1 Mtsochona mwemwe imkala kwa ukuhondola ako Sayuni,

na mwemwe yamwibona mkala tulu mna chidunda cha Samariya,

mwemwe imkoneka mwa pfilongotsi immanyika wa isi aino inoghile ng'ani,

na kuna mwemwe Waisiraeli wose watsowatsilani

2 Mghende kuna ghumji ghwa Kaline, mkaghulole,

kuya mghende kuna ghumji mkulu ghwa Hamati,

mhulumke mbaka kuna Gati ako Filistia.

Pfihi falume tsawo tsina ngupfu kubita falume tsenu mbili?

Pfihi isi yawo ng'ulu kubita isi yenu?

3 Mwemwe ng'amlipfikitsa baye litsuwa lihile ilikutsa,

na kwa ukutenda apfo mwolitenda litsuwa lya maghayo liwe habehi ukupfika.

4 Mtsochona mwemwe yamuwasila ghamasatsi ighekighwe unzolingo wa membe tsa tembo,

na ukwigholosa mna ipfighoda pfa bei ng'ulu,

aku mwakuja wang'olo iwanonile

na wang'ombe iwanenehe.

5 Mwemwe mwotunga tsiwila tsa ubotsi,

na mwotengenetsa ipfing'weng'we ka pfa mfalume Daudi.

6 Mwakunwa idipfai mna tsibakuli,

na mwobakala ghamapfuta ighanoghile,

lekeni mwahela usungu kwa ukukomighwa kwa iwelekighwa wa Yosefu.

7 Apfo mwemwe mtsolongola kughalighwa kuna isi ya utumwa,

ipfihungo pfenu na ukuhondola kwenu kutsomala.

8 IMNDEWA Imulungu kelahila imwenyegho kalonga,

IMNDEWA Imulungu yana tsingupfu tsose kolonga,

"Na ukwighoda kwa iwanu wa Yakobu nene kwonyihila,

na tsing'anda tsawo tsinoghile tsonyihila,

ghumji ghwao na chila chinu chili mumo nitsoweng'a maaduwi tsawo."

9 Ka wasighala wanu kumi mna ing'anda imwe, wose watsakufa.

10 Ndughu wa imunu iyafile hayatsakutsa yalulapfe kunze ilukuli yakalulakatse,

na hayatsomghutsa imunu iyepfisile amwo,

"Pfihi hana munu wowose iyali na ghweghwe?"

Naye yang'alonga, "Baye," baho katsolonga,

"Winyamale tulu! Ng'atubamighwa baye tulitambule litaghwa lya IMNDEWA."

11 Lola, IMNDEWA kalapfa laghitso,

yeye katsolimwagha ling'anda likulu, lighwe pfihande pfihande,

na ing'anda ndodo ighwe pfihande pfidopfido.

12 Angu wafalasi wodaha kutsuma mchanya mwa ghamabambalawe?

Apfi iwanu wodaha kulima kwa ng'ombe mna ibahali?

Lekeni mwemwe muitenda ihaki iwe sumu,

na mtenda aghala ighanoghile ghoneke gheha.

13 Mwemwe mwodeng'elela kughuboka ghumji ghwa Lodebari,

namwe mwolonga, "Tughuboka ghumji ghwa Karinaumu kwa tsingupfu tsetu tuwenyegho."

14 Kwaapfila IMNDEWA Imulungu yana tsingupfu tsose kolonga apfino,

"Mwemwe Waisiraeli, nitsoghala wanu wa isi imwe watse kuwatowa,

nawo watsowadununza kwanzila kasikazini mwa Lebo Hamati mbaka ubali wa kusini wa ichiwala cha Araba."