1 Tsanimwona IMNDEWA kema hambalimbali ha matsabahu, naye kanilaghitsa apfino, "Ghatowe ghamatwi gha tsingutso tsa ing'anda ya Imulungu mbaka pfitsingiti pfake pfihighisike, tsighwise tsingutso atso mna ghamatwi ghwa iwanu wose, awala iwohoneka nitsowakomela kuna ing'ondo, kutsakuwa kuduhu hata munu yumwe iyatsolekighwa mgima wala iyatsotsuma. 2 Hata ka wohimba inzila ighenda hasi kutsimu, ako nitsowasola kwa ghumoko ghwangu, hata ka wogheluka kuchanya kulanga, kulawa kuko nitsowahulumsa hasi. 3 Hata ka woghenda kwipfisa kuna ichidunda cha Karimeli, ako nitsowabama na kuwaghogha, hata ka wepfisa hasi ha ibahali ndeke kuwona, ako nitsolilaghitsa litsoka liwalume. 4 Hata ka maaduwi tsawo watsowaghogha na kuwaghala kuna isi ya utumwa, ako nako nitsolaghitsa wakomighwe kuna ing'ondo, nitsotsodola tsinenge tsangu niwatendele ighehile na si ighanoghile baye." 5 Kwaapfila IMNDEWA, Imulungu yana tsingupfu tsose yuyo iyodonza isi nayo yolubuka, na wose iwokala amwo wadomboketse, na isi yose yakwinuka na kughwa ka ghamatsi gha ghumto Naili ghwa Misiri pfaghomema na pfaghakuhwa. 6 Yeye iyotsenga ing'anda yake ya chifalume kulanga na iyakwika ghumsingi ghwake muisi, yeye iyokema ghamatsi gha ibahali na kughamwagha mchanya mwa isi. Taghwa lyake IMNDEWA 7 IMNDEWA kolonga apfino, "Angu kuna nene, mwemwe Waisiraeli si ka wanu wa Esiopia baye? Apfi mwemwe Waisiraeli siwalapfile baye kulawa Misiri? Angu Wafilisti siwalapfile baye kulawa Kafitoli na Washami kulawa Kiri? 8 Lola, tsinenge tsa IMNDEWA, Imulungu tsolola ufalume una tsinzambi, na nene nitsoukoma ghendo, yanilonga apfo nene IMNDEWA.

9 "Kwaapfila nitsolapfa laghitso, na nitsowabeta iwanu wa Isiraeli iwali mna iwanu wa isi tsingi, ka apfila imunu iyobeta ingano kwa ilungo, na kuduhu hata mbeghu imwe inoghile itsolaghala hasi. 10 Wana tsinzambi wose iwali mna iwanu wangu, watsokomighwa kung'ondo, awala iwolonga, ‘Ighehile ng'aghatsotupata baye, wala ng'atutsetingana nagho baye.’"

11 Mna litsuwa alyo nene nitsowimisa keli ufalume wa Daudi ughwile, nitsotsenga keli hanu ahala habomoke, nitsotsenga keli tsing'anda tsake tsibomoke, na nitsoitsenga keli iwe ka apfila pfaikalile ghumwande. 12 Nawo Waisiraeli watsowaghogha iwanu wa Edomu iwasighale, na tsiisi tsose itsili tsangu. Yanilonga apfo nene IMNDEWA iyanitsotenda apfo.

13 IMNDEWA kolonga apfino,

"Loleni, ghamatsuwa ghakutsa,"

ng'ana ghumsimu ghwa ukupfuna ghumale baye,

ghumsimu ghwa ukulima ghutsopfika,

ng'ana ghumsimu ghwa ukubawa nzabibu ghumale baye,

ghumsimu ghwa ukuhanda ghutsopfika.

Idipfai ya sambisambi itsomwaghika kulawa kuna ipfidunda,

na ipfighongo napfo pfitsolaghatsa idipfai.

14 Nitsowoyitsa iwanu wangu Waisiraeli kulawa kuna isi ya utumwa kwawaghalighwe,

nawo watsoitsenga keli imiji yawo ihinyighwe na kukala mumo.

Watsohanda mitsabibu na kunwa idipfai yake,

watsolima mighunda yawo na kuja ipfijo pfawopfuna.

15 Nitsowatenda iwanu wangu Waisiraeli wakale mna isi yawo iwenyegho

na ng'awatsolapfighwa keli baye kulawa mna isi yawo yaniweng'ile.

Yanilonga apfo nene IMNDEWA Imulungu wenu.