1 Tegheletseni lilonga alino, mwemwe iwapinga imli ka ng'ombe wa Basani, na imkala kuna ichidunda cha Samaria, mwemwe mwowadununza iwahingwa na kuwonela iwalihela chinu, na mwowalongela iwamale wenu wamghalileni idipfai mnwe! 2 IMNDEWA Imulungu iyelile kelighita apfino, "Loleni mna ghamatsuwa ighakutsa iwanu watsomkweghani kwa indoano ng'ulu, chila munu katsakuwa ka somba iyonzeke mna indoano. 3 Mtsokweghighwa mbaka kuna ubanda wa ghumji, namwe mtsakwasighwa kunze kubitila hanu habomoke ha ubanda awo mbaka Harimoni."

4 "Mwemwe Waisiraeli lelo mghende Beteli mkatende nzambi, mghende Giligali mkongetse ukutenda tsinzambi! Lapfeni nambiko tsenu chila nemitondo na tsizaka tsenu chila haghomala matsuwa madatu. 5 Lapfeni ipfighate ipfighelighwe hamila, pfiwe nambiko ya mighede. Longeni ka mlapfa kwa ukubama mwenyegho, namwe mwighodele tsinambiko atso, kwaapfila ukutenda apfo mwemwe komnoghelani." Nene IMNDEWA Imulungu yanilonga apfo.

6 "Nene nighala inzala mna imiji yenu, na mkala mwahela chijo mna tsikaye tsenu, lekeni mwemwe mlema kuya kuna nene. Yanilonga apfo nene IMNDEWA." 7 "Pfipfila tsaniighoma imvula ileke kutowa kuna mwemwe, aku ing'ali miyetsi midatu kupfika ghumsimu ghwa ukupfuna, imvula tsaitowa mna ghumji ghumwe na mna ghumji ghungi ng'aitowile baye, mghunda ghumwe tsaghupata mvula, na ghungi ng'aghupatile mvula baye, nagho ghunyala. 8 Iwanu wa miji mili au midatu tsawatsumila kuna ghumji ghungi ili wabame ghamatsi lekeni ng'aghawenele baye, lekeni mwemwe mlema ukumbuyila nene." Nene IMNDEWA yanilonga apfo.

9 Tsangala chiyangayanga na ng'ungughu, ghamakonde ghenu na imighunda yenu ya mitsabibu niitenda inyale, nawo wanzighe tsawaja imitini na imitseituni yenu, lekeni mwemwe mlema ukumbuiyila nene. Nene IMNDEWA Imulungu yanilonga apfo.

10 "Tsaniwaghalila utamu wihile aula waniwaghalile iwanu wa isi ya Misiri. Tsaniwakoma iwasongolo wenu kuna ing'ondo na niwaboka falasi wenu wa ing'ondo. Ng'uli tsa iwasongolo wafile tsatsimema mna tsikaye tsenu, natso tsing'ali tsiwanung'ila pfihile mna tsimula tsenu, lekeni mwemwe mlema ukumbuyila nene." Nene IMNDEWA Imulungu yanilonga apfo.

11 "Wamwenga wenu niwahinya ka apfila pfaniwahinyile iwanu wa Sodoma na Gomora. Awala iwahonile tsawakala ka chitsinga chilapfighwe mna ghumoto, lekeni mwemwe tsamlema ukumbuyila nene." Nene IMNDEWA Imulungu yanilonga apfo. 12 "Apfo nene nitsowatenda chinu achino mwemwe Waisiraeli, na kwaapfila nene nitsotenda apfo, lelo mwiteghanye kwa ukwitingana na Imulungu wenu."

13 Kwaapfila Imulungu yuyo yapfitendile ipfidunda na iyaumbile libeho,

yeye yuyo iyomghubulila imunu ghamawatso ghake.

yeye yuyo iyotenda misi iwe chilo,

yeye yuyo iyobajugha ipfidanando pfa isi.

Yeye taghwa lyake IMNDEWA Imulungu yana tsingupfu tsose!