1 Imtwatsa Imulungu kamlongela Joeli imwana wa Patueli imbuli ino.

2 Tegheletseni ichinu chino tsina sekulu,

muwambe ghamaghutwi iwanu wose wa Yuda!

Apfi ichinu ka achino ma chilawila kulawa hamwoneke

au mne ghamatsuwa ghawakalile tsina sekulu wenu?

3 Muwasimulile iwanenu imbuli ino

nawo wawasimlile iwana wawo

ne iwana wawo wawalongele iwana iwatsoweleka.

4 Wanzighe mapfunge kwa mapfunge waipfingilila imimeya,

ichilekighwe na nzige chijighwa ne balangulu,

ichilekighwe ne balangulu chijighwa ne chidanukila,

ichilekighwe ne chidanukila chijighwa ne mbulumundu.

5 Mwemwe yampatike imbwali, mlamke mlile,

mdomboketse mwemwe yampatika imbwali ya nzabibu!

Kwaapfila nzabibu tsose tso kutenda imbwali ingi tsihinyika.

6 Maasikali wengi ka lipfunge lye wanzighe lipfingilila isi yetu,

lina ingupfu na kulu ng'ani,

ghamatsino ghake ka ghe simba mmale,

na maghegho ghake ka ghe simba ipinga.

7 Lihinya mitsabibu yetu,

no kughegheda imibiki yetu ye mitini.

Libandula ghamaghome ghake nokwasa hasi,

na ghamaputila ghake ghalekighwa ghahela chinu.

8 Mwemwe iwanu, mlile ka imwali yapfalile lighwanda lye ghunila,

pfomlilila immale wake iyafile iyabamile kumkwela.

9 Kuduhu nambiko tse ipfijo wala nambiko tsa chokunwa tso kulapfa mng'anda mwe Imtwatsa.

Watambika iwomsang'anila Imulungu wonyanyana.

10 Imighunda tsaikala mahame ghendo,

lidongo likangaluka, apfo ingano tsainyika,

kuduhu tsabibu tso kukama chokunwa,

kuduhu ghamafuta ghe mitseituni.

11 Mwemwe yamlimagha mlile

mdomboketse mwemwe yamlolesa imitsabibu,

ingano ne shayiri tsihinyika,

ipfijo pfose pfatwihuwile kupfuna pfihinyika.

12 Imitsabibu inyala,

imibiki yose ye ghamatunda inyala mne imighunda.

Iwanu ng'awodeng'elela keli bae.

13 Mwemwe watambika, pfaleni ghamaghunila mlile,

mlile mwemwe yamsang'ana hanu ho kutambikila.

Mwingile mne ing'anda ye Imulungu mlile chilo chighima

kwaapfila kuduhu ipfijo wala chokunwa pfo ukulapfa pfikawe nambiko mne ing'anda ye Imulungu wenu.

14 Muwalaghitse iwanu waleke ukuja.

Muwakeme tsina sekulu ne iwanu wose we isi ya Yuda,

wetingane kune ing'anda ye Imulungu wenu,

na hamwo mkamlilile Imulungu.

15 Tutsoghaya mne litsuwa lila Imulungu lyayatsohigha,

litsuwa alyo lya habehi,

lyakutsa hamwe ne kukomighwa,

kulawa kwe Imulungu iyane ngupfu.

16 Ipfijo pfetu pfihinyika aku twololesa.

Kuduhu imunu iyoseka wala iyodeng'elela kune ing'anda ye Imulungu wetu.

17 Tsimbeghu tsakola mne lidongo,

tsikano tsahela chinu, natso tsihinyika ghendo

kwaapfila mduhu chokwika.

18 Lola iwanyama pfawolila kwa libatsi.

Lukoyogho lwe wang'ombe lohangaika,

kwaapfila wahela ichijo,

nalwo lukoyogho lwe wang'olo lwoghaya.

19 Nokulilila, ghwee Imtwatsa Imulungu,

ghumoto ghumalitsa ghumghina,

imilambi ya ghumoto ilakatsa imibiki yose mne imighunda.

20 Hata iwanyama wa kwibagho wokulilila ghweghwe,

kwaapfila ipfikolongo pfe ghamatsi pfinyala,

na ghumoto ghulakatsa ghumghina ghose.