1 Aghano ghagho ghamalonga gha Amosi yumwe wa iwadimi wa wang'olo wa ghumji ghwa Tekoa. Imulungu tsakamghubulila ghamaono gha iwanu wa Isiraeli miyaka mili ng'ana isi ihighisike baye, ahala Uzia hayakalile mfalume wa Yuda na Yeroboamu hayakalile mfalume wa Isiraeli.

2 Amosi tsakalonga apfino: Imulungu koduma kulawa kuna ichidunda cha Sayuni, kolapfa litsi lyake kulawa Yerusalemu, imighunda ya ukudimila iwanyama yosakala na imitsani mna chidunda cha Kalimeli yosakala.

3 IMNDEWA Imulungu kolonga apfino, "Iwanu wa ghumji ghwa Damasko tsawatenda nzambi keli na keli, apfo nene sitsoleka kuwahigha baye kwaapfila wawakana iwanu wa Gileadi kwa ipfinu pfa ukupfunila. 4 Nitsoghala ghumoto mna ing'anda ya Hazaeli nagho ghutsolakatsa tsing'anda tsinoghile tsa mfalume Benihadadi. 5 Nitsobena ipfinu pfa kuhindila ghamalango gha ghumji ghwa Damasko, na kuwalapfa iwanu iwokala mna ilwanda lwa Aveni, na mkulu wa Betedeni na iwanu wa Aramu watsoghalighwa wahamile Kiri."

6 IMNDEWA Imulungu kolonga apfino, "Iwanu wa ghumji ghwa Gaza tsawatenda nzambi keli na keli, apfo nene sitsoleka kuwahigha baye, kwaapfila wawaghogha iwanu kabila lyose wawatenda wawe watumwa kwa Waedomu. 7 Lelo nitsoghala ghumoto mna ubanda wa ghumji ghwa Gaza, nagho ghutsolakatsa ghendo tsingome tsake. 8 Nitsowakoma ghendo iwanu wa ghumji ghwa Ashidodi, na imkulu wa Ashikeloni. Nitsoghuhigha ghumji ghwa Ekironi, na Wafilisti wose iwasighale watsokomighwa."

9 IMNDEWA Imulungu kolonga apfino, "Iwanu wa ghumji ghwa Tilo tsawatenda nzambi keli na keli, apfo nene sitsoleka kuwahigha ghendo baye kwaapfila wawaghogha iwanu wose wa Edomu wala ng'awakumbuke baye lilaghano lya undughu lyawelaghane. 10 Lelo nitsoghala ghumoto mna ubanda wa ghumji ghwa Tiro, nagho ghutsolakatsa ghendo tsingome tsake."

11 IMNDEWA Imulungu kolonga apfino, "Iwanu wa ghumji ghwa Edomu tsawatenda nzambi keli na keli, apfo nene sitsoleka kuwahigha baye, kwaapfila wawo tsawawawinzilitsa ndughu tsawo Waisiraeli kwa ghamapanga, ng'awawonele libatsi baye, na imaya yawo ng'aimalile baye tsawakala na maya matsuwa ghose. 12 Lelo nitsoghala ghumoto mna ghumji ghwa Temani na kutsilakatsa ghendo tsingome tsa Bosra."

13 IMNDEWA Imulungu kolonga apfino, "Iwanu wa ghumji ghwa Amoni tsawatenda nzambi keli na keli, apfo nene sitsoleka kuwahigha baye. Kwaapfila wawatumbula iwapinga wana inda mna isi ya Gileadi hawang'ali woitowa wongetse ukulu wa isi yawo. 14 Lelo nitsoghala ghumoto mna ubanda wa ghumji ghwa Raba, nagho ghutsolakatsa ghendo tsingome tsake. Litsuwa alyo lya ing'ondo litsakuwa na chililo chikulu, na ing'ondo ayo itsakuwa ng'ulu ka nyahemu. 15 Nene Imulungu nolonga, mfalume wawo na iwakulu wake watsoghenda kukala akula kwawaghalighwe wahamile."