1 IMNDEWA Imulungu kolonga apfino: "Iwanu wa ghumji ghwa Moabu tsawatenda nzambi keli na keli, apfo nene sitsoleka baye kuwahigha kwaapfila walakatsa imipate ya mfalume wa Edomu mbaka iwa lipfu. 2 Lelo nitsoghala ghumoto mna isi ya Moabu nagho ghutsolakatsa ghendo tsingome tsa ghumji ghwa Kerioti. Maasikali hawatsokemelela na kutowa malati, iwanu wa ghumji ghwa Moabu watsakufa kwa ing'ondo ayo. 3 Pfipfila nene IMNDEWA nitsomkoma imtawala wa isi ya Moabu na wapfilongotsi wose wa isi ayo."

4 IMNDEWA Imulungu kolonga apfino: "Iwanu wa ghumji ghwa Yuda tsawatenda nzambi keli na keli, apfo nene sitsoleka kuwahigha ghendo baye. Kwaapfila waghabetsa malaghitso ghangu na ng'awawinzile aghala ghaniwalongele. Waghisighwa na imilungu ya ughutsu, aila yawaitambikile iwakulu wawo. 5 Lelo nitsoghala ghumoto mna isi ya Yuda, na kulakatsa ghendo tsingome tsa Yerusalemu."

6 IMNDEWA Imulungu kolonga apfino, "Iwanu wa ghumji ghwa Isiraeli tsawatenda nzambi keli na keli, apfo nene sitsowaleka kuwahigha baye. Wawachuutsa iwanu wangu iwana ihaki kwa fetsa, na iwanu iwahingwa wawautsa kwa imikwabatsa. 7 Wowonela iwanu nyondenyonde na iwahingwa wowatenda waleke kupata haki tsawo. Imunu na imwanaghe wowasa na pinga yumwe, apfo wolitenda litaghwa lyangu ilyelile, lihe. 8 Wowasila ghamabwende hanu ha ukutambikila, ghawasolile kwa iwahingwa iwekile poni, na mna ing'anda ya imulungu wawo wakunwa idipfai ighulighwe kwa pfetsa tsawalihile iwanu. 9 Hata apfo, tsakawakoma ghendo Waamori kwaajili yawo, iwakalile watali ka mikataluba, na iwana tsingupfu ka miyaloni. 10 Nimlapfani kulawa kuna isi ya Misiri, tsaniwalongotsa kubitila mna inyika kwa miyaka alubaini, mbaka muiboka isi ya Waamori iwe yenu. 11 Niwasaghula iwana wenu wamale wamwenga wawe manabii, na iwasongolo wenu wamwenga niwabaghula wawe wanu iwomsang'anila Imulungu iwokemighwa wanatsili. Angu mwemwe Waisiraeli aghano ghanilonga noghutsuka? Nene IMNDEWA yanilonga apfo." 12 Lekeni mwemwe tsamuwatenda Wanatsili wanwe dipfai, na muwaghoma manabii waleke kulapfa unabii. 13 "Lelo nitsowahonda ka pfaghuhonda ghumtuka ghumemile ingano. 14 Hata awala iwotsuma ng'ani ng'awotsodaha ukuswekuka baye, na wana tsingupfu watsotenyuka na maasikali wana ingupfu ng'awatsodaha baye kwikombola. 15 Watoa minde mna ing'ondo ng'awatsakwima ghoya baye wala wadinafalasi ng'awatsodaha kwikombola baye. 16 Mna litsuwa alyo hata maasikali wana ingupfu watsotsuma aku wachidako." Nene IMNDEWA Imulungu nilonga apfo.