1 Aghano ghagho ghayananguse IMNDEWA mna ghamaono. Mbona chiseghe chimemile ghamatunda gha msimu ghwa chiyangatsi. 2 Naye IMNDEWA kangutsa apfino, "Amosi wonile choni?" Nene nimwidika, "Nakona chiseghe cha ghamatunda gha msimu ghwa chiyangatsi." kuya IMNDEWA kanongela, "Ghamatsuwa gha ukuhupa kwa iwanu wangu wa Isiraeli ghapfika. Nene sitsoleka keli ukuwatowa baye." 3 IMNDEWA Imulungu kolonga apfino, "Mna litsuwa alyo tsiwila tsa ing'anda ya chifalume tsitsakuwa wila tsa ukulila. Tsing'uli tsa iwanu wafile tsiitsakuwa nyingi, natso tsitsakwasighwa kunze chila hanu tulutulu."

4 Tegheletseni alino mwemwe imuwadidimitsa iwanu iwalihela chinu, na imuwonela iwanu wahingwa iwali muisi. 5 Mwemwe imlonga, "Ghumwetsi ghungi ghutsolawa tsuwachi ili tuutse ipfijo? Isabato itsomala tsuwachi ili tuutse ingano yetu? Mwohungutsa ipfipimo na mwakongetsa ibei, mwobugha iwanu kwa minzani ibunza, 6 mwowaghula iwanu wahingwa kwa ifetsa, na iwanu iwalihela chinu kwa imikwabatsa, mwoutsa hata imibangu ya ingano ihanganyike na ingano yenyegho."

7 IMNDEWA Imulungu, kolonga, "Hata ka mwemwe mweghoda kwa kuwa welekighwa wa Yakobu, nene sitsesemwa ghendo baye chochose chawatendile. 8 Angu isi ng'aitsodedemeka baye kwa alino, na chila munu iyokala amwo ng'atsolila baye? Isi yose itsakwinuka na ukughwa, itsakuwa ka ghumto Naili pfaghumema ghamatsi na kughwa ka ghumto agho Naili ghwa Misiri. 9 IMNDEWA Imulungu, kolonga, Mna litsuwa alyo nitsolitenda litsuwa litsame saa sita nemisi, na nemisi itsakuwa chisi totolo. 10 Nene nitsotenda ipfihungo pfenu pfiwe chililo, tsiwila tsenu tsa ukudeng'elela tsitsakuwa wila tsa ukudomboketsa, nitsowatenda mpfale ghamaghunila, na mtsobeya tsimvili tsenu. Nene nitsotenda muwe ka iwanu iwafilighwe na imwana nyalimwe. Litsuwa alyo lyose litsakuwa lya usungu."

11 "IMNDEWA Imulungu kolonga apfino, Mna ghamatsuwa ighakutsa nitsoghala nzala muisi, nayo si nzala ya chijo baye wala ng'ilu ya ghamatsi, lekeni nzala ayo itsakuwa nzala ya ukuhulika ghamalonga gha Imulungu. 12 Iwanu watsakwanga kwanga kulawa bahali mbaka bahali ingi, watsolawa ubali wa kasikazini mbaka mashaliki, watsobama Lilonga lya IMNDEWA, lekeni ng'awatsolipata baye. 13 Mna litsuwa alyo iwali iwadeghete na iwasongolo iwakindike watsotsilika kwa ukwona ng'ilu. 14 Awala iwelaha kwa ichinyagho cha Samaria na kulonga, ‘Kwa taghwa lya mulungu wa Dani,’ au awala iwolonga, ‘Kwa litaghwa lya imulungu wa Beeri Sheba,’ Awo wose watsakughwa, na ng'awatsakwinuka keli baye."