1 Imtwatsa Imulungu kalonga,

"Ghamatsuwa agho hanitsotsitenda keli isi tsa Yuda na Yelusalemu tsinoghe keli,

2 nitsowakema iwanu wose,

niwaghale kuluwanda ikukemighwa Imulungu kohigha.

Ako nitsowohigha iwanu awo kwa aghala ghawawatendele iwanu wangu,

awo iwali wangu nene nimwenyegho.

Kwaapfila tsawawapwililisa iwanu wangu mne isi tsingi na

wawaghola iwangu wangu.

3 Na kwigholela iwanu wangu kwa ukwasa tsisimbi.

Tsawawautsa iwasongolo ili wapate sendi yo kuwahonga iwapinga pfiweghe,

wawautsa iwali ili waghulile imbwali.

4 "Mbama kunitenda choni mwemwe iwanu wa Tiro na Sidoni ne isi tsose tsa Filistia? Nene siwatendele bae chinu chochose chihile, apfo ka mwobama kuhitsa acho chamlonga niwatendela, nene nitsolongola kuhitsa acho chambama kunitendela. 5 Msola ifetsa na inzahabu yangu na pfinu pfangu pfinoghile ipfili pfa bei ng'ulu, mpfighala mbaka mne tsing'anda tse imilungu yenu. 6 Muwaghala iwanu wa Yuda na Yurusalemu kutali ne isi yawo, muwautsa kwa Wagiriki. 7 Lelo nitsowohitsa iwanu wangu wose kulawa ako kwamuwautsile. Nitsowohitsila aghala ghose ghamuwatendele. 8 Nitsowatenda iwana wenu iwamale ne iwapinga wautsighwe kwa iwanu wa Yuda, nawo watsowautsila Waasheba, iwanu wokala kutali ghendo. Nene Imtwatsa Imulungu nolonga. 9 Muwalongele iwanu we isi tsose imbuli ino,

weyandaye ghoya kwe ing'ondo,

wakemeni iwanu wane ngupfu, na

iwanu iwadahile kwitowa pfinoghile wetingane hamwe,

nawo watemelele.

10 Ghamaghembe ghenu mghanole ghawe mapanga,

tsisengo tsenu tso kupfunila tsiwe mighowa.

Hata iyali nyondenyonde yalonge

‘Nani pfipfila nina ingupfu.’

11 Itsani himahima mwemwe wose yamli habei,

na mwitingane kuluwanda."

Imulungu hulumsa iwanu wako wane ngupfu wawatowe.

12 "Lelo iwanu wose iwokala habei wehimitse,

watse kuluwanda ukukemighwa Imulungu kohigha.

Ako nene Imtwatsa Imulungu,

nitsokala na kuwahigha.

13 Lelo soleni tsisengo,

kwaapfila sambi chipindi cho kupfuna.

Mwingile muwahonde ka nzabibu

itsimemile sideke hanu ho kukamila.

Nzambi tsawo nyingi sideke,

ka mabigha ighamemile."

14 Makingili kwa makingili wamne lwanda lyo kuhighila,

mana litsuwa lye Imtwatsa Imulungu lya habehi.

15 Lutsuwa na lwetsi pfoghelighwa ichisi,

na tsinondo tsoleka ukung'aika.

16 Imulungu koduma ako Siyoni,

litsi lyake lyopfuma kulawa Yerusalemu,

ililanga ne isi pfoghudema.

Lekeni iwanu wake wotsumila kwe Imulungu,

kwaapfila yeye ka ubanda iuwakinga Waisraeli.

17 Aho ghweghwe Isiraeli,

kutsomanya ka nene Imulungu wako,

nokala Siyoni, chidunda changu chenzeluke,

Yerusalemu itsakuwa isi yenzeluke,

ne iwagheni ng'awotsotemelela keli bae.

18 Mna litsuwa alyo ipfidunda pfitsomema minzabibu,

na mne ipfidunda iwanyama watsolapfa ghamatsiwa.

Ipfikolongo pfose pfa isi ya Yuda pfitsomema ghamatsi,

imbwibwi itsolawila mne ing'anda ye Imulungu,

no kughelela ghamatsi mne lwanda lwa Shitimu.

19 "Lekeni Misiri itsakuwa mahame,

Edomu itsakuwa nyika,

kwaapfila tsawawapfingilila iwanu wa Yuda,

na wawakoma iwanu iwalihela nzambi.

20 Lekeni isi ya Yuda itsokalighwa matsuwa ghose,

na Yerusalemu itsokalighwa lweleko mbaka lweleko.

21 Nitsowohigha iwanu yawawakomile iwanu wa Yuda,

na sitsowalekelela bae wane tsinzambi.

Nene, Mtwatsa Imulungu nitsokala mna chidunda cha Siyoni."