1 Aghano ghagho ghayananguse IMNDEWA Imulungu mna ghamaono, tsanimwona Imulungu koweka ghoya wanzighe kwa ukuwatuma. Alino litsolawila ghendo ahala iwanu hawatsomalitsa kumpfunila ipfijo mfalume, na imitsani haitsakwanza kutsuka keli. 2 Niwona wanzighe wakuja na kumalitsa chila tsani libisi lili muisi, baho nikemelela, nonga, "Ghwe IMNDEWA Imulungu nokudedetsa uwalekelele iwanu wako, iwanu wa Yakobu watsodahatse kuwa wagima? Lola wawo pfawali chidogho ghendo na pfawali nyonde nyonde." 3 Baho IMNDEWA kaghutuka, kuya kalonga, "Sitsotenda apfo baye."

4 Alino lilyo lyayananguse IMNDEWA mna ghamaono. Nimwona IMNDEWA Imulungu koghukema ghumoto yawahighile iwanu. Ghumoto agho ghulakatsa ibahali na isi isakale. 5 Baho nikemelela, nonga, "Ghwe IMNDEWA Imulungu, leka kutenda apfo,. iwanu wa Yakobu watsodahatse kuwa wagima? Lola pfawali chidogho ghendo na pfawali nyonde nyonde." 6 Baho IMNDEWA kaghutuka, kuya kalonga, "Sitsotenda apfo baye."

7 Alino lilyo lyayananguse IMNDEWA mna ghamaono. Nimwona IMNDEWA kema hana ubanda ugholoke, tsaulingighwa na lutsabi luning'inila libwe lya chuma lya ukulingila, ilikemighwe Timazi. Yeye Imulungu tsakakinda itimazi ayo mmoko mwake. 8 IMNDEWA kangutsa apfino, "Amosi, chaukona choni?" Nimwidika, "Nakona Timazi." Kuya IMNDEWA kalonga, "Lola nakwika itimazi iwalinge iwanu wangu Isiraeli. Nene sitsowaleka keli baye bila kuwahigha." 9 Chila hanu henulighwe ha Isaka ha ukutambikila milungu ingi hatsohinyighwa, na chila hanu helile ha Isiraeli ha ukutambikila milungu ingi pfipfila hatsohinyighwa, na nene nitsowenukila iwanu wa Yeroboamu na ukwitowa nawo.

10 Kuya imtambika Amazia wa ghumji ghwa Beteli katuma wasenga wakamlongele Yeroboamu, mfalume wa Isiraeli apfino, Amosi kokutendela tsengwe mna iwanu wa Isiraeli. Iwanu iwali muisi ng'awodaha baye kughendelela kuhulikitsa chayolonga. 11 Kwaapfila yeye kolonga apfino, "Yeroboamu katsakufa kwa ukukomighwa kung'ondo na iwanu wa Isiraeli watsoghalighwa kuna isi ya utumwa, isi ili kutali ghendo na isi yawo." 12 Kuya Amazia kamlongela Amosi, "Ghweghwe imunu yuutabili, uka ahano! Uye kuna isi ya Yuda, ukalapfe unabii wako ako na iwanu walikuko watsokwing'a ichijo. 13 Uleke kulapfa unabii wako keli ahano Beteli, kwaapfila hanu ahano ha mfalume ha ukutambikila, na baho ing'anda ya chifalume." 14 Amosi kamwidika Amazia apfino, "Nene sili nabii baye wala sili mwana wa nabii baye. Nene na mdimi wa wanyama na notunza mibiki ya mikuyu. 15 Lekeni IMNDEWA kanisola kulawa kuna ukudima wanyama, na kanongela apfino, ‘Ghenda ukawatabilie iwanu wangu wa Isiraeli.’ " 16 Lelo Amazia, tegheletsa chayolonga IMNDEWA, Ghweghwe konongela ndeke kulapfa unabii kuna iwanuwa Isiraeli, na ndeke kulonga chinu kwa welekighwa wa Isaka. 17 Apfo IMNDEWA kolonga apfino, "Mwehe wako katsakuwa chiweghe mna ghumji, na iwanagho wamale na wapinga watsakomighwa kung'ondo, isi yako itsogholighwa na watsakwing'ighwa wanu wangi, naghwe ghumwenyegho kutsakufila kuna isi ihile. Na iwanu wa Isiraeli watsosolighwa na kughalighwa kuna isi ya utumwa."