1 Kɛɗɔn Ɗa suru tuu Yesɔ yɛnɛ ɗɔpnsi nɛ japɛ̃pɛ̃ɛ̃ u ntau sisɨn. 2 Akɨnti nyamanɛ dii laa ziti zɨmba a niti ni, si Yesɔ nta nwɔtɛ waanɛ. 3 Japɛ̃pɛ̃ɛ̃ au ɗɔbii a shanɛ, <<A kɛ ɔ̃nɛ Ɗa jaa, risi tarim pɛ u ɔ̃ vishaanɛ.>>

4 Yesɔ kasinya nɛ, <<Labeenɛ Ɗa nyaruubii shanɛ: <Shɔzɛ gã ɓa a vishaanɛ kɔ sheeli ɓa, see ruu au shɛ a Ɗalapa nyayɛ.> >>

5 Kɛɗɔn japɛ̃pɛ̃ɛ̃ tuu Yesɔ yɛnɛ Urushalima tipi wɔsɔ-wɔsɔ koomɔ pɛ̃niba, a pɔ̃u ayuu sɔ̃sɔ̃no wɛrɛ Ɗa gakinɛ. 6 Japɛ̃pɛ̃ɛ̃ shanɛ,<<A kɛ ɔ̃nɛ Ɗa jaa, kɔbii nɛ a tasi a tipi. Labeene sha tɛttɔ nɛː

<<Yɛ ãsiu Ɗajashonɛlapaa nya a lapa aa yuu,

i yɛ kpɛa ai naa,

a yɛ kɔdɔɔ ɓa a tarini ɓa.>>

7 Yesɔ kasiunya nɛ, <<Labeenɛ Ɗanyaruubii shanɛ:<Mokɔɔ nta Uɓeyelapa a Ɗalapa sisɨn nɛ.>>>

8 Sɔ̃n ɗɔn, japɛ̃pɛ̃ɛ̃ tuu Yesɔ yɛnɛ yuu sɔ̃sɔ̃nɔ kɔpɔlapa a tasiu kootipi tottot i banɛ ai kɔrinɛni. 9 Japɛ̃pɛ̃ɛ̃ shanɛ, vimiyi piti kpai n yɛn ãtɔ, <<Akɛ tanɛ a yugboti ang ɗekɨn a basinrɛ.>>

10 Yesɔ kasiunya nɛ, <<Yɛ kawa, japɛ̃pɛ̃ɛ̃ǃ Labeenɛ shanɛ: Shɔzɛ u gɨn Uɓeyelapa a Ɗalapa, a bassi jo ukɔ shɛli.>>

11 Kɛɗɔn japɛ̃pɛ̃ɛ̃ ya Yesɔ rɛ, Ɗajaashonɛlapayi i arɛ itɛ Yesɔ naarɛ.

12 A ɗagbete Yesɔ nta nɛ Hiridu sã Yɔhana tɛ shɔ pɔ̃utɛ a jaahm, yurɛ a yɛkɛ Galili. 13 Yaa Nazara a yɛ Kafanahum, au a nya mii wapo a tipi Zebuluna a Nafitali 14 Vim pɛli nankɔ u tasi vigbete janyagadi Ishaya sha si tɛ̃ɛ̃tɛ̃ nɛː

15 <<Tipi Zebuluna a tipi Nafitali,

a nyaɓa mii wapo, a shɔ tɛ ɓooti Urudu ada,

Galili tipi gbete ɓa shɔ Yahudawayi ɓɛɛ ɓa

16 shɔgbete i ɗɔ kɨnri

i yɛ zɛɛ ɗɔ pẽnɛɓa sẽsẽtɔ;

shɔyi ɔ̃ a tipi sutu vɔrɔ

Ɗalapa n ti ɗɔsẽsẽ tɛ.>>

17 Yunɛ a ɗaukɔ yɛnɛ ɗekɨn Yesɔ gaa u vishonɛ kɛkn,<<Ɔ ya ruuvini pɛlinɛtɔ ɔ kɔsi sisɨn, aru lee gbete Ɗa yɛ ɔ̃ au laa kpatiyɛ atɛ maani.>>

18 A ɗagbete Yesɔ u ɗɔ rakinɛ a nya mii wapo a Galili, a zɛ shɔ ziti, Sɛmon gbete shɔ ɓaunɛ Bituru a ɓɛzɔ̃ Anduru. i ɗɔgbete i sã jazɨng a mii wapo, isi shɔ jazɨng sãnɛ. 19 Yesɔ geliyi nɛ,<<Ɔ anɛ, ɔ gɨnpɛ, n yɛn tasɔɔ nɔɔ shɔzɛ sãnɛ.>> 20 I yaa jang jazɨng sãnɛ bɛtɛk i gɨn Yesɔ rɛ.

21 Yesɔ yɛ sɔ̃n a ɗekɨn, a zɛ shɔwɔyi sɔ̃n ziti, Yakubu Zabadi bɛjaa, a ɓɛzɔ̃ Yɔhana, i si a yɛti latosi a ɓeye Zabadi ni, i ɗɔgbete i tɔ̃ri jang jazɨn sãnɛ. Yesɔ ɓai nyarɛ, 22 i yaayi latosi bɛtɛk a ɓeye ni kpai i gɨn Yesɔ rɛ.

23 Yesɔ raki a tipi Galili kpai, u ɗɔ shɔ vimati a Yahudayi ɗɔɔ ɔ̃nɛ, u ɗɔgbete waari shɔ nya ruu tɔ̃vɨn aru Ɗa lakpati, u ɗɔgbete gayi shɔ vɔrɔyi yɛ. 24 Aruumkɔ Yesɔ ruubii raa tipi Siriya piti kpai, shɔ n-tiu shɔ vɔrɔyi kɛ zɔng-zɔng, shɔ gbete i ɗɔ bi kɔnɛ ntanɛ, a shɔgbete i rãmãn a biini, a shɔgbete i gɨntɔ, a shɔ gbete i biɓɔtɔ, a gatiyirɛ kpai. 25 Moo shɔzɛ i gɨn Yesɔ waa-nɛ sãnɛ tipi Galili, komoo kopi, a shɔ Urushalima, shɔ Yahudawayayi, piti tɛnɛ ɓooti Yahudiya dani i gɨn Yesɔ rɛ.