geliyi nɛ, << Ɔ piti kpai zɨnɓan kɔ ɔyɛ Kɔddɔɔ ang yuu, laabeene sha tɛttɔ nɛː

<<< Ɗalapa yɛ nyo jagavivaayi tɔ,

mɛrɛ̃ɛ̃yi yɛ sãtikɛ tɔ.>

32 Ama shɔkɛ yuu sin lapa nɛ saa ni, n yɛn tɔ Galili n yaɔ a knti. >>

33 Bituru risi nya nɛ, << kɔ i kɛ kɔɗdɔɔ nɛ ayuu piti kpai, n yɛ kɔ ɓɛɛ jo ɓa.>>

34 << n gelɔɔ tɛ nizɛ, >> Yesɔ risi nyarɛ, <<zɨnɓankɔ, a yɛ maasin nya ɓa taati kpaasikɔ̃ yɛ ɓa nya kn. >>

35 Ama Bituru shanɛ, <<ko shɔyɛ nyotɔ a mokɔni, n yɛn tɔɓa nɛn ji zɛa nii ɓa. >> Yesɔ jadɔyi sha ji ɗɔkɔ piti kpai.

36 Yesɔ au jaɗoyi i yɛ ɗɔgbete shɔ ɓane Gesemani, Yesɔ geliyinɛ, <<ɔ ɔ̃ne ɗɔnkɔ n yɛ pɛ lapawa n gaki Ɗa pɛ. >> 37 Tu Bituru a Zabadi ɓɛjaayi babba ziti, a ɗɔuni u sisɨn gaa lɛsine a yukɔne ni. 38 kɛɗɔn a geliyi ne, <<N suru ɗɔ yɔri ɓoone waa-ne naa n si vɔtɔ. ɔ ɔ̃ ɗɔnkɔ u kn noo rɛ. >>

39 Gisi bi ɗekɨn, a wẽsi a tipi a gaki Ɗa ne, <<maye, naa yɛ pɛlitɔ, rang kati a raa gbete n kɛ ɓoonem.ɓa kasine ɓa, ama vigbete a kasi yɛ. >>

40 Kɛɗɔn a sɔrɛ a kpaa u jadoyi aɗɔ noro-roone. <<ɔ yɛ zɛnoo ɔ̃ne ɓa a n kɔ ni ɗagbete ɓaya? >> Yesɔ hɨ Bituru. 41 <<ɔ ɔ̃ shɔ ruu zɛnɛ a Ɗa gakinɛ aru japɛ̃pɛ̃ɛ̃ yɛ ɗakkɔ rɛ. Suru tu tɛ ama bi ji laaki ɓa. >>

42 Yesɔ yurɛ a yɛ ɗɔ Ɗa gaki sɔ̃nrɛ, <<maye, yukɔne gbete kane ang ɗekɨn ji ɔ̃ ɓa nɔgbete n yɛn raa naa aɗɔn ɓa, u ɔ̃ pɛ nɔgbete a kasiyɛ.>>

43 Naa sɔtɛ, arɛ a kpayi sɔ̃n a nororo, aru gbete si noro kpeti noo tɛ bang. 44 Ayuu sɔ̃nrɛ a yɛ ɗɔ Ɗa gakinɛ rɛ, a gaki rɛ ayuu vigbete gaki siyɛ.

45 A so u jaɗoyi ɗɔbii a geliyi nɛ, <<ɔ noro rone a susune niya? Ɔ zɛpɛ, ɗaa atɛ maani, shɔyɛ mɛli Yesɔ, jashɔzɛ a shɔ ruuvini i naa. 46 Ɔ yune, u yɛrɛǃ shɔgbete yɛ mɛlin yɛ atɛ.>>

47 Aɗagbete si Yesɔ ɗɔ nwanya yɛ, Yahuza, shɔzɛ gbete atette kop atu ziti mi, arɛ. Yahuza a moo ni waa-ne wɔsɔ̃n sojayi i sãli zaali a laabaa a naa, shɔ yupɛ̃ni nya nwane a shɔ pɛ̃niyi gbete a koou ikɔyi shɔyirɛ a Yesɔ ɗɔ bi. 48 Shɔgbete yɛ mɛliu ma tɛttɔ a shɔwiyi ni nɔgbete yɛ tasii Yesɔː <<shɔgbete n kɛ kɔ̃tiu naa nɛ bi sijo ukɔ; ɔ sãutɔ. >> 49 Yahuza yɛ Yesɔ ɗɔ bi, a shanɛ, <<binyatɔ̃ne u ɔ̃ a mɔkɔni, shɔ malaǃ >> a kɔtiu naa rɛ abi.

50 Yesɔ risi nyanɛ, << masa, pɛli vigbete n taa yɛ. >>

kɛɗɔn shɔwiyi i kpaa bi i sã Yesɔ rɛ. 51 A nankɔ shɔgbete i si a Yesɔ ni shɔzɛ gbete ai tete zɔ̃ zaali, a ko yupɛ̃ni shɔlansi pɛ̃niba nya nwane jawɛrɛ yusho awuni. 52 Yesɔ geliu nɛ <<Sɔri zaali nɛ au ɗɔ ɔ̃ne, arumkɔ shɔgbete kɛ tu zaali nɛ zaali kɔ yɛ nyou jo. 53 Ɔ ji zɛ ɓa n kaka aɗɔn n ɓaa maye nya u pɔ̃naa dɔdɔrim kɔ yɛ dɔ̃sɨn Ɗajashonɛlapa gbete tɛɛ kɨn kopi atu ziti tɛ ɓaya? 54 Ama arum kɔ shɔyɛ zɛkɛ pikovi nɛ Ɗalapa nya ruubii ɔ̃ nizɛ gbete laabeene shatɛttɔ ne yɛ ɔ̃ nankɔ viya?>>

55 A ɗawukɔ Yesɔ geli moo gbete au ɗɔ bi nɛ, << ɔ shɛ a zaali a laabaa ni a naa neyi sãntɔ naa shɔ sã ɓɔɔ ya? Alee -lee n ɔ̃ a jaa Ɗa n ɗɔgbete n maati shɔ vi ɔ ji sãn ɓa. 56 Ama vin piti kpai ɔ̃ nankɔ u sɔ̃nri nya vigbete Ɗa jaa shone i bee yɛ aru Ɗa nya bi ne ɔ̃ nizɛ.>>Kɛɗɔn Yesɔ jadoyi i yurɛ i yaurɛ.

57 Shɔgbete i sã Yesɔ yɛ i n tiu a kayifa ɗekɨn, shɔ nya nwanɛ pɛ̃niba, aɗɔgbete shɔ mala nya ãsine a shɔ pɛ̃niba dɔlaayi i toli yɛ. 58 Ama Bituru gɨu akɨnti aɗɔ kpɛlɛ, ane shɔ nya nwane pɛ̃niba u ɗɔ wɛrɛ. Torɛ a ɔ̃ a shɔgbete ga wɛrɛu yɛ nen zɛ vigbete yɛ kpaa Yesɔ yɛ.

59 Shɔ nya waane pɛ̃niɓayi a kpati shovi shoneyi i kã nyaba nya yelinɛ piti neyi sã Yesɔ awuni i ji kpaa ɓa. 60 Ama i ji kpaa nyaba ɓa ko gbete, ama si shɔwɔyi i yeli nya tɛttɔ au yuu toti.

au knti ni shɔzɛ ziti i shɛrɛ.

61 I shanɛ, << jaam shanɛ, <n yɛn zɛnotɔ n sã jaa Ɗalapa rɛ n maa a lee taati. > >>

62 Kɛɗɔn yupɛ̃ni shɔlansi pɛ̃niba yulaparɛ a hɨ Yesɔ nɛ, << a yɛ kasi nya ɓaya? A nya risi ne ɓaya aru gbete shɔ kɛ shanɛ ni ɓaya? >> 63 Ama Yesɔ ɔ̃ a nyani.

shɔ nya waane pɛ̃niɓa gelinɛ, <<n ɓasaa tɛ a Ɗalapa niiː geliu pɛ mɔkɔ ɔ̃rɛ kirisi ya, Ɗa jaa.>>

64 <<Nn, nɔgbete a shayɛ, >> Yesɔ risi nyarɛ. <<Ama n gelɔɔ tɛ pitiː a dekɨn ɔ zɛ yesɔ, jashɔzɛ ɔ̃tɛ a shɔgbete vi tɛu kaka ɓa nakɨn, kane a konyasi lapa . >>

65 Kɛɗɔn shɔ nya waane pɛ̃niɓa ntau fãrã bi a shanɛ, <<lɛsi Ɗalapa nii tɛǃ ɔ kã kɛpi sɛda shɔpiya? Ɔ kn noo pɛ, dɔdɔrim ɔ nta tɛ jo awɔ shoo lɛsi Ɗa nii tɛ 66 Ɔ zɛpɛ koviya arum ni viya? >>

<<Yɛtɛtɔ nɔgbete shɔ nyou vɔrɔ yɛ, >>i kasi nyarɛ.

67 I tasiu susãri a nokɨn i wau rɛ, shɔwɔyi wau naa a kashinya 68 I geliu nɛ, <<akɛ ɔ̃ne kirisi Ɗa jashone. geliu nɛ pi waa piya? >>

69 Aɗagbete si Bituru u a ɗɔ ɔ̃ne atette wɛrɛu, jasuu vishone wɛrɛu wɔ au ɗɔbii. << a ji a Yesɔ shɔ Galili ni a nya zɔ, jasuu sharɛ.>>

70 Ama ai dekɨn piti Bituru masii nya aɗɔn. << n ji zɛ vigbete a nwanya au yuuni ɓa, >>Bituru sharɛ.

71 Kɛɗɔn sã nyaba a yɛ nyaba wɛrɛ, a ɗɔukɔ jasuu vishone wɛrɛ wɔ zɛu sɔ̃n jo a geli shɔgbete i shili a ɗɔuni nɛ, << jam usi jo ɗɔzɔ a Yesɔ Nazara ni. >>

72 Ama Bituru masi nya sɔ̃n toti, a tɛrɛː << n ji zɛ jam jo ɓa. >>

73 A kɨntiu ni tɛ̃ɛ̃ti, shɔgbete i shili a ɗɔuni yɛ i yɛu ɗɔbii i geli Bituru ne, <<nizɛ kɔ a ji ɓɛzɔ kɔ, a nya nwane tasi tɛttɔ. >>

74 Kɛɗɔn Bituru yɛ ɗekɨn u ɗɔgbete wiriu yuu a teene ni shanɛ, <<n ji zɛ jam nii ɓa. >>

a kɨntiuni tɛ̃ɛ̃ti kpaasikɔ̃ ɓaa nyarɛ. 75 << Kɛɗɔn Bituru kpaa sisɨn aru gbete Yesɔ geliu yɛː kpaasikɔ̃ ɓɛɛ nya ɓane iyɛ masin nya ɓa taati. >> Kɛdɔn Bituru yurɛ a shɛ ɓili a sãki nyavɔ.