1 Mwemwe Waisiraeli mtegheletse longa lyamlongelighwe na nene IMNDEWA Imulungu, mwemwe yaniwalapfile kuna isi ya Misiri: 2 "Nene nimsaghulani mwemwe mliyeka kulawa mna iwanu wose wali muisi, apfo nitsowahigha mwemwe kwa ghehile ghenu ghose ghamtenda."

3 Angu iwanu weli wodaha kwanga hamwe ka ng'awelaghane baye?

4 Pfii simba kodaha kuduma kumuhulo ka ng'aghoghile imnyama baye?

Angu isimba mdoghodogho kodaha kuduma mna mango yake ka ng'aghoghile chinu baye?

5 Pfii ichideghe kodaha konzeka mna ghumtegho ka kuduhu ichijo mna inyonzo?

Angu ghumtegho ghodaha kufatuka bila kudonzighwa na chinu?

6 Apfi iwanu ng'awopfuka baye aho imalati ya ing'ondo haitowighwa mna ghumji?

Angu lijanga lyodaha kulawila mna ghumji ka ng'alighalighwe na IMNDEWA?

7 Nolonga ghendo IMNDEWA Imulungu ng'otenda chinu baye

bila kuwaghubulila watumighwa wake manabii ichili mmoyo mwake.

8 Isimba yang'aduma, nani yoleka kupfuka?

IMNDEWA wetu Imulungu yang'alonga,

nani iyenyamala yaleke kuulonga usenga wake?

9 Mkatangatse usenga awo kuna iwanu iwokala mna tsing'anda tsa chifalume tsa Ashidodi na kuna iwanu iwokala mna tsing'anda tsa chifalume tsa isi ya Misiri, mkalonge apfino, "Mwitingane kuna ipfidunda ipfiitsunguluka isi ya Samaria, namwe mtsakona pfulughu na maghayo ighotendeka ako."

10 IMNDEWA kolonga apfino, "Iwanu awano ng'awamanyile ghendo baye kutenda ighanoghile, wawo wamemetsa tsing'anda tsawo ipfinu pfawebile na ukuboka." 11 IMNDEWA Imulungu kolonga apfino, "Maaduwi watsoitsunguluka isi yawo na kuhinya ubanda wawo na watsoboka ipfinu pfili mna tsing'anda tsawo tsinoghile."

12 IMNDEWA Imulungu kolonga pfino: "Ka imdimi pfayomboka isimba mighulu mili au chihande cha lighutwi mna ghumlomo, pfipfo pfawatsokombolighwa iwanu chidogho wa Waisiraeli iwokala Samaria, na chihande cha ilusatsi na chihande cha litandiko. 13 Mtegheletse aghano na mghende mkawakanye iwana wa Yakobo. Yanilonga apfo nene IMNDEWA yana tsingupfu tsose. 14 Litsuwa lyanitsowahigha Waisiraeli kwa ajili ya tsinzambi tsawo pfipfila nitsohinya chila hanu ha ukutambikila ha ghumji ghwa Beteli. Nitsobena tsimembe tsa chila matsabahu, natso tsitsoghwisighwa hasi. 15 Nitsomwagha tsing'anda tsawo tsawokalila mna ghumsimu ghwa ichipfeghetsi, na tsing'anda tsawo tsawokalila mna ghumsimu ghwa lijoto. Pfipfila nitotsimwagha tsing'anda tsawo tsikighwe unzolingo wa tsimembe tsa tembo, na tsing'anda tsawo tsing'ulu tsitsomwaghighwa, IMNDEWA yuyo iyolonga."