1 Masayi ɔ shɔgbete ɔ zɛ nya-ãsinɛ gbete Musa mati shɔtɛttɔ, ɔ yɛ zɛ vigbete nkɛ shanɛntɔ, nya-ãsinɛm pɛli vishonɛ a shɔbii ji ɗagbete shɔu a suruni yɛ. 2 Nya-ãsinɛ gbete Musa mati shɔ u kaka ɔ̃ suwɛrɛ bi ji a ɗagbete si ɓɛɛvɔ doo a suruni yɛ, ama ɓɛɛvɔ kɛ vɔnɛ kɛɗɔn kpaau ɔ̃nɛ yuutɛ a nya-ãsinɛ gbete si mauyɛ a ɓɛɛvɔni. 3 Arumkɔ kɛ tɛ vɔshɔ wɔɔnɛ ɓɛɛvɔ doo a nɔni, shɔyɛ ɓaunɛ sukpangtang; ama ɓɛɛvɔ kɛ vɔnɛ, nya-ãsinɛ yasiu nyabatɛ gbororo u tɛ vɔshɔ wɔɔrɛ, ji pɛli kpangtang ɓa, naakɛ tɛ vɔshɔ wɔɔnɛyɛ. 4 N shɔbiiyi ji nankɔ a ɔkɔɔni, ɔ vɔ sɔ̃ntɛjo a gbete Ɗalapa ɓasɔɔtɛ a Kirisi biini, a nyaba nya-asinɛ Musa, dɔdɔrim ɔ ɔ̃kɛtɛ u ɓɛɛ, kɛ shɔ gbete shɔ yusiu a sàà yɛ, aru u vishonɛ ɔ̃nɛ tɔ̃vɨn u shɛtɔ a Ɗalapa ɗekɨn. 5 Aɗagbete u a suruni yɛ, nya-ãsinɛ ɗakaɔrɛ u yɛ ɗekɨn a vishonɛ kɔ̃linɛni gbeteu kasiyɛni, u vipɛlinɛ kpai u nyayisinɛ ukɔ ɔ̃rɛ vɔnɛ. 6 Ama dɔdɔrim Ɗalapa yasiu nyabatɛ a nya-ãsinɛ gbete ã Musa yɛni, aru siu vɔtɛttɔ a vigbete mau a jaahmyini, ama dɔdɔrim u bɛli Ɗalapa kɛ a ɔ̃nɛ tete u suru sɔɔ, bɛlinɛ gbaali gbete u pɛli Ɗalapa a nya-ãsinɛ tɛɛtɛ gboti.

7 U yɛ shakɛnɛ nyaãsinɛ Musa kɛ ruuvini ya? Ɓa ruuvini ɓa ko fɛ̃ɛ̃ǃ Ama ji nyaãsinɛkɔ pɔ̃rɛ n zɛ vigbete shɔ ɓaanɛ ruuvinirɛ, nya-ãsinɛ si ji shaɓanɛ,<<Mɔkɔ shoo vigbete shɔwɔɔ ɓɛɛ nɛ,>> N si ji zɛ vigbete shɔ ɓaanɛ vishoonɛ ɓa. 8 Ama a nyabankɔ nya-ãsinɛ yasi ruuvini nyaba u pɛli vigbete u kasi pɛlinɛ yɛ piti kpai, kɛɗɔn ruuvini ji ɔ̃ ɓa si nya ãsinɛ vɔtɛttɔ u kaka ɓa ɗɔn ɓa. 9 Ɗawɔɔ siɗɔn ang ɔ̃nɛ, gbete si n ji zɛ viwɔ ɓa nɛ nya-ãsinɛ Musa ɓa, ama naa nya-ãsinɛ atɛ, kɛɗɔn ruuvini yukɛ a kakani ang ɔ̃nɛni, 10 ang vɔrɛ. A nya-ãsinɛm gbete shɔ pɛli aru nɛu ã shɔ suruyɛ, ang bi n ting kɛ vɔnɛ. 11 Ruuvini shovi a nya ãsinɛ kaka a ɗakinrɛ, a nyɔ vɔrɔrɛ.

12 Arumkɔ Musa vimati pɛ vi wɔsɔ-wɔsɔ, a nya-ãsinɛni pɛ vi wɔsɔ-wɔsɔ, pɛ vitɔ̃vɨng. 13 Ama ɔ zɛng kɛ naa vi gbete tɔ̃vɨn ukɔ n ting vɔnɛrɛ ya? Ɓa ukɔ ɓa! Pɛ ruuvini ukɔ pɔ̃rɛ n kpaa vɔnɛrɛ, sho vishonɛ a vitɔvɨng, ruuvini n ting vɔnɛrɛ, aru u tadɔɔ nɔgbete jazɛ ruuvini ɔ̃ yɛ, a nyaba nya-ãsinɛnkɔ ruuvini shɛshi bi a ɓili nɔgbete u kɔ̃linɛ tɛɛ kakani.

14 U zɛ tɛttɔ nya-ãsinɛ Musa pɛ vi gbete sã visuru, ama n ɓɛɛ shɔzɛ gbete a kotipi, foo weze a ruuvini naa. 15 N ji zɛ vi gbete n pɛliyɛ ɓa, aru vi gbete n kasi pɛlinɛyɛ, n pɛli ɓa ukɔ ɓa, ama vi gbete n bẽẽyɛ, n pɛli ji ukɔ. 16 Asitɛɗɔkɔ vi gbete n pɛliyɛ ukɔ ɔ̃rɛ vi gbete n ji kasi pɛlinɛ ɓayɛ, vim tasitɛ nɛ nya -ãsinɛ pɛ vitɔ̃vɨng. 17 Arumkɔ ɓa nkɔng pɛli vimrɛ ang yuu ɓa, ama pɛ ruuvini gbete au ɔ̃ ang biiyɛ. 18 N zɛ tɛttɔ vi wɔɔ tɔ̃vɨn ɓa gbete ɔ̃ ang sisɨnni yɛ ɓa, kɛ ang ɔ̃nɛ jazɛ shɔzɛ kootipi, aruviya n sisɨn aɗɔn n pɛli vi gbete tɔ̃vɨn, ama n zɛnɔɔ pɛlinɛ ɓa. 19 N pɛli ɓa vitɔ̃vɨng gbete n kasi pɛlinɛ ɓa, ama ruuvini gbete n kasi pɛlinɛ ɓa n yɛ ɗekɨn ɓɛɛ ji ukɔ pɛlinɛ. 20 N kɛ pɛlinɛ vi gbete n ji kasi pɛlinɛ ɓa, vim tasitɛ nɛ ɓa nkɔng pɛli vimrɛ ɓa, ama pɛ ruuvini gbete ɔ̃ ang sisɨn yɛ u pɔ̃rɛ nɛn pɛlirɛ.

21 Aru nankɔ n zɛtɛ nya-ãsinɛ Musam pɛ ɗɔ vishonɛ pɛlinɛ, naa nkɛ kasi vi tɔ̃vɨn pɛlinɛ nɛ, kɛɗɔn n zɛ vikɔ̃linɛ ang ɗɔbii ko sheeli. 22 Ang sisɨn ɓuzɨn n tɛ Ɗalapa nya-ãsinɛ tɛttɔ. 23 Ama n zɛ sɔ̃n nya-ãsinɛ wɔɔ shovi shonɛrɛ ang bi, kɛ nya-ãsinɛ gbete au waaba a nya-ãsinɛ gbete n sisɨn kasiyɛ. Nya ãsinɛ ruuvini ukɔ pɔ̃ntɛ naa shɔ jahm a ayuu ruuvini gbete ang biiyɛ ni. 24 N ɔ̃tɛ viraakɔ sheeliǃ Pi yɛ ranpi a bim gbete kɛ n tinɛ a ɗɔvɔnɛ piya? 25 N dɔ̃ri Ɗalapa tɛ aru rantɛ a Uɓeyelapa Yesɔ Kirisi kabii!

Aru nankɔ shɔmpɛ vigbete n gelin yuu yɛ: n ang yuu n pɛ foo a Ɗalapa nya-ãsinɛ ang sisɨn, ama ang vishonɛ jazɛ shɔzɛ n bassi ɓɛɛjo nya-ãnɛ ruuvini.